Jeupa Joséwan pesannamuik køn

Josépe pishirai yau wapen, Egiptosrø aship karupik tru faraónpe kan piaik muken nepua asamkeik tøkakøpen faraónwai kan aship mekapik eshkaik køn, Josépe sí piaikwan eshkantrun cha. Inchen faraónpe Joséwan pestø pera amø taik køn.

Faraónpe nui piaikwan Joséwan eshkatra chipen, Josépe trencha løtik køn: “Egiptosrømpe siete pilamera mamikmera latrø nøtrø køntrun cha trukutri siete pilamera latrø trømpøik parø attrun cha. Kan tap nepua ashchapik wesrua pasr, mamikwan tap esekantrapik misakmera parøkuap kuamøntrain cha”. Faraónpe trentaik køn: “¡Ñi aship pasrøntrik! Inchentø ñuim palape natø más nuik kømøntrun cha”. ¿Josépe chincha eshkaik kø piaikwan? Kakentø Jeupa purukup pasraikkutri.

Josépe siete pilamerakatik mamikmera tuliship pasraik køn. Yanayupe José taimpala, Pirø ørø mamik kaakøp mentik køn. Treekkutri, misakmerape tru urasrønkutri mamik penøntrap amtruik køn. Nui møskai Egiptosrø katøkucha mamik yanamik pasraik kui kuenta peñape, nui nusrkalø diezelan penøntrai ørik køn.

Jacobwai urekmerape Joséwan ashchap ampen Josépe mumera kui møi møi kuenta peñen nui nuneløpe nun nepua ashmuik køn. Joséwai metrap pøntramisra mayelø tømpønsraik køn nun piainuk latawai. Nun katøkucha tsalelø kuitashchap trentaik køn: “Ñimpe ik pirøwan larøntraptøwai amtruintrun cha”. Nømpe trencha løtik køn: “¡Larøntrap amtrumer cha! Canaánsreelø ker. Doce nunelø kua kane kuapen, srape nunekpe nui møskaimpa waintrun cha”. Josépe trentaik køn: “Ñimui srape nunekwan pera amtrupene sí køremøntrun cha”. Inchen nømpe katø Canaánsrømay ampik køn.

Jacobwai yawelø katøyu mamik chikar køtrømisren, nømpe Egiptosrømay más penantrap Benjamín matsinø unankucha pera ampik køn. José nun katøkucha tsalelø køtashchap Benjamínwai costalyu nui copa antøka marikwan waya ørik køn. Øyeen cha nilin køn chintrap. Joséwai karuintik melapelø Benjamínwai costalyukutri copan wesrupen, nømui nuneløpe køtrø kuara matsinø unan chikucha marmøntrai nømpurø pøntramisrtrap cha Joséwan miaik køn.

Josépe kuenta penik køn nui nunelø nømui isuikwan yunømarik kui, inchawai kiship menta nømun trentaik køn: “Ñimui nunek José kur, nai møskainkan tap ka wapik kuitatru” chipen, nømpe køtrø kuarik køn. Inchen Josépe nømun trentaik køn: “Kullaarap isui inchimøtay, Tius nan ørik køn manawai nanmetrik intrai, misakmeran kuamø ka øsik puraamtrai martrap. ¡Mallachiktø ampay! Nai møskawan pertrap cha”.

Egiptøsrø chi purayaikwan nømui møskawan waminchap, pertrapkucha ampik køn. Latrø yam pilamera nui møskai Joséwan ashmua, møimpe sí trupalatø warøntrap ampik køn.