Pikø marwan Tius kurik køn

Israelitasmera Egiptokutri wepampik, faraón wam mørape tap kømui møra nui suldaumeran wama trentaik køn: “¿Nampe chinchap wepampin karuik kø? Israelitasmerai wentautø amtrap karrumeran tamaray cha”. Treekkutri, israelitasmerai wentautø ampik køn.

Jeupape israelitasmeran kualømpe wañi ølnepiktøka pera ya yempe nak ølnepik pilapiktøka pera yaik køn, Pikø marsrømay pera ya truyu køtrømisrin karuik køn.

Israelitasmerape nepua asik køn, tru faraónpa nui ejércitomerapa wentautø amtruik. Mar pulu pua køpen egipciosmeran amtruik ashape, israelitasmerape traship menta Moiséswan trentaik køn: “¿Chinchap pera wepatrik kø Egiptosrønkutri? ¡Yu kuantraintøpe cha!”. Inchen Moiséspe trentaik køn: “Kørik kui inchimø Jeupa maik wesruntrap kui ashchap tsøntatø muniray cha”. Nøpe Jeupawan cierton kørewa pasraik køn.

Trukutri Jeupa karuik køn, carpasmeran tulisha kusruntrai cha. Tru yempe Jeupa wañiwan malsra israelitasmerai, egipciosmerai tøpøtak pasren, egipciosmera pøntrainukpe løstik pasrøpen, israelitasmera pøntrainukpe tørkantø pasraik køn.

Jeupa trentaik køn Moiséswan: “Tasikwan marpurap kusru cha”. Incha kualma isik itsinkarua, marpe pirishipen tøpøtak kan may køtrømisrik køn. Inchen maya israelitasmerape tru mar tøpøtakwan puraampik køn katøkan tarøsrønkatik.

Egipciosmera israelitasmerai wentautø amtruik køn mar tøpøtakwan. Inchen Jeupape egipciosmerai karrumera llantameran wekøtrøntrai maren, nømpe trentaik køn: “¡Yukutri lulkun! Kakentø Jeupa nui misakmeraimpurap kuayap pasran cha”.

Katøyu Jeupa Moiséswan trentaik køn: “Mar pala ñui tasikwan kusru cha”. Inchen egipciosmeraim pala pi katøyu kasrøp mentøpen faraónpe nui suldaumerapa chishtø kuaik køn.

Inchen kantarø latraampa kasrak Jeupawan miiraik køn: “Jeupa ñun kasrak miiratrumøn kakentø nømui kaullimeran, karrumeran chishtø marsrø kepusrikkutri”. Søtømisra kasrak miirap kømne, ishumpurmerape pailanpa panderetaswan itsampa intik køn. Søtømisra latrø kasrak pøntraik køn kakentø Egiptokutri wesruikkutri.