Moiséspe Jeupawantø adorantrap isuik køn

Egiptosrø uñip uras Jacobwai misakmerainukkutri amtrupelan israelitas cha wamik køn. Jacobpa Josépa kuapen faraón nø aship karup wamisra, kørik kui intik køn kakentø israelitasmera latrø nu latrøpitchip mentikkutri, inchawai latrø mur kuallchai ladrillosmera martrain karuik køn. Israelitasmeran egipciosmera latrø trømpøik marinkucha más nu misrøp atrupen, faraónpe maya møk urekwan kuetsin karuik køn. Treek maren, israelitasmerape latrø kørik kui mørørai intik kuintrun.

Kan israelita ishuk misak Jokébed munchi taik kan unø tøkamisra, pi Nilo tainuk, tru unan sørøntrap canastayu waya øren, tru unai mayor nuchak Míriam munchi taik chintashchap yaptø aship pasramisrik køn.

Faraónwai nimpasr piu pirøntrap ya asik køn, kan canastayu unø kiship waik inchen lástima aship pasrøpen, Míriampe paik køn: “¿Ñuin kuenta unan pitsø mutsøsrøntrai munkøpen lawa cha?”. Inchen øn chipen Míriampe unø usrantøwai pera atrupen faraónwai nimpasrpe trentaik køn: “Nain kuenta unan ashcha na pakaratrumøn cha”.

Yantø unø nurapen faraónwai nimpasrwan trantrap sruaipen, Moisés munchi pasra nui unø kui lataik nuranik køn. Moiséspe príncipe lataik nurap yaikkutri chi palaikwan chishtø tøkakuinkucha Jeupawan pesannamuik køn, nøpe israelita kui tørtø tøkakuikkutri, Jeupawaiwan lelachimuik køn.

Moisés 40 pilamera tøkaik kua nui misakmeran purukuntrap isuik køn. Kan kualøm, Moisés kan egipcio israelitan ichip pasrøpen nepua asha latrø trømpøik namik køpen, egipcion kuetcha arena umpu sørik køn. Inchen faraónpe trunun wammøra Moiséswan kuetchap lapen, Moiséspe welula ya Madiánsrømay ipen, trusrø Jeupape nun purømisrik køn.