Srøtø pønkatø plagasmera

Israelitasmerape Egiptosrø karuintik melapelø kua, latrø mur kuallchai ørøpelø kuik køn. Jeupape Moiséswanpa, Aarónwanpa, faraónwan trenchintrai ørik køn: “Nai misakmera nan adorantrap amtrai ørtra cha”. Faraónpe latrø nuik kurmap isupik kuikkutri trencha løtik køn: “¿Nakan chi kuitatru øyeek Jeupawan mørøp pasrøntrap? Nape wermumøntrun cha”. Truyukutri más mur kualin karupen, Jeupape diez plagastrawa mu Tius más nuik kuikwan kenamartrap Moiséswan trentaik køn: “Faraón nan mørmøtan, srøna løtsø nøpe nu pi Nilosrø pasrøntrun cha. Ñipe trusrømay ya trenchintrik: ʻTru israelitasmeran amtrai lelachimupene ik pi luløp tsupikpe ani misrtrun chaʼ”. Moiséspe faraónwan ashchap ipen, nøpe asik køn tru Aarón nui tsik srua kuiktøka piu kepachen pi luløp tsupikpe møi møi ani misrøptinchen, inchen trømpøik itrap menta peskaumera kuap, mutsamkeik misrik køn. Treek kuintøkucha, faraónpe israelitasmeran ørmøntrap waik køn.

Siete kualømmera puraipen Jeupape Moiséswan trenchintrai ørikøn faraónwan: “Nai misakmeran mallatø Egiptosrønkutri wermupene kutike urututumera netsøkanamøntrun cha”. Faraón mørmuikkutri Aarónpe nui pørøtsikwan kusrupen, urututumerape yamerasrø nømui camamerasrø, nømui nakchaksrønken netsap mentik køn. Inchen faraónpe Moiséswan trentaik køn: “Jeupawan miau ik plagan pinishintrai, trenchene sí israelitasmeran øramøntrun cha”. Inchen Jeupape pasrampun karupen egipciosmerape urututumeran kanpalatø tuluntsunen trømpøik itrap mentinkucha faraónpe wermuik køn.

Katøyu Jeupape Aarónwan pirau nui pørøtsiktøka itchain karupen, usrøyukutri pølømmera kutra misakmeran kuanøp mentik køn. Møilø egipciosmerape faraónwan eshkantrap ampik køn Tiuswainukkutri atrun cha. Treek kuintøcha, faraónpe israelitasmeran ampashmuik køn.