Katøkan seis plagasmera

Moiséspa Aarónpa katøyu faraónpa waminchap ampik køn. “Mallatø nai misakmeran ørmupene truørø tábanomera øramøntrun cha”. Tábanomerape nøtrø pølømmera køn kuanøpelø. Latrø nu pølømmerape puarmeraisrø, waachamerai yammerasrø kepampa truurø palømø netsaik pasraik køn. Gosén taiksrø israelitasmera waraiksrømpe pølømmerape kanken kaakuik køn. Ik plagayukutri srapekatikpe israelitasmerane nepumupen egipciosmerantø nepuik køn. Faraónpe Moiséswan miaik køn: “Jeupawan miantrai tru pølømmeran ketrantrai israelitasmera wepamtraimpe”. Jeupape pølømmeran ketrainkucha nøpe wermuik køn. ¿Faraón ik purayailøtrawa kusrentrauta?

Katøyu Jeupa trentaik køn faraónwan: “Nai misakmeran mallatø wermupene nui ushamerape kuantrø misra kuantrun cha”. Katø kualømpe Jeupa maik taikpe purayaik køn. Inchentø israelitasmerai ushamerape kuantrø misrmupen, faraónpe øyeek purayaikwan asinkucha mørmuik køn.

Katøle Jeupape Moiséswan faraónwan ashchai øra nak usrø kutchai karuik køn. Tru usrø kutrapikpe maya egipciosmeraim pala ushameraim pala køtrøpen asrmeran køtrintik køn. Treek kuintøkucha, faraónpe werpashmuik køn.

Moiséswan katøyu faraónwan ashchap øra trentin karuik køn: “Katøkucha nai misakmeran wermøntrapte, srønatøwai trømpøik sre sruk pun karumøntrun cha”. Katø kualømtø Jeupape nakpa palai trashipikpa sre sruk pun karuik køn, manaken Egiptosrømpe øyeek sre pua kømuiksrø. Inchawai tusrmeran, nøm ellwawa tøkakuilankucha mintishipen Gosénsrømpe chikucha puraimuik køn. Katøyu faraónpe Moiséswan trentaik køn: “Jeupawan miau yantø pasrampunkaruntrain israelitasmera wepamtrain cha”. Trømpøik pup pasrapik pasramisrinkucha nøpe wermuik køn.

Møimpe Moisés trentaik køn: “Trømpøik sre pupik chap mintishimuikwan chapullmera chishtø mantrun cha”. Ik chapullmerape nøtrelø kuikkutri tusrmerayu mamtø ishikmera køtrømisrøpelan chap mapen, faraónpe katøyu Moiséswan Jeupawan miantrain karuik køn: “Chapullmeran pinishintrain cha”. Jeupa chapullmeran pinisainkucha faraónpe wermuik køn.

Trukutri Jeupape Moiséswan nui tasikwan pala kusru chipen, møi møi purø trømpøik løstørapen pøm kualøm ørøpa egipciosmerape chikucha ashmø køpen israelitasmeraisrømpe tør pasraik køn.

Møimpe faraón trentaik køn: “Ñui misakmerapa ñimpape mallatø ampay inchentø ñimui ushamerape wepammøntrun cha”. Moisés løtappe trentaik køn: “Ushamerane kutike sruampamik køn kaken møilane namui Tiuswan keta tranamik køn cha”. Inchen faraón purø trømpøik nama Moiséswan trentaik køn: “Ip tsu katøyu asiksruantøpe kuetsamøntrun cha”.