Kan burra wamintik køn

Israelitasmerape yantø 40 pilamera lutau desiertosrø warøwa, nømui pøtøkatan pirømeran nøtrø ciudameran latrø murelan nømuyasik metratrawaken waraik køn. Moab pirø puluwansrø warøwa, Jordán pi puluwansrø Jeupa Trantrap Misrik Pirøyu kepampamik lamøtø palaik køn. Balaac Moab pirausrø aship karup wapik, israelitasmeran kørik kui møra, kan møk Balaam taikwan israelitasmera waraiksrø ya, nømun trømpøik puntrai wamap, trashintrain karuik køn.

Inchen Jeupa Balaamwan trentaik køn: “Israelitasmeran kalø waminchimøntrain cha”. Inchen Balaacpe nun katøle wama chikøpen trantrumøn taik køn, nø karuikwan martrai, inchen Balaampe katøyu kak chipen, Tiuspe nune trentaik køn: “Ka intrø inchentø na karuikwantø eshkantrik cha”.

Balaampe nui burrayu itøkuana sursrø Moabsrømay yaik køn. Nui isuinukpe Jeupa maik karuikwan kømøtø, israelitasmeran trømpøik puntrai wamøntrap isup yainkucha, kan ángel mayu pønmay kenamisren Balaam ashmuinkucha nui burrape sí nepua asik køn. Treekkutri, burrape srøtøpe mayukutri wepia, kan tulsrø kepia sruk champayu kementa yaikkutri Balaamwai srøpwan køtrintik køn, srapepe burrape mayu tsumisren Balaampe burran tsiktrawa itsik køn.

Treekkutri, Jeupa burran wamintinkarupen burrape Balaamwan trencha paipik køn: “¿Chintimpatre nane itchiku cha?”. Inchen Balaampe trenchipik køn: “Kakentø ñi chiwainken mørmøtan kan espada tøkakuimpe møi møi kuetchipsrupraintrun cha”. Inchen burrape trenchipik køn: “Nan yayana itøkuana uninuk. ¿Manakøpen ñun køtrincha kuita?”.

Jeupa Balaamwan tru ángelwan asinkarupen, ángelpe trentaik køn: “Jeupa ñune øyeekwane marmøntrain taik køn”. Inchen Balaampe trencha løtik køn: “Nape kalø isua martrenchiprain køn yantø imøntrap”. Inchentø ángelpe katøyu trenchipik køn: “Moab pirausrømay ka intrø inchentø møimpe Tius karuikwantø eshkantrik cha”.

Balaampe treekwan møra marmuik køn, kakentø pøn piejes israelitasmeran trømpøik nepuntrai waminchap intik køn, inchentø pøn piejesyu Jeupa Balaamwan nui wamwam yunømarik køn israelitasmeran tapik nepuilø køntrai waminchai, srapepe israelitasmera Moab ciudawan kanawa kekøtra trukekøtø Balaamwantøka kuetsik køn, Balaam Jeupawan srøsrøkutri møra marik kuimpe nun tap ip sruintrun.