Jonatánpe kørmø pasrap Davidwan manaken tarømisrmuik køn

Saúlwai mayur nurskai Jonatán kuik køn. Nøpe kan suldau kørmíik kuikkutri, David trentaik køn: “Jonatánpe kan león lataik murik køp, wasrø lataik latrø mallaik køn cha”. Kan kualøm, Jonatánpe kan lamø tunyu filisteosmeran pøntraik asha, nui lincha atrupikwan trentaik køn: “Jeupa kuayaik chipene, nømpa kuayantrap, inchen filisteosmera namun kuayantrap netruik chipene, kuayamik kuitamap ashchap cha”. Inchen filisteosmera nømun kuayantrap netruik chipen, Jonatánpa, nui lincha atrupikpa nepampa 20 filisteosmeran kuetsik køn.

Jonatánpe Saúlwai mayur nusrkai kuikkutri, yantø Saúl kuapen rey køntrapik kuik køn. Jonatánpe nepua asik køn, Jeupa Davidwan rey køntrai wesruik kui, inchawai nun tsalø ashmøtø, masken pailø tap linchipelø misrik køn. Jonatánpe Davidwan untaktøka pasraikkutri, nui kewa kuikwan, espadan, arcon, pørønaikwankucha tranik køn.

Saúl Davidwan kuetchap pasraren, Jonatánpe nun ashchap ya trentaik køn: “Kørmø mur pasrøntrik, kakentø Jeupape ñun rey køntrai wesrua pasrik kui, nai møskainken nepua asha pasran cha”. ¿Ñune Jonatán latawai kan tap linchipik tøkakømik kustantrauta?

Jonatánpe Davidwaimpurø yam piejes kuayaik køn. Inchawai nui møskai, Davidwan kuetchap intik asha trentaik køn: “Ñi Davidwan kuetchape latrø nu kalø martrun, kakentø nøpe chi kalø mara pasrømøn cha”. Inchen Saúlpe trømpøik namik køn. Mam pilakøsrøn puraipen, Saúlpa Jonatánpa kan kuayap utu kuaik køn.

Jonatán kuaikkutri, Davidpe nui nusrkai Mefibósetwan lawa, trentaik køn: “Ñi øsik uninuk chikucha palømøntrun, nai yau wap, na mamik mailantøwai mantrik, kakentø ñui møskai nai tap linchipik kuikwan manaken pesannamumøntrun cha”.