Jeupawai suldaumera nak lataik køn

Rey Ben-Hadad Siriasrik Israelwan yam piejes patsøkøntrap intikkutri Eliseo manakucha eshkapik kuik køn, Israelsrø reywan trupap welultraik. Treekkutri, Ben-Hadad Eliseowan metrøtrantrap tru Dotánsrø tsuik wam møra trusrømay ørik køn nui ejérciton trusrønkutri kemøra srua amtruntrai.

Dotán pirausrø ejército sirio pua tulsruaken køpik køn. Incha Eliseowai karuintik mekapik treekwan asha kørik kuincha, Eliseowan trenchipik køn: “¿Møimpe chi martrap cha?”. Inchen Eliseo trencha løtapik køn: “Kørik kui inchimøta, nampa más latrø nu køn cha, nømpa lataken kømø”. Treekkutri, Jeupape nui ejérciton tør nepua ashchai nun purukuik køn.

Suldau siriosmera Eliseowan kemøra srua amtrenchen nøpe Jeupawan trenchipik køn: “Mayampa kapmera ashmelø køtrømisrtrain cha”. Tru urastø suldausmerape ashippe ashentø chu pøntraik kuinken mørmelø køn. Trukutri Eliseope nømun trenchipik køn: “Ñimpe pella amønan, nai mentik amtruik incha pera itrumøn ñim lap amtruikwai numayasik”. Eliseope siriosmeran Samaríasrønkatik pera ipen, truyu Israelsrik rey tsupik kuik køn.

Yantø trusrø puaken wetøkøtrapelø køn chu pøntraik. Truyupe Israelsrø rey Eliseowan trencha paipik køn: “¿Mayelan kuetsamø cha?”. Siriosmera nun kuetchap intinkucha, Eliseope reywan trenchipik køn: “Kuechimøtay trempe, mamik srøtrøp, pi srøtrøp, incha ka ampasay cha”. Treekkutri, reype mamik nu nenin karua nømun øskatø køntrai srøtra, ka amtrai ørøpik køn.