Jehoiadá kørmø pasrapik køn

Jezabelpe kan nimpasr nø latawai latrø kaik Atalía taik tøkamisra, Judásrik reypa kasharawaik kuik køn. Inchen rey kuapen Judá pirau nui nusrkain karup wamisrik køn. Yanayu nui nusrkai kuapen Atalía nø aship karup wamisrik køn. Incha nø karup waikwan mukucha ketramøntrai, reywai nusrkalanpa, nui awelø urekmeranpa kuetsikkutri, mayeløpa nun kørik kui inchipelø kuik køn.

Ataliai awelu-unan, sumo sacerdote Jehoiadá, nui sraimpa sørapelø køn tru unan kuetchimøntrai. Tru unøpe Jehoás muchi kuik køn.

Yantø siete pilamera tøkaik kømnekatik temployu søra kua, Jehoiadá levitasmeran aship karup pøntrapelanpa temployu larap aship pøntrapelanpa, kanpalatø mara nømun trentaik køn: “Temployu munken ketrupashmøtay cha”. Incha Jehoiadá, Jehoáswan coronan petsøsraik køn Judá pirau aship karup wamisrtrai. Inchen misakmerape trupa kasrak trashipelø køn: “¡Yana øsik tsuntrain cha!”.

Misakmera traship kuikwan Atalía mørape templosrønkatik ya, trusrø rey unan asha trenchip trashipik køn: “Nø aship karup waikwan niløtrentan cha”. Tru urastø suldaumeran aship karup pøntrapelø Atalian metrøtrawa, wampik srua ampa kuetchipelø køn. Atalíape latrø kaik ishuk kuik køn. ¿Møimpe chi puraintrera?

Jehoiadápe misakmeran Jeupawantø adorantrai purukuik køn. Inchawai Baalwai templo umpu taska marik tiusmeran pinisaik køn. Øyamay sacerdotesmeranpa, levitasmeranpa purukuntrai pønsraik køn, temployu misakmera Jeupawantø adorantrai. Incha templo yaskapwan ashipeløkucha pønsraik køn, tru misakmera kepamtrapelø Jeupa maik karuikwan møra martrai. Srapepe nøm Jehoáswan nø karup wamsrømay srua ampen, Judásrø misakmerape latrø kasrak kuik køn, kakentø møimpe si Jeupawantø adoramtik kuikkutri, Jehoiadá kørmø marikpe misakmeran latrø nu purukuik køn.