Jeupape Jonáswan tammay muniraik køn

Nínive misakmera latrø kailø kuikkutri, Jeupape Jonáswan ørik køn nøm kalø marøp kuilan yunømartrai eshkantrai. Inchentø, Jonás møra marmøntrap kan barcoyu nepia, Tarsissrømay yaik køn.

Barcope pi tøpøtaksrø ipen, palai traship latrø mur sre pup mentøpen, barcoyuiløpe kørik kui nømui tiusmeran wama, nømasiktø trenchipelø køn: “¿Namun chinchatre øyeek purep pasra cha?”. Inchen Jonáspe trenchipik køn: “Na Jeupawan møra marmuikkutrin køn. Inchawai barcoyukutri pinøkutchay, sre pupik pasramisrtrain cha”. Barcoyuiløpe isup køptø, Jonás maik taikwan maren, mur sre atrupikpe pasramisrik køn.

Jonás piu umpu más asentap yain kuintø yantø nø kuamik kuitamap isua Jeupawan miapik køn. Tru urastø, Jeupape kan nu peskau ørik køn, Jonáswan kuetchimøtø kepinap piñchai. Peskau umpu øsik wawa trenchipik køn: “Chu urastøkucha Jeupa ñi karuikwan møra martrap cha”. Inchen yantø pøn kualøm puraipensrø, peskaupe Jonáswan pirø pursrø wennik køn.

Jeupa Jonáswan kuamøntrai purukua, katøle Nínivesrømay intrai ørik køn. Jonás trusrømay ya, kaik misakmeran trentaik køn: “40 kualømmerayutø ik ciudawan Jeupa pinishintrap køn cha”. Inchen køremkeik purayaik køn, ninivitasmerape nømui kalø mariløyukutri wepampen, rey trentaik køn: “Tiuswan tømpasrøp puraampay incha kaløwan marmøtay, øyamaytøwai Tius namun kuetchimøntrun cha”. Inchawai nøm kalø marikwan isua mørik kui Jeupa ashape, pinishimuik køn.

Jeupape tru ciudawan pinishimupen, Jonáspe latrø trømpøik namik køn. Jeupa Jonáswanma lástima asha purukuik møren, nøpe Nínivesrø misakmeran lástima ashmøtø, ciuda wampiksrø kan calabaza tusr umpu srøtrøyu namik kui wantrap yaik køn. Inchen calabaza tusr køløpen, truikwan lástima asha Jonáspe namik kui møren, Jeupape trentaik køn: “Ñipe misakmeran kømø, tusrwan lástima asan. Nape ninivitasmeran lástima asikkutri patsøkømur cha”. Tiuspe kusrenanik køn Jonáswan tru misakmerape más nuwayelø kui ashchai.