Jeupawai ángelpe Ezequíaswan purømisrik køn

Asiriosmerape israelitasmerai diez tribuswan kanawa kekøtrik køn. Inchen Asiriasrø rey Senaquerib, tru Judásrø pa tribu køtrømisrøpikwan nuyasik martrap intikkutri, Judá ciudameran kan kan kekøtrap mentik køn. Inchentø Senaqueribpe Jerusalénwan tøkakøntrap isuinkucha, wetøpeñmuik køn tru ciudawane Jeupa purømisrøp pasraik.

Ezequías, Judásrik reype, Senaqueribwan nømun chi marmøntrai an nu pakaraik kuinkucha, Senaqueribpe nui ejérciton Jerusalénsrømay ørik køn. Inchawai, Jerusalénsrø misakmerape kørik kui inchip mentøpen, Ezequíaspe trentaik køn: “Kørik kui inchimøtay, nømpe murelø kuinkucha, Jeupape namune más murelø martrun cha”.

Senaqueribpe Rabsaquéwan ørik køn, Jerusalénsrø misakmeran intsap tsalø wamap trencha trashintrai: “Ezequías isa wamintikwan køremøtay, kakentø namui tasikukutrimpe ñimune ni Jeupaken purømisrmøntrun cha”.

Ezequíaspe Jeupawan purukutra cha miapen, Jeupape trentaik køn: “Rabsaqué maik taikwan kørik kui inchimøta cha, kakentø Senaqueribpe Jerusalénwan chikucha marmøntrun”. Inchen Senaqueribpe Ezequíaswan kilkamera trenchipik pøra ørik køn: “Yantø yaskapwan kuray, kakentø ñimune Jeupape purukumøntrun”. Inchen Ezequíaspe Jeupawan miaik køn: “Jeupa, tiusmanta namun purømisrtra, nøm tørtø nepua ashchai ciertonik Tiuspe ñitø kui”. Inchen Jeupape trenchipik køn: “Senaqueribpe Jerusalén ciuda umpupe kepunømøntrun kakentø nai ciuda køn cha”.

Senaqueribpe yantø kanarmap isuik køn. Inchentø kan yem, Jeupa nui ángelwan øra, Jerusalén wampiksrø 185.000 suldau asiriosmera warapelan kuetsin karuik køn. Senaqueribpe tru nui más mur suldaumeran kuetsik ashippe, yantø chi martrap kaima, katøle nui ciudasrømay yaik køn. Øyamay, Jeupape Ezequíaswan, Jerusalénwanpa purømisrik køn. Øyeek puraipen, ñipe Ezequías latawai, ¿Jeupawantø kørewa pasrapsruku?