Jeupape Jeremíaswan nuimpurap eshkantrai ørik køn

Jeupa Jeremíaswan lawa wesruik køn, Judá pirausrø kan Tiuswaiwan eshkapik køntrai. Incha truyu maya misakmeran nøm kalø marøp kuikwan lelatchai waminchap ørik køn. Inchentø Jeremíaspe Jeupawan trentaik køn: “Nape katøkucha kan matsinøtø kuikkutri misakmerai metrap waminchap kaimapik kur cha”. Jeupape nun trentaik køn: “Kørik kui inchimøta, ñi chi wamintamikwan ñun purukutrumøn cha”.

Jeupape Jeremíaswan trentaik køn: “Tru Jerusalénsrø metrap pera aship pøntrapelan tuluntsunin karua, nømui metrap kan pirø køtsøn pusha, Jerusalénwan øyeektøwain puraintrun cha kenamartrik cha”. Inchen Jeremías treekwan maren, tru metrap pera aship pøntrapelø latrø trømpøik namøpen, kan sacerdote Pasjur munchi taik Jeremíaswan icha, kan cepo tsiktøka mariku nui tasikmeranpa, nui srøpmeranpa trak kantø kekuana pasrikkutri, Jeremíaspe yem ørøpa kønøntrap kaimaik køn. Pasjurpe katø kualøm intrai elachen, Jeremíaspe trentaik køn: “Yantø kaimar. Jeupawaimpurap yantø más waminchap kaimamøntrun cha”. Inchentø treek marmøtø, tsøntatø isua trentaik køn: “Jeupa eshkantrai karuiløpe nai umpu kan nak lataik pasraikkutri, nuimpurap wamintamikwan elachimumøntrun cha”. Treekkutri, Jeupa maik karuikwan misakmeran eshkaik køn.

Yam pilamera puraipen, kan srø rey Judeasrø karup pølpasrik køn. Sacerdotesmerapa, isa kusrenanøpeløpa Jeremías wamintikwan tsalø kui asikkutri, príncipesmeran trentaik køn: “Ik møkwanke kuetsamik køn cha”. Inchen Jeremíaspe trentaik køn: “Nan kuetchip kualømpe kan sølkantø møkwan kuetchun, kakentø na wamintikpe nainukkutrin kømøtø, Jeupawainukkutri atrupik køn cha”. Inchen tru príncipesmera ikwan mørape trentaik køn: “Ik møkwane kuetchimumik køn cha”.

Jeremíaspe Jeupa maik karuikwan katøkucha waminchip ipen, príncipesmerape latrø trømpøik nama, reywan tru Jeremíaswan kuetchain chipen, reype trentaik køn: “Ñim chi marøk køpen maray cha”. Treekkutri, kemøra kan latrø umpu trap chilliku kekuchen, Jeremíaspe lamø lamø chillik umpu kepip yaik køn.

Inchen rey wainuk kan karuintik mekapik Ébed-Mélec munchi taik reywan trentaik køn: “Príncipesmera Jeremíaswan kan latrø umpu trapyu kekutsik waikkutri, malla wesramupene kuantrun cha”. Inchen reype Ébed-Mélecwan trentaik køn: “30 møkelan pera ya Jeremíaswan wesruy cha”. Jeremíaspe manaken Jeupawaimpurap eshkamikwan lelachimuik køn. Namkucha Jeremías latawai maramik køn.