Jerusalénwan pinisaik køn

Judásrø Tiuswai misakmera Jeupawan wentøpasra, tasiktøka marilø pek tiusmeran adorap mentøpen, Jeupape nømun purukuntrap Tiuswaiwan eshkapelø yam ørinkucha, nømpe mørmøtø intsatø mørik køn. Jeupa taska marik tiusmeran adoraikwan patsøkøntrap chi martrap kuikwan ashkun.

Nabucodonosor, Babiloniasrø rey, nu pirømeran nømuyasik martrap kekøtrap ampik køn. Incha Jerusalénsrø pua, rey Joaquínwan, príncipesmeran, kuayapelan, artesanosmeran, tru temployu tesorosmerankucha Babiloniasrømay srua ampik køn. Incha Nabucodonosorpe, Sedequíaswan Judásrø rey køntrai wesruik køn.

Pølpasrøptøpe rey Sedequíaspe Nabucodonosorwan møra marøp mekapen, isa kusrenanøpeløpa, pøtøkatan warapeløpa trentaik køn, tru Babiloniasrø reywan mørmøntrai cha. Inchen Jeremíaspe trentaik køn: “Ñi mørmup kualømpe, Judásrø kuamik pup, parø atrup, kuantrømera puntrun cha”.

Ocho pilamera puraipen, rey Sedequíaspe tru Babiloniasrø reywan møra marmøntrap, Egiptosrø ejérciton purukutra cha miaik køn. Inchen rey Nabucodonosorpe Jerusalénsrø kuayantrap kepipen, Jeremíaspe Sedequíaswan trentaik køn: “Jeupape trentan: ‘Ñi kuayamupene, ñipa, Judásrø misakmerapa øsik puraamtrun. Inchen ñi kuayap kualømpe, Jerusalénwan pinisha ñune srua amtrun chaʼ”. Inchentø Sedequíaspe mørmuik køn.

Kan pila mentra puraipen, Babiloniasreelø tru Jerusalén pøtøkatan sruk pantrikmeran kanpalø mintisha, trupurap kepampa, tru ciudawanpa templonpa patra, latrø yam misakmeran srua ampik køn.

Sedequíaspe Jerusalénsrønkutri trupa welulen, Babiloniosmerape wentautø ampa Jericó pulusrø metrøtrawa, Babiloniasrømay srua ampen, reype Sedequíaswan nui nusrkalan maik kuetsikwan asinkaruik køn. Inchen nune kapkeik mara, pishirai yau kuantrai kekutsik køn. Inchen Jeupape israelitasmeran ikwan martrap misrik køn: “70 pilamera puraipen, katøle Jerusalénsrømay pera yamøntrun cha”.

¿Matsørelan Babiloniasrømay srua ampikkutri chi purayaik kera? ¿Jeupawan mentamisrmø pøntrapsru chintera?