Ester nui misakmeran kuetchimøntrai purømisrik køn

Esterpe Judeásrik srusrø kuik køn Persiasrø kan ciuda Susa taiksrø tsupik. Latrø yam pilamera wentausrø nui yawelane Jerusalénsrønkutri Nabucodonosor srua atrik kuik køn. Esterwane nui lenuchak Mardoqueo nuranik køn, tru Asuero Persiasrø reywai karuntik mekapik.

Rey Asuerope nuyasik katøkan reina lap mentikkutri, nui karuintik melapeløpe Persia pirø ørø latrø tap ishumpurmeran lawa srua ampen, tru utu Esterkucha pasraik køn. Yam ishumpurmera kuinuk reype Esterwan lawa wesruik køn nui reina køntrai, inchawai Mardoqueope Esterwan trentaik køn Judeasrik kurchape eshkamøntrik cha.

Hamán Persiasrø príncipesmeraim pala aship karup pasrapik latrø nuik kurmap isupik kuikkutri, misakmera nun utsøpasra tømpasrtrai inchipik kuik køn. Inchentø Mardoqueope tømpasrmuikkutri, Hamánpe namik kui møra Mardoqueowan kuetchap isuik køn. Inchawai Mardoqueo kan judío kui wam mørape, Persia pirø ørø maya judíosmeran patsøkøntrap isua reywan trentaik køn: “Judíosmerape latrø kaik misakmera køn mayelan kuetsamik køn cha”. Inchen rey Asuerope trentaik køn: “Ñui isuinuk mumay tap køpen treekwan mar cha”. Inchawai, Hamánwan kan kilkayu trenchipik pørinkaruik køn: 13 kualøm adar pølwai maya judíosmeran patsøkamik køn chip. Inchentø Jeupape kutike asha waik køn.

Esterpe katøkucha trupurap wetøpeñmuikkutri, Mardoqueope tru kilkawan copia wesrawa øra trentaik køn: “Tru reypa waminchi cha”. Inchen Esterpe trentaik køn: “Rey nø aship wamømupentø ashchap ipikpe kuamik køn cha. Inchen reype nan wamømuik kan pølken køn, treek kuintøkucha ka yamøntrun. Rey nø aship karup waik pørøtsik srua kuikwan naimay kusrua kuana eshkapene kuamumøntrun, treek marmupene kuamøntrun cha”.

Esterpe rey nø aship karup waik yaketasrømay ashchap ipen rey nepua ashape, nø aship karup srua waik pørøtsikwan nuimay kusrua kuana eshkawape chinchap atruku cha payen, Esterpe trencha løtapik køn: “Ñipa Hamánpa tiusmanta amtrumtrake ñimuyasik mamik nenar cha”. Tru map putrainuk, Esterpe katøkan kualømkucha map puraamtrap cha eshkapen, tru kualøm reype Esterwan ñuimpurap chi maramø cha payen nøpe trentaik køn: “Nanpa nai maya misakmeranpa mukøsrøn kuetchap intan, tiusmanta purømisrtra cha”. Reype mutren kuetchap inta cha payen, Esterpe trentaik køn: “Ik latrø kaik møk Hamán køn cha”. Reype namappe Hamánwan tru urastø kuetchain karupik køn.

Inchentø Hamán kilka marikwane ni reyken lliskøntrapkeik kuikkutri. Mardoqueowan, príncipesmeran nø aship karup pasrøntrai mara, katøkan kilka pørinkaruik køn trenchipik: “Judíosmeran kuetchap lapen, nømui øsik amønaikwan purømisrtrap nømkucha kuayamik køntrain cha”. Treekkutri, 13 kualøm adar pølwai judíosmerape nømun tsalø ashipelan kanaik køn. Truyukutri, pilamørik tru kualømwan kasrak isup puraampupelø kuik køn.