Danielpe leónmera putrainuk waik køn

Darío Medo Persiasrikpe Babiloniasrø katøkan rey kuik køn. Danielwan latrø tap kui asha, nøtrø kusrepelai metrap karup pasrøntrai wesruik køn. Inchawai tru møkelø kusrepeløpe Danielwan tsalø kui aship menta, kuaimpemap isup mentik køn. Daniel mawayu pøn piejes Tiuspa waminchipik kui ashipelø kua, Daríon trentaik køn: “Purø tap rey, misakmera ñuntø miantrai chipik pøra tratramtik køn, inchen ikwan møra marmeløpe leónmera putrainuk kepusrilø køntrain cha”. Daríope truikwan tapik kui asha, firmaik køn.

Ikwan nepua asha Danielpe, nui yausrø ya pentanan kura, Jeupawan miap wapen, nui tsalø ashipelø treekwan asha, luløp ampik køn Daríon trencha eshkantrap: “Danielpe ñun møra marøp pasrømøn, kakentø mawayu pøn piejes nui Tiuswan miapik køn cha”. Daríope Danielwan tap kui asikkutri, nun kuetchimøntrai kualma isup purayaik køn, chi maramtik køtashchap Danielwan kalø pumøntrai, inchentø chiken martrap kaimaik køn, kakentø chap firmaik pasraikkutri. Inchawai, Danielwan leónmera putrainuk kekutsam puik køn.

Tru yempe, Danielwan isuptø Daríope kintrap kaimaikkutri, tøtrapentø nøpe Danielwaisrømay ya pinaashape trenchipik køn: “¿Daniel ñui Tius purømisrita?”.

Inchen Daríope trentaik mørøpik køn: “Jeupawai ángelpe leónmerai trikwan kasraikkutri nan chikucha marmøtan cha”. Daríope trupa kasrarawa, truyukutri wesrantrain karuik køn. Danielpe truyukutri wepatruppe, chiken køtrømtimíik wepatrupen, reype tru Danielwan tsalø ashipelan truyutøwai kepusren, leónmerape tru urastø chap maik køn.

Daríope nui misakwan trencha karuik køn: “Mayeløpa Danielwai Tiuswan kørikpala pøntray, kakentø nune leónmerai utukutri purømisrik køn cha”.

¿Ñikucha Daniel latawai Jeupapa kualømmørik waminchipik køtitru?