Pirø pantriku kan eshkapik pørin pasran

Yanayupe Babiloniasrø Belsasar aship karup pasramisra, kan yem mil misakmera kusrepelayasik fiesta mara, tru Nabucodonosor Jeupawai templosrønkutri orotøka marik pasusmera srua atrilan trantrap øra, nui lincha amtrupeløpa truyu vinomera muchip, nømui tiusmeran adorap kuik køn. Tru urastø kan møkwai tasik kenamisra, ya umpu sruk pantriku køremkeik pørøp mentik køn.

Belsasarpe køtrø kuara, magia kusrepelan wama trentaik køn: “Møikkøpen ik wammeran chi kui eshapikwane, Babiloniasrø latrø nuik kømikwan utøntrun cha”. Inchentø møikken ik wammeran chi kui eshkantrap kaimapen, reinape atrua trentaik køn: “Kan møk Daniel munchi taik Nabucodonosorwai piailan, nø chi kui asimelan tørtø eshkapik, ik wammerankucha chi kui eshkantrun cha”.

Danielpe reywan ashchap ipen, Belsasarpe trentaik køn: “Ik wammeran lewa chi kuikwan eshkapene, kan ilik orotøka marikpa Babiloniasrø latrø nuik kømikwanpa trantrumøn cha”. Inchen Danielpe trentaik køn: “Nape ketilane utømumøntrun. Inchentø ik wammera chi taikwane eshkatrumøn. Ñui møskai Nabucodonosor latrø nuik kurmap isuikkutri Jeupape mantø køtrøtik kømikwan kenamarik køn. Inchentø ñipe nun chi purayaikwan nepua asinkucha Jeupawan kørikpala pasrømuik kenamaran, tru nui temployu orotøka marik pasumerayu vino mutsikkutri. Inchawai Tiuspe ik wammeran pørik køn: MENÉ, MENÉ, TEQUEL incha PARSÍN. Ikpe eshkan tru medosmerapa, persasmerapa Babilonian pinishipen yantø ñipe rey køntrap kømui”.

Babiloniasrø kepampamikpe latrø murik kuik køn. Kakentø ciuda pøtøpørap latrø nøtrø sruk pantrikmera tøkaik incha pulu latrø nu pi purep tsupik kuikkutri. Inchentø tru yemtøwai medosmerapa, persasmerapa Babiloniasrø kepampik køn. Persiasrik rey Ciro taik piwan pekpurap øra, nui ejérciton yaskapsrønkatik amtrai marik køn. Trusrø pupen yaskapmerape kurin pøntraik ashape, suldaumerape kepampa ciudawan metrøtrawa, reywane kuetcha tru uraskutri Babilonian Ciro nø aship karup pasramisrik køn.

Srøtø pilayu, nø aship karup wainuk Cirope trentaik køn: “Jeupape nan trentan: ‘Jerusalénsrø nui yawan katøle martrap møikkøpen judíosmera purukuntrap amtrappe ampay chaʼ”. Inchawai latrø nu misakmera katøle ampik køn, Jerusalénwan pinisaik 70 pilamera puraipen. Øyamay Jeupa martrap misrik treek puik køn. Trektøwai, Cirope Nabucodonosor tru Tiuswai yaukutri orotøka, antøka marik pasumeran srua atrilan katøle tranarik køn. ¿Nepua ashtitru mantø Jeupa nui misakwan purukuntrap Ciron lawa wesruik kui?