Jesúspe pi wesruim pulu kan ishukpa waminchip wan

Pascua puraipen, yanasrø Jesúspa nui kusrenanøp pera uniløpa Galileasrømay katø amtrua, Samariasrø Sicar taik pueblo pulu pupelø køn. Jacobwai pi wesruik marim pulu Jesúspe israp wamisren, nui kusrenanøp pera uniløpe ciudayukutri wepampa, mamik penantrap ampupelø køn.

Inchen kan ishuk Samariasrik pi wesrantrap atrupen, Jesúspe trenchipik køn: “Pi srøttra”. Inchen ishukpe paipik køn: “¿Ñipe judío køpentø na Samariasrikpape chinchap waminchiku? Kakentø judíosmerape samaritanosmerapape linchimeelø køn cha”. Jesús trentaik køn: “Ñi na mu kui nepua ashipik kuimpe pi srøttra chipsruintrun, inchen nape manaken kølømø piwan srøtrøpsruintrun cha”. Ishukpe paya mørik køn: “¿Chincha trenchiku? Kaken ñipe piwan chitøka wesramik chikaaik wan”. Jesúspe trentaik køn: “Møikkøpen ik piwan muchipikpe katøyu pimulkwai mørmøntrun”. Inchen ishukpe trentaik køn: “Tru piwan srøttra cha”.

Jesúspe trenchipik køn: “Ñui kekwan wamøntrap intrø”. Ishukpe trentaik køn: “Nape kek chikaaik kur”. Jesúspe trenchipik køn: “Ñipe sølwain tan, kakentø ñipe trattrøkatø kelø tøkaik køpik køn. Inchen møya tøkakuikpe ñui kek kømøn cha”. Ishukpe trentaik køn: “Au, kasuku, ñibe Tius maig karuigwan eshkabig treeg møg kømmørgø cha. Namui merrabsreelø samaritanosmerabe i tunyu Tiuswan køriibala tabig waminchibelø køben, trune ñim judíosmerabe Tiuswan Jerusalénsrø treeg martrab ambamig køn chibelø køn […]. Mesías attrab kui, nabe asha kur cha (tru Cristo taig). Truig arruppe, namune maig kuigwan kerriguba tørgandø eshkanrrun”. Inchen Jesúspe trenchipik køn: “Mesíaspe na kur”.

Ishukpe nui ciudayu samaritanosmeran eshkantrap lula trenchipik køn: “Mesíaswan wetøtrar, na maik marilan ketriku eshkatan. Ashchap amtruy cha”. Inchen misakmerape nøpa pi wesruiksrømay ampupelø køn, Jesús kusrenanikwan mørtrap.

Samariasreeløpe amtruape, Jesúswan nømpa køtrømisr chip trupa rukapen, nøpe pa kualøm nømpa køtrømisra latrø nu kusrenanen, Jesúswan yamelø kørepelø køn. Nømpe samariasrø ishukwan trentaik køn: “Nambe namashib nun møra, isa kømø, i møøbe yu pirau misagwan Kaigyugurri Wesrabig kuin kui aser— cha”.