Jesús marampurap marilan marik køn

Jesúspe yu Piraumay atruppe, Tius Nø Aship Karup Waikwaimpurap tap srø wamwan kusrenantrap atrik køn. Jeupape Jesúswan marampurap marilan martrai espíritu santon tranikkutri, wentøsrø rey misra chi martrap kuikwan kenamarik køn. Chu ipentøkucha kuantrø tøkarmera purukutra cha miapen, purukupik kuik køn. Kapkarpe ashen, kalukarpe møren, amtrap kaimapeløpe ampen, møilø kewa kuikwantø katørawatø tap køtrømisrøpelø kuik køn. Trektøwai kuaimantsikmeran wepusrøp. Chu ipen misakmerape wentautø ampen, nøpe munken wentøpasrmuik køn, nøtø pasrøntrap isuintøkucha.

Kan pieje, kan møk kønøntrap kaimapikwan muta pupen, mentra misak køptø Jesúswaim pulukatik kemallchap kaima, tru nø pasraim pala kan trap kura, tru trapyu kuantrikwane kan tsikalyu køtrørøpelø køn. Inchen Jesúspe tru kuantrikwane trenchipik køn: “Ñui tsikalwan muta kutra intrø cha”. Inchen kutrappa ipen mayeløpa kuara ashipelø køn.

Katø kualøm Jesúspe kan puebloyu puntrap ipen, diez møkelø asru trerap kuantrø tøkar wetrua trenchip trashipelø køn: “¡Jesús, purukutra chip!”. Tru urassrømpe, øyeek kuantrø tøkarpe misakmeran kemalamik kømuik køn, kakentø Jeupa martrai karuiløyu trenchipik kuik køn, tru kuantrø puraipentøwai Tiuswai yamay ampamik køn cha. Inchen Jesús trusrømay ampay chipen, møikkøsrøn nun chish misrin kui ashape, Jesúswan unkua cha Tiuswan trupa tapik waminchipik køn, diezelø kuinuk kantø katø llirawa atrua Jesúswai metrap tømpasra unkua taik køn.

Kan ishuk doce pilamera mur kuantrø tøkaik kua más awentantrap kaima, puraintrai isuikkutri misak utu Jesúswan kemalla, nui kewa kuikwan kemøren tamisrik mørøpik køn. Jesúspe paipik køn: “¿Nane mu katørah?— cha”. Inchen ishukpe kørik kuintøkucha Jesúswan kemalla chishtø eshkapen, nøpe trentaik køn: “Nimbasr, [...]. Chi isumø, inrrø cha”.

Kan aship karup wapik, Jairo taik, Jesúswan trenchipik køn: “Nai yamay amø, kakentø nai nimpasrchik latrø mur kuantrø tsun cha”. Inchentø Jesúspe trusrø pumuatø tru Jairoi nimpasrpe kuain køpik køn. Jesúspe trusrø pua, latrø nu misakmera kiship pøntraik ashape trenchipik køn: “Kishmøtay, kakentø kiptø tsun cha”. Incha ishuk-unai tasikwan kemøra trenchipik køn: “Ishuk-unø kutrø cha”. Ishuk-unøpe kutraptinchen Jesúspe nui møskalan mamik srøttrain karupik køn. ¡Ñiken isu, møskaløpe mantø kasrak mørøraik kuintrun!