KUSRENANIK 80
Jesúspe doceelan nøaship karua ørilan lawa wesruik køn
Jesúspe kan pila tøpøtak Tiuswai wamwan kusrenanøp uña, nøpa más trak lincha kuallip pøntrøntrai, kungregasiunwan metrap pera ampup pøntrøntrapelø lawa wesramik puik køn. Ikwan martraptø, Jesúspe nøtø kan tunsrømay yaik køn, yem ørøpa Jeupawan purukutra chintrap. Katø kualøm, Jesúspe nui kusrenanøp pera unilan tuluntsuna, tru utukutri doceelan nøaship karua ørilø køntrai lawa wesruik køn. ¿Tru munchimeran nepua ashipik køtitru? Ilø køn: Pedro, Andrés, Santiago, Juan, Felipe, Bartolomé, Tomás, Mateo, Santiago Alfeowai nusrkai, Tadeo, Simón trukutri Judas Iscariote.
Andrés, Pedro, Felipe, Santiago
Doceelø Jesúspa lincha amøñipen, nøpe Tiuswai wamwan mantø eshkamikwan kusrenanik køn. Srapepe nømtø kusrenantrap amtrain karupen, Jeupape marampurap marikwan tranik køn, kuaimantsikmeran wepusrtrai, kuantrø tøkarwan tamartrai.
Juan, Mateo, Bartolomé, Tomás
Docen nøaship karua ørilø Jesúswai latrø tap linchipelø kuikkutri, nøpe tap purukup pøntrøntraitamap isupik kuik køn. Fariseosmerape nøaship karua ørilan chikucha kømeelø kui isupen Jesúspe treek ashmíik kuik køn. Kakentø nøpe tap kusrenanøpelø køntrai tamarikkutri. Nømpe Jesúspa latrø tap utømerayu pøntrøntrap kuik køn, nø kuamuatø trukutri nø katøle øsirapen. Møiløpe Jesús latawai Galileasreelø køpen møiløpe kasharawar kuik køn.
Santiago Alfeowai nusrkai, Judas Iscariote, Tadeo, Simón
Jesús nøaship karua ørilø sølkantelø kømuikkutri kanmaywane pellipelø køp, tap isumø waminchip, kalø marøpelø køp, tsøntatø munirameelø køp, møik más nuik kuikwaimpurap alekiapelø kuik køn. Inchentø nømpe tammayelø køp Jeupawan untarapelø kuik køn. Inchawai Jesús yantø srømpalasrømay ipen, nøm køntrapelø kuik køn, Cristoi kungrekasiunwan metrap pera pøntrøntrapelø.
“Nabe ñimune masken nai trendø tab lincha amøñibelø cha wamar chibig køn, kaguende nabe nai Møskawan na chi møriilane ñimune kerriguh eshkab kenamarikkurri” (Juan 15:15).