Jesús Nu Tunyu Wamisra Kusrenanøp Wamintik

Docen nøaship karua ørilan chap wesruape, Jesúspe kan tunsrø køtraaya latrø nu misak pasraiksrø pupen, trusrømpe Galileasreelø, Judeasreelø, Tiro, Sidón, Siria incha Jordán pi ampøkatøsreelø amtrua pøntraik køn. Misakmera kuantrø tøkarwan, kuaimantsikmera tøkarwan srua amtrupen, Jesúspe mayelanpa chap tamarape, kan tun pala wamisrik køn, tru Tiuswai tap linchipelø køntrappe chi maramikwan kusrenantrap. Nampe kuenta tøkakømik køn Jeupawan latrø nu palailø køp, nun untaramik kuikwan. Inchentø misakmeran untaramuape Tiuswane untaramkeik køn. Inchawai mayelan tammayelø kømik køn namui tsalø ashipelanken.

Jesúspe trentaik køn: “Tap linchipelantø untaramøtø namun tsalø ashipelankucha untarap, mantraukutri kalø marilan pesannamik køn cha. Inchen møikkøpen ñipa namøpene tru urastø kalø marilan pesannatra chintrap yamik køn. Ñimuimpurap katøkanelø tapelø martrai isupelø kuikkutri ñimkucha trektøwai maramik køn cha”.

Jesúspe nam chi tøkakuilaimpurap latrø tap wammera keta trentaik køn: “Más latrø nuikpe Jeupapa trak lincha pøntramik truik køn, an tøkakømik lataken kømø, kakentø kan nilikma ñui anwan nilinkucha, Jeupapa trak lincha pøntraikwane muken nilømøntrun cha. Inchawai mamikwaimpurap, kewa kømikwaimpurap mentra isumumik køn. Masken illinchelaimpurap isu, chu urastøkucha Tiuspe nømun mamiktøka køntrai tranikwaimpurap. Ñi maya isuinkucha ñui øsik unikpe yana kømøntrapik køn. Ikwan tørtø tøkaku: Jeupape nam chi palaik kuikwan chishtø nepua ashipik køn”.

Misakmerape manaken møra kømuik køn, Jesús latawai wamintikpe. Kakentø religiónyu perep pøntrapeløpe øyeek kusrenanmeelø kuikkutri. ¿Chintimpa Jesúspe latrø tap kusrenanøpik kuik kera? Kakentø nø chi kusrenanikpe Jeupawainukkutri atrupik kuik køn.