Director general Salud Públicawaimpurap ashipik Estados Unidossrik eshkan redes sociales matsørelan mintishipik kui l ¿Biblia manchipik kø?

23 de mayo 2023wai, Salud Públicawaimpurap mas kusrepik Estados Unidossrik eshkan, redes socialespe matsørelan latrø nu mintishipik kui.

• “Redes socialespe matsørelan kape urekmeran chiyupe purukuintrun pero chikøpen purayainukpe eshkan redes socialespe nømui isupikwan, nømui øsik amønaikwan ka mintishipik kui” (Social Media and Youth Mental Health: The U.S. Surgeon General’s Advisory [Las redes sociales y la salud mental de los jóvenes: Informe del director general de Salud Pública de Estados Unidos], 2023).

Ik wammørø eshkaikpe eshkan ik purayailøpe latrø isuintik kuik køn:

• Matsørelø 12 pilamera tøkar 15katik tøkarpe “kualømmørik pøn urakatik redes socialesyu celularyutø melapeløpe mas fácil køntrun nømui isupikwan mintisaik kømik depresión kui kape ansiedad kui tøkakømik”.

• Incha 14 pilamera tøkar kui utøpelane, “kiamikwanken trupishipelø køn, trømpøik martrap isupelø pørinap metin kui incha naasiktøwai tap ashmumikkucha incha depresión traninantrapiku mas kullaakelø tru ishumpur utu mas køn”.

¿Møskaløpe chi martrera nømui urekwan øyeek trømpøikyu kekøtrømøntrai purukuntrap? Bibliape tap wammera tranøpik køn.

Møskaløpe mantø purukumik

Nøm chikøpen martraintø lelachimøta. Srøtø isu ñui nusrkai redes socialesyu chiyutø trømpøiku kepeñchaptik kuikwan trukutrimpe øyeekwan tøkakøntrai martrapte cha isu.

• Bibliape trenchipik køn: “Ñun unan mømaypurap yamikwan kusrenan” (Proverbios 22:6).

• Ikpurap mas nepua ashchappe ik pørin kilkawan leu “¿Deberían mis hijos usar redes sociales?”.

Inchen redes sociales ñui nusrkawan tøkakøn karuwape trømpøikyu kepeñmøntrai ashiptø mekau ke ka køpashmøtø. ¿Ñipe mantø martrap?

Trømpøikwan ashmøntrai ashiptø mekau. Incha redes socialesyu chi trømpøik kenamisrøpik kuikwan ashmøntrai kusrenan incha kekøtrømøntraimpa.

• Bibliape trenchipik køn: “Ñimbe ñimui utube, møgueløba, ishumburmeraba chigøben trømbøig maramigwanba, katø chinetø køsøngønrrapteelanba, katø chiwandøgucha ke chinchimmørø inchib parø indamigwanba, øyeelane mørøguen wamincha mørmumig køn […]. Mørøbguen møramgaig wamincha ashib pønrrømøwei, chugúinguen mørmubendø wamincha mørmøwei, trømbøig wamindamgailan wamincha indza mørmøwei indamig køn” (Efesios 5:3, 4).

• Tap wammera wetøtrantrun ik pørin kilkamerayu “Enséñele a su hijo adolescente a usar con seguridad las redes sociales”.

Chukatik pumikwan tør mar. Por ejemplo, tør mara pasr mana incha chu uraskatik redes socialesyu kepasramikwan.

• Bibliape trenchipik køn: “Isuamøra amønay ñim mandø amønamigwane. Kan chugúinguen mørmeelø lataig amøñimøtø, maig amønamigwan tab isuamøra amøñibelø kuy. Chigøben tabig maramdiig pubene, treegwan ka purainrraindø ashatø pønrrømøtay” (Efesios 5:15, 16).

• Ñui nusrkaimpa ik videuwan asay “Pulø tableroyu pisilø kønapelø” yu Redes sociales tøkaik kuape ashiptø katørau taikwan, redes socialesyu chukatik puikwan chintimpa tapik kuikwan nepua ashchai.