¿Køntsø mutsikpe kalø kø chintera?

Biblia chi taikwan

Bibliape kesriwane waminchimíik køna, Bibliape køntsø muchip kape kesrilane waminchimíik køn. Inchento Bibliayu trenchipik pasran asrwan mintishipikwane Tiuspe kaashipik kui. Trekkutri nøpe køntsø mutsikwane kalø kui asan.

• Namui øsik unikwan untaramik. Tiustøwain køn “mayeelan øsig kømigwan tranøb, israb amønamig kønrrai tranøb” inchipikpe (Hechos 17:24, 25). Trupe namui øsik unikwan Tius keta tranik køpene, chikøpen mara ashmumik køn namui asrwan mintishintraptikwane, por ejemplo køntsø kesrikwan. Køntsø kesrikkutri Pirø ørøpa misakmera nu kuapkøn.

• Katøkanelan untaraik. “Ñima ñiasiitøwei maig undaguig køppe, ñui mendaigwangucha treetøwei undaaramig køn” (Mateo 22:39). Mukøpen misak utu køntsø muchip wapikpe untarapik kømui kenamaran. Misakmera nakish køntsøwan itrø mørøpeløpe kuantrø misrtrun køntsø muchipik lataitøwai.

• Chish køntrai. “Ñimui asrmeran kan øsiguig keta tranøb lataig Tiuswan keta tranay cha, Tiusweindø kønrrai tarømarig, nuin kabyu truba tab kui asig, treekke” (Romanos 12:1). “Namui asru lata, namui espírituyu lata, kaig marig køsøngønrrapteelan kerriguwan chish misrkun, Tiuswan køriibala pønrraigu kerriguwan nuindø newan tabelø kønrrab” (2 Corintios 7:1). Trupe, køntsø muchene chishelø køntrap kaimantrun, køntsø muchipeløpe nepua ashipelø køn nømui asrwan mintishipelø kui.

¿Maik køtashchaptø marihuanan kape katøkan kesrilan kesramikpe Bibliape manchipik kø?

Chukucha Bibliayupe waminchimíik køn marihuanaimpurap, kesrilaimpurap. Inchentø Bibliayu pititø pøriløyu kenamaran truilan marmumik. Inchen Bibliayu pititelø kenamarik wentau asilampa, trektøwai ikwan tsøntatø isumik køn:

• Namui isupikwan tap tør tøkakømik køn. “[Jeupa] ñui Tiuswane [...] kerrigu ñui turtøga isumburab isuitøgaba undaaramig køn” (Mateo 22:37, 38). “Tab isua, tab asha maray” (1 Pedro 1:13). Misakmera kesrapeløpe nømasiktøwai newan isumelø køn, inchawai mas kepasra lelachap kaimapelø køn. Nømui isuinuk kesramelantø isupelø køn incha, chikøpen tapelane isumelø køn (Filipenses 4:8).

• Karup aship pøntrapelan møra maramik. “Misagwan ashib karub purrabelan lata, katø chi maramigwan martrai karub purrabelan lata, truilø maig chiben [treekwan møra maramik køn]” (Tito 3:1). Trupe, pek pirausreløpe kesramikwan marpashmelø køn. Tius namun tap ashchaimpe aship karup putrapelan møra maramik køn (Romanos 13:1).