1 Chi atrinkucha pailø pøntrainuk tarømisrmø

¿CHI KERA?

Pailø pøntrainuk nømtelø kurmap isua pøntrømøn chi atrinkucha mur pøntramik køn, treek marape kasherawa pøntrainuk purø tapik kui asha manakatikwai køntrai martrun. Nømtøwai tap amønamik køntrun chi purep atrintøkucha manakatik pailø pøntrøntrun.

Møiløpe pailø pøntrainuk nakchak umpu yawelø kape linchipelø tarømisrmøntrain chipen, truikwan møra pøntran. Treek kømø, pailø pøntrainukpe tarømisrmøntrai purukuntrun ampukutri ikkutri kørikpala untaktøka pøntramik.

BIBLIA ESHKAPIK KØN: “Inchen keebe nui srawane tarømisrøb kutsamig kømøn” (1 Corintios 7:11).

“Chi atrinkucha mur pasrapikpe pusrkai mørmøntrun. Katøkanpurappe, kalø marilan mur kui isumøntrun. Chikøpentø kailø puinkucha, kalø marikwan pesannamik mur kui isumøntrun. Chikøpentø kailø pup atrupen ñipe lamøtelø kui ashchun, chi tarømisramkei” (Micah).

¿CHINCHAKUTRI IKWAN MARAMIK KØ KASHERAWA PØNTRAINUK?

Pailø pøntrainuk kasheraikwan manakatiwai kui ashmuinkatikpe, chikøpentø tap kømelø pupen, “kanikkutri kanikkutri ñipa lincha pasramikpe kømui køn” chip isupelø køn. Trutø kømø, kasherawa pøntrapeløpe chikøpentø mara tarømisrtrap inchun.

“Møilø misakmerape chikøpentø tap kømelø pupene kasherainuk katøle tarømisrtrap isua marøpelø køn. Ñim truikwan asha marape, kasherawa pøntrainuk cierton manakatikwai kui nepua ashmøatre martrun” (Jean).

¿CHI MARØPSRUKU?

ÑITØWAI PAYA MØR

¿Ñim pailø kuayawape chi martrap?

• ¿Kasheramuinkenmap isupik køtitru?

• ¿Katøkanpa uñipe maik køpsruermap isupik køtitru?

• ¿“Napekkucha yamøntrun” kape “katøkan mas untarantraptikken lamøntrun” chipik køtitru?

Ik paílan møilankøpen øn cha løtape, kasheraikwan manakatikwai kui ashchappe mur trantramik køn.

PAILØ MISRA WAMINTAY

• ¿Kasheraikwan manakatikwai kui ashmupra chinta? Treek køpene, ¿chinchakutri?

• ¿Kasheraikwan manakatikwai kui ashchappe chi martrap?

IKWAN MARTRAP ISU

• Kan kilkayu ñui untakwan kenamartrap tap wamchelø pør.

• Ñi kuallip uniksrø fotos srua uñ.

• Ñui srawan kape ñui kekwan ñi kuallip uniksrø celularyu wamø, kape chinchakøpen peksrømay yamik nepupenkucha wamø.

BIBLIA CHI TAIKWAN: “Tius kandø mara lindisaigwane møøbe tarømaramig kømøn” (Mateo 19:6).