Jacob latrø tapikwan utik køn

Isaacpe 40 pilamera tøkakuik køn Rebecapa kasharap uras. Nøpe nun latrø nu untarawa yanayupe gemelosmera tøkamisrik køn.

Mayor nusrkaimpe Esaú munchi kuik køn inchen wentikpe Jacob. Esaúpe kaumpu unamik, ushameran pasrara kemøramik kustaik køpen, Jacobpe más yau wamik kustaik kuik køn.

Tru urassrømpe møskai kuapen mayor nusrkaimpe nui nunelø lataken kømø pirømerapa, anpa más utap, Jeupa Abraháwan trantrap misrikwankucha utamik kuik køn. Inchentø Esaúpe Jeupa trantrap misrikpe chikucha kømui isupen Jacobwaimpe sí latrø nuway kuik køn.

Kan pieje Esaú kaumpu ushameran pasrarøp uña latrø muraraaik pupen, Jacob latrø may nenøp waikwan itrø mørape trentaik køn: “¡Latrø køtrø parø køtan mallatø ø pikø mamikwan srøtra cha!”, inchen Jacobpe trencha løtapik køn: “Mamikwan wekala srøsrmuatø ikwan martrap misrtra, namui møskai ñun keta tranamikwan nan trantruntrik ik mamikwan ñun srøtrimpurø”. Inchene Esaúpe trencha løtik køn: “Nai møskai nan keta tranamikpe møimpe nane chiken servimøntrun møimpe ka parø køpiktø køshi, ñi srua køtrømisr”. Esaú øyeek marikpe chiken tap kømuik køn kakentø tru Jeupa Abrahánwan latrø tapik trantrap misrikwan utamikwan kan mamikpatø yunømarik køn.

Yantø Isaac køllikchik misren, tru mayor nusrkawan latrø tapikwan utamik pupen, Rebecape nui srape nusrkai Jacobwan keta tranamikwan nø utøntrai purukuik køn. Inchene Esaú treek purayaikwan wetøpeñape latrø køtrø nama nui nunekwan kuetchap isup mentik køn. Treekkutri, Isaacpa Rebecapa Jacobwan chi puraimøntrai trentaik køn: “Mallatø intrø, ñui tiu Labánwaisrømay, tru ñui usrai nuchakwaisrø, Esaú kalø isuikwan pesannamnekatik”. Inchen Jacobpe kuechimøntrai nui møskalø maik taikwan møra marik køn.