Ana kan unø trantra cha Jeupawan miaik køn

Elcaná munchi taik Israelsrik pa sralø tøkaik kuik køn: kan Ana kane Peniná taik. Untarappe Anan más untarapik kuik køn. Peninápe latrø yam urek tøkaik køpen, Anape chikeik kuikkutri Peninápe chine cha mørøpik kuik køn. Pilamørik Elcanápe nui yawelan Silósrømay pera ipik kuik køn tabernáculosrø Jeupawan adorantrap. Kan pieje truyu Elcanápe Ana latrø isuin pasraik ashape trentaik køn: “Ana kishmøta, na ñipa pasrar. Nape ñun køtrø untarapik kur cha”.

Treekkutri, Anape latrø isuin uña, Jeupawan kiship purukutra cha miap, trenchipik køn: “Jeupa ñi nan kan unø tranene, ñuyelan martrai unan trantrumøn cha”.

Sumo sacerdote Elípe, Ana trikwantø køniship, kiship pasraik ashape mutsikik kuitamap isupen, Anape trentaik køn: “Nai señor mutsikik pasrømur, latrø isuin pasrøwa Jeupapa waminchip pasrar cha”. Elípe kalø isup pasraprain kui ashape trenchipik køn: “Ñi miaikwan Jeupa trantrun cha”. Trukutri Anape chi isumø ipik køn. Pila kømuatø Anape unø tøkamisra Samuel munchi pasra, latrø kasrak pasraik køn.

Unan pitsø kuchiptø, Anape tabernáculosrø Jeupawayelan marøp pasrøntrai pera ipik køn, Jeupawan maik køtrømisrikwan martrap. Anape Elíwan trentaik køn: “Jeupawan na kan unø miaikkutri, møimpe nuyelan manakatik marøp pasrøntrai trantreinchar”. Elcanápe Anapa pilamørik Samuelwan ashchap ampa, kan kewa kui kualmera chikeik trantrap srua ampupelø kuik køn. Yanayupe Jeupa purukuiktrawa Anape pøn møk urek, par ishuk urek tøkamisrik køn.