Jefté chi martrap misrik

Israelitasmerape katøyu Jeupawan wentøpasra, pek tiusmeran adorap mentik køn. Ammonitasmera nømun kuayap ampikkutri pek tiusmerape purømisrmupen, yam pilamera kiship isui amøñipelø kuik køn. Incha srapepe Jeupawan trentaik køn: “Nampe kalø marøprain køn cha, namui tsalø ashipelainukkutri purømisrtra cha”. Israelitasmerape taska marik tiusmerane pitis mara, katø Jeupawan adorap mentøpen, Jeupape nøm treeku puraampup kui ashape, purukuntraptøwain pasraik køn.

Israelitasmerape ammonitasmerapa kuayamik køntrap kuinuk, metrap aship pera pasrøntrai Jeftéwan wesruik køn. Jeftépe Jeupawan trentaik køn: “Ik kuayaikwan ñi kanantrai marene, na yau pupen nan srøtø utøntrap wepatrupikwan ñuyelan martrai trantrumøn cha”. Jeupape Jefté miaikwan møra, nøm kanantrai marik køn.

Jefté nui yau pupen nui kantø nimpasr pandereta srua pailap wepatrupen, truyu Jeftépe Jeupawan trantrap misrikwan isuptincha trenchipik køn: “Nai nimpasrchik, mantrau køtrø pusrkuatan, Jeupawan trantrap misrikkutri, ñun tabernáculo Silósrø Jeupawayelan marøp pasrøntrai øram puntrap køtan cha”. Nui nimpasrpe trencha løtapik køn: “Papá ñi Jeupawan trencha køtrømisrape treekwan maram puntrun. Treek kuik køpene, pa pøltø nai linchipeløpa tunmerasrømay ørtruntrik, truyukutrimpe sí tabernáculøsrømay intrur cha”. Jeftéwai nimpasrpe srapekatik tabernáculosrø Jeupawaimpurapelan marøp pasrøpen, pilamørik nui linchipeløpe Silósrø ashchap ampupelø kuik køn.