Jeupawayasik kan ya marik køn

Salomón Israelsrø karup wamisren, Jeupape paík køn: “¿Ñun chi tranamø cha?”. Inchen Salomónpe trentaik køn: “Nape katøkucha matsinøtø kua chiwankøpen tap martrap kaimapik kur. Inchawai, tiusmanta, ñui misakwan tap asamik, kusrepik kømikwan trantra cha”. Inchen Jeupa trentaik køn: “Ñi nan kusrepik kømikwan miaikkutri, Pirø mupa kuimpurap ñi latrø kusrepik køntrai maramøntrun cha, trektøwai chikøpentø tranøp, latrø yam pilamera øsik uñchai maramøntrun ñi nan møra marene”.

Salomónpe Jeupawai yawan marøp pølpasrtrap, latrø tapeløtøka marik køn. Orotøka, platatøka, tsiktøka, srukmeratøka. Inchawai møkelø, ishumpur yawan maram purukuikkutri, siete pilamerayutø chap marik køn. Yantø tru yawan Jeupawan tranamik pupen, altar pala keta tranamelan pønsra, Salomónpe altar pintrøke tømpasra Jeupawan trentaik køn: “Namui Jeupa, ik ya lataken kømø ñipe más latrø nuik, latrø tapchik tøkaik køntrapik køn, inchentø tiusmanta nam adoraikwan, miailan utøtra cha”. ¿Chi isuku? ¿Tru ya marikwan Jeupape tap kui asik kø chintera? ¿Salomón miaikwan mørik kø chintera? Yantø Salomón Jeupapa chap waminchen, srømpalasrønkutri nak køtraatrua Jeupawan keta tranilan patrik køn. Øyamay Jeupa kenamarik køn tru yawan tap asik kui. Israelitasmera ikwan ashape latrø nu kasraraik køn.

Rey Salomónpe Israelsrøntø kømøtø, latrø yapsrønken asik misrik køn, tru nø latrø tap isua marøpik kuikkutri. Inchawai misakmerape isuintelø putraikwan tamaram purukuntrai ampupelø kuik køn. Sabasrik reinaken yaik køn mur paíløtøka, cierton kusrepik kuitashchap nepua ashik kuikkutri, inchawai tru løtilan mørape trentaik køn: “Ñuimpurap wamintikwan nape køremuik køn, inchentø møimpe nepua ashar, wamintik lataken kømø más latrø kusrepik kui, ñui Tius Jeupape ñun latrø tapelø tranin køn cha”. Israelsrø øsik amønaik latrø tapchik kuikkutri, misakmerape latrø kasrakelø kuik køn. Inchentø pestø chi køpikpe yunømartrap kuik køn.