Kan ejérciton metrap pera pasrapikpa israelita ishuk-unøpa

Siria pirausrø, kan israelita ishuk-unø tsupik kuik køn, møskainkeik usrinkeik, kakentø ejército sirio Israelsrønkutri kemøra srua amtruikkutri. Inchawai, Naamánwai yau karuintik mekapik kuinkucha, truyupe nøtøchiktø Jeupawan møra marøpik kuik køn.

Naamánpe asru latrø køtrø pusrkuap kuantrø tøkaik kuikkutri, ishuk-unøpe purukuntrap isua Naamánwai srawan trentaik køn: “Kan møk Israelsrik Eliseo munchi, Tiuswaiwan eshkapikwan ashipik kur, ñui kekwan kuantrøwan tamartrapik”.

Nui sraimpe maik taikwan eshkapen, nøpe nui kuantrøwan puraintrintø isua Israelsrømay Eliseowan lantrap yaik køn. Naamán trusrø pupene Eliseope nøaship utømøtø, nui karuintik mekapikwan trencha eshkantrai karuik køn: “Jordán piyu sietes piejeskatik piu umpu ulsrøntrik, treek marene chish køtrømisrtrun cha”.

Naamánpe Eliseotøwai nui tasiktrawa chikøpen køramtik martraitamap isuik køn, nui kuantrøwan purørtrap. Incha Naamán namik trenchipik køn: “Siria pirausrø pimeran más latrø tapelø tøkaker, Jordán pi lataik kømø. Trusrømay yaik kuinken chi kømupsruintrun cha”. Trencha wampikkutrintø namik ipik kuik køn.

Naamánwai nui karuintik melapelø tap isuntrai purukuntrap trentaik køn: “¿Ñui kuantrøwan purørtrap chikøpen maramtik kømuita? Eliseo karuikpe, chi murik kømøn, ¿maramtik kømuita cha?”. Naamánpe nømun møra, Jordán piyu siete piejeskatik pi umpu ulsrøpen, srapeyupe nui kuantrøpe chishtø purayaik wepatrupen, latrø kasrak Eliseowan unkua chintrap ashchap ya trentaik køn: “Møimpe si wetøpeñar Jeupatø ciertonik Tius kui”. ¿Israelita ishuk-unøpe maik mørøraik intik kera Naamánwai kuantrøwan tamarik kui asha?