KUSRENANIK 12
¿Ñune chi purukuntrera Biblian kusrep yamik?
Biblian kusremikpe kasraktø llirantrap yamik lataik køn, kanmaype murik atrintøkucha. Treekkutri, ñipe paya mørintre: “¿Na Biblian ka kusremtik kø chintera?” cha. ¿Chincha tapik kø Biblian kusrentrap trantramik? ¿Isuintelø puinkucha ñune chi purukuntrera Biblian kusrep yamik?
1. ¿Chincha tapik kø Biblian kusrep yamik?
“Tiuswei wambe øsiguig kømba, ka pasrømø, marøb pasrabig kømba, treeg køn” (Hebreos 4:12). Bibliape latrø tapik køn, kakentø yupe eshkapik køn Tiuspe chi isupik kui, mantø mørørapik kui ñuimpurap. Bibliape ñune mas kusremik trektøwai tap isua maramik, wentøsrøwai tapikwan muniramik purukuntrun. Mas tapikpe, Jeupawai linchipik kømik ñune purukuntrun. Ñi Biblian kusreinukpe, ñui øsik unamik mas tap yamik kusrenantrun.
2. ¿Chincha tørtø tap nepua asamik kø Biblia kusrenanilan latrø nuwayelø kui?
Biblia kusrenanikpe latrø tap nuway tørpila sruchik lataik køn. Inchawai, Bibliatøwai namun eshkapik køn: “Ciertonikwan penape manaken yanmøta” (Proverbios 23:23). Nam turyu tør tøkakøpene Biblia kusrenanilø latrø nuwayelø kui, kanmay trømpøik isuintik puintøkucha kusrentrap trantrapelø ker (leu Proverbios 2:4, 5).
3. ¿Jeupape ñune mantø purukuntrera Biblian kusrep yamikwan?
Jeupa Nø Ellmarampurap marøpik køn incha ñui trak linchipik køn. Treekkutri, ñune nun mas tap nepua ashchai purukuntrun. Tius, nø køn, ñuinuk “tranøb inchibiibe, tru nø maig martrab isuigwan treeg marig kønrrai” (leu Filipenses 2:13). Inchawai, kanmaype kusremikwan kape Tius maik taikwan møra maramikwan mur kui isupene, Jeupa ñune purukuntrun. Chikøpen isuintik pupen kape misakmera søtøkatap mentøpen, Jeupa ñune mur pasrøntrai purukuntrun. Ñipe Jeupawan purukutra cha miau kusrep yamikwan (1 Tesalonicenses 5:17).
MAS NEPUA KUSREU
Ashkun mantø maramikwan Biblian kusrep yamik misakmera søtøkatinkucha kape ñi utø kaakuinuk. Trukutri ashchun Jeupa mantø purukuntrai ñune metrap yamikwan.
4. Ñi Biblian kusreikwan trununmetrik mar
Nampe kanmaype chine maramiktøka pøntrapelø kuikkutri Biblian kusremikwan utø wesruntrap kaimer. ¿Chi martrap? Ley Filipenses 1:10, yu leinuk pinaku paílan waminchap:
¿Ñi isuinukpe “chiwan mas tabig” kø?
¿Manatøkucha Biblianmetrik utø wesra kusrentrappe ñipe chi martrap?
Baldeyu arenanmetrik pusra nøtrø srukwan pusrtrai inchene kemøntrun.
Inchen, nøtrø srukwanmetrik pusra arenan pusrtrai inchene kentrun. “Chiwan mas tabig kui” nepua asha trununmetrik marene pekwan maramikkucha utø køntrun.
Namun marøppe Tiuswan nepua ashchai nun adorantrai marik køn inchawai Biblian kusremik køn. Ley Mateo 5:3, yu leinuk pinaku paíkwan waminchap:
Biblian kusremikwan truikwanmetrik marene, ¿namune mantø purukuntrera?
5. Metraptø yamik katøkanelø søtøpøntramisrinkucha
Kanmaype møiløkøpen ñune Biblian mas kusrep imøntrai chikøpen chintrun. Francescon chi purayaikwan ash. VIDEUN asay, yu videu asinuk pinaku paílan waminchap:
Videu asinuk, ¿Francesco kusrep unikwan yawelan nui linchipelan eshkapen nømpe mantaik kø?
¿Chincha tapik puik kø nø køtrømisrmø yaik?
Ley 2 Timoteo 2:24, 25, yu leinuk pinaku paílan waminchap:
¿Ñui yawelø ñui linchipelø ñi kusrep unikwan maik kui ashipelø kø?
Ik versículosmera kenamarinuk, ¿ñi Biblian kusrep ipen tap kømui ashen chi marøpsruku? ¿Chincha?
6. Jeupa ñune purukupik kui køreu
Nam Jeupawan mas trak linchen nø kasrak wantrai isupelø ker. Treek kuintøkucha, kanmaype Jeupa maik taikwan maramik murik køn kakentø chiwan køpene yunømaramik køntrapik køn. Manakøpen treek mørørapene kullaramøta, Jeupa ñun purukuntrun. VIDEUN asay, yu videu asinuk pinaku paílan waminchap:
Videu asinuk, ¿Jim chimerantø yunømaramik puik kø Jeupa maik taikwan møra maramik?
Videu nepua asinuk, ¿ñune møik mas mantrau kepata?
Ley Hebreos 11:6, yu leinuk pinaku paílan waminchap:
Jeupawan lapeløpe, nun tap nepua ashchap trantrapelø køn trektøwai nømun tap kui ashchai isupelø køn, ¿Jeupape chi martrera nømuimpurø?
¿Jeupape maik mørørai inchipik kera ñi Biblian kusrentrap trantrøpen?
MØILØPE TREEK PAYIPELØ KØN: “¿Ñi chi martraptre Biblian kusrep unku?” cha.
¿Ñipe mancha løtapsruku?
¿CHI KUSREKU?
Kanmaype murik kuintøkucha, ñi Biblian kusrep wape manasrønkatik kasraktø unamik purukuntrun. Jeupawantø kørewa pasrøpene nøpe tapikwan trantrun.
Kusreikwan katøle isuntrap
¿Chincha untarapik kuku Bibliayu tør kusrenanikwan?
Ñipe “chiwan mas tabig” kuikwan nepua asha, ¿chi maramik kø?
¿Chincha miamik kø Biblian kusrep yamikwan purukutra cha Jeupawan?
MAS NEPUA ASH
Utøwan mantø tap tamaramikwan nepua ash.
“Utøwan mantø tap asha maramikwan” (¡Despertad!, febrero 2014wai)
Kan ishuk misak Tiuswan tap kenamarøp kui intik køn, inchentø nui kekpe treek marilan tap kømui ashipik kuik køn. Treek puraipen, Jeupa nun mantø purukuikwan ash.
Chinetø isumtelø pupen Jeupape purukuntraptøwai pasrapik køn (5:05)
Ash kan ishuk misak kullaramøtø nui kekwan mantø purukuik.
Naasiktøwai Jeupawaiwan waminchipelø ciertonelø køtashchap wetøpeña purø køtrø lulik køn (6:30)
Jeupawaiwan waminchipeløpe yaumpuelan nøørø maran chipelø køn. ¿Truikpe cierto kø chintera?