KUSRENANIK 01
¿Ñune mantø purukuntrera Bibliape?
Maya misakmera paya mørøpelø køn: øsik amønaikwan, kuamikwan, isuintelø purep pasraikwan chi attrapikwan. Namkucha kualømmørik chi palapelan tøkakømikwanpa, yaumpuiløpa kasraktø putramikwanpa isupelø ker. Yamelø nepua asha køn, nøm paílan Biblia løtapik kui, nøm øsik amønainuk tap wammera ketøpik køn. Ñui isuinuk, ¿Bibliape munkøpen purukuntraptik kø chinta?
1. ¿Bibliape chi paílantø løtapik kø?
Bibliape ik paílan løtapik køn: ¿nam øsik amønaik mantø pølpasrik kø?, ¿chikutritre øsik warøpra?, ¿misakmera chinchatre isui kiship amøñipelø kø?, ¿mukøpen kuapen chi puraipik kø?, ¿misakmera pishintø warøntrap isupentø, chintimpatre Pirø ørøpa pek misakmerape katøkan pek misakmerapa kuayapkø?, ¿wentøsrø ik Pirøwan chi puraintrap kø? Bibliape nam paílan wetøtramik purukupik køn. Inchakutri, yam misakmera tru løtapikwan nepua asha latrø kasrak amøñipelø køn.
2. ¿Kualømmørik nam øsik amønainuk kasraktø warøntrai, Bibliape mantø purukupik kø?
Bibliape tap wammera tranøpik køn. Por ejemplo, yaumpuilø kasrak putramikwan kusrenanøpik køn. Nam murarai namik kui amøñipen, Bibliape chi maramikwan eshkapik køn. Øyamaytøwai, nam kuallip amønainuk kasraktø amønamikwankucha. Ik pørin kilka, lamø lamø kusrep ampinuk ikpurap katøkanpurappa Biblia manchipik kuikwan nepua ashchun. Ñitøwainken cuenta peñchun, “Tiuswei wamwan pøriibe kerriguba [...] purø tabig [kui]” (2 Timoteo 3:16).
Ik pørin kilkape Biblian menta martrapik kømøn, masken Biblia manchipik kuikwan nepua ashchai purukuntrapikken køn. Ik pørin kilkayu, Bibliayu lantrai eshkapelan kutike lau, incha trektøwai køtashchap ash.
MAS NEPUA KUSREU
Biblia misakmeran maik purukuikwan, lep wainuk tap kui mørtrap ñi chi maramikwan; katøkan ñun tap nepua ashipik køntrai purukupen chinchatre tapik kuikwanpa ashchap.
3. Bibliape namun tap maywan amtrai purukupik køn
Biblia tørpilapik lataik køn; nam tap isua marøpelø køntrai, trektøwai wentøsrø chi puraintrapikwan eshkapik køn.
Ley Salmo 119:105, yu leinuk pinaku paílan waminchap:
¿Ik Salmon pørøpik Bibliaimpurø chi isupik kuik kø?
¿Bibliaimpurap ñi chi isupik kuku?
4. Nam paílan Bibliape løtapik køn
Kan ishuk unøkutri paílan Bibliayu wetøtraik køn. VIDEUN asay, yu videu asinuk pinaku paílan waminchap:
Videuyu wepatrup ishukpe, ¿chipurap paya mørik kø?
¿Biblian kusremik nune mantø purukuik kø?
Bibliayupe tap køn chipik køn nam paya møramik. Ley Mateo 7:7, yu leinuk pinaku paílan waminchap:
¿Ñi paílan Biblia løtøntraitamap isupik køtitru? ¿Møilø kø?
5. Ñi Biblian lep wainuk tap kui mørtrun
Yam misakmera Biblian lemik chull kui inchipelø køn. VIDEUN asay, yu videu asinuk pinaku paílan waminchap:
Videuyu urektelø wepatrupelø, ¿chi kilkamera køpen leimpurap chi isupelø kø?
¿Chincha pekmay ashipelø kø Biblian lemikwan?
Bibliape namun tap kui mørtrai, tapikwan muniramikwan kusrenanøpik køn. Ley Romanos 15:4, yu leinuk pinaku paíkwan waminchap:
¿Ñune tap køntrauta tapikwan muniramik, tap kui møramikwankucha nepua asamik?
6. Biblian lemik katøkanelø purukupen mas tap nepua ashchun
Kan misak Biblian nøtø leinkucha, katøkanelø purukupen kusremtik kui nepua asan. Ley Hechos 8:26-31, yu leinuk pinaku paíkwan waminchap:
¿Biblian tør nepua asamik chi purukuntrera? (Ley versículosmera 30, 31).
Kan møk Etiopíasrik lep waikwan mas nepua asamik purukuntrai palai mørik køn. Møyankucha, yam misakmera Biblian mas tap nepua ashchai mukøpen purukuntrai palapik køn.
MØILØPE TREEK ISUPELØ KØN: “Bibliane kaakatø leik kui lataik køn” cha.
¿Ñipe manchipsruku? ¿Chincha?
¿CHI KUSREKU?
Bibliape nam øsik tap amøñintrai tap wammera ketøp, nam paílan løtap, trektøwai misakmeran tap kui mørtrai, tapikwan muniramikwan purukupik køn.
Kusreikwan katøle isuntrap
¿Bibliayu chi tap wammera wetøtramtik kø tap amønamik?
¿Bibliape chi paílan løtapik kø?
¿Bibliayuilan kusremik ñune møikwan mas kustantrauta?
MAS NEPUA ASH
Møya namun Bibliayu tap wammera tranilø chincha purukupik kui nepua ash.
“Mananasrønkutri manasrønkatik Biblia latrø tap kusrenanøpik køntrun” (Asha Eshkapik, no. 1 2018)
Kan møk unøkutri latrø nu isuintik uñipikwan Biblia maik purukuikwan ash.
Yaumpuilø kasrak putrøntrayasik Biblia tap wammera tranilan ash.
“Doce purukuilø yaumpuilø kasrak putramik” (¡Despertad!, no. 2 2018)
Bibliape tør marøpik køn yu Pirau mu aship karup pasraik.