¿Maik wamintamik kø Jeupa tap kui ashchaimpe?

Jeupa namun marøppe, chikøsrøn latrø tapchikwan tøkakøntrai ketik køn, tru wamintikwan. ¿Jeupape nam waminchen søl waminchai munirapik kø chinta? ¡Øø, nøpe søl waminchai munirapik køn! (Leu Santiago 1:26). Trupe, ¿maik wamintamik kø Jeupa tap kui ashchaimpe?

1. ¿Mømaytø tap waminchipsruera?

Bibliape trenchipik køn: “Kangurrin kangurri masken treeg melamigwan isunrraimba, katøguchinguen tab mur isua pønrramisrøb amrraimba kangurrin kangurri puruguyay” cha (1 Tesalonicenses 5:11). ¿Mukøpen isui waik ashipik køtitru? ¿Nø tap kui mørtrai purukupsrumuku? Nø tap marimpurø unkua chi. Trektøwai nun “Untaktøka ashipik kur” cha. ¿Ñikan kan versículo tøkakøtitru munkøpenwan tap kui mørtrai purukuntraptik? Versículosmerape øyeeløpe latrø nu køn. Ñi mømay wamintikpe, chi wamintikpe katøkanelan pusrkuankaruntrun kape tap kui mørtrai martrun. Treekkutri, chu urastøkucha tammaytø tsøntatø wamintamik køn (Proverbios 15:1).

2. ¿Mømaytre waminchimumik kø?

Biblia trenchipik køn: “Ñimui trigugurrimbe mørøbguen møramgaig trømbøig webinrrain kømøtø kuy” (leu Efesios 4:29). Trenchippe trømpøilø waminchimøwai, pusrkuantelø chikøpen chimøwai intamik køn. Trektøwai katøkanelaimpurap isa waminchimø, wam kusruptelø kømøwai intamik køn (leu Proverbios 16:28).

3. ¿Katøkanelan namui wamintiktøka tap kui mørtrai purukuntrap namun chi purukuntrera?

Mutøkucha maik isup putraikwan treek waminchipelø køn (Lucas 6:45). Treekkutri nampe tapikwan isuntrap trantramik køn, por ejemplo “chiyutøgucha newan tabig chishigwanba, chiyutøgucha larrø tammayig kømigwanba, chiyutøgucha yeeg tabig kønrrab chib wamindigwanba isumig køn” (Filipenses 4:8). Treekkutri asha kemøramik køn películasmeran, músicasmeran kape chikøpen asilan, mørilan, trektøwai tap linchipelø lamik køn (Proverbios 13:20). Waminchaptø katøkanelø maik mørøraikwan tsøntatø isu. Biblia trenchipik køn: “Nam isumø wamintikpe kan espadatøka kuanøp latawain køn, inchentø tap asha waminchipikpe køtrintikwanken tamarøpik køn” cha (Proverbios 12:18).

MAS NEPUA KUSREU

4. Tap isua waminchi

Kanmaype chikøpen chape niløtø pasrømupreitamap isupelø ker (Santiago 3:2). Ley Gálatas 5:22, 23, yu leinuk pinaku paílan waminchap:

• Versículosmera leinuk, ¿Jeupawan møilan miapsruku tap waminchipelø køntrappe? ¿Iløpe ñune mantø purukuntrera?

Ley 1 Corintios 15:33, yu leinuk pinaku paíkwan waminchap:

• ¿Películasmera, músicasmera kape chikøpen asilø, mørilø, linchipeløkucha namui wamintikwan mantø mintishipsruera?

Ley Eclesiastés 3:1, 7, yu leinuk pinaku paíkwan waminchap:

• Kanmaype niløtø køtrømisramik søl køpik køn, ¿manatøtre øyeek maramik kera?

5. Katøkanelaimpurap tapikwan waminchi

VIDEU: Katøkanelan “purugunrraptiig, treeg wamindamig køn” (4:07)

• ¿Nunekpe katøkanelaimpurap wamintikwan chincha yunømartrap isuik kø?

• ¿Yunømartrap chi marik kø?

Ley Eclesiastés 7:16, yu leinuk pinaku paíkwan waminchap:

• ¿Katøkanelaimpurap tap kømíik waminchaptø chiwan isumik kø?

Ley Eclesiastés 7:21, 22, yu leinuk pinaku paílan waminchap:

• Ñuimpurø tap kømøtiik wamintin køpen, ¿ik versículosmera mantø purukuntrera namik mørmøntraimpe? ¿Chincha?

6. Ñui yaweløpa waminchappe tammaytø waminchi

VIDEU: Untaktøka kørikpalatø amøñipene nakchak umpu tap putrøntrun (3:08)

• ¿Ñui yawelan tammaytø wamintamik chi purukuntrera?

Ley Efesios 4:31, 32, yu leinuk pinaku paíkwan waminchap:

• ¿Nampe mømay wamintamik kø nakchakuilan nøm tap kui putrøntrai?

Jeupape nui Nusrkai, Jesúswaimpurø, chi isupik kuikwan eshkapik kuik køn. Ley Mateo 17:5, yu leinuk pinaku paíkwan waminchap:

• ¿Ñui yaweløpa waminchap Jeupa latawai mantø waminchipsruku?

¿CHI KUSREKU?

Nam wamintiktøka katøkanelan tap kui mørtrai kape pusrkuankaruntrapelø køn. Inchawai chikøpen chintraptø chi tamikwan, mømay tamikwan, mana tamikwan isumik køn.

Kusreikwan katøle isuntrap

• ¿Katøkanelan tap kui mørtrai purukuntrap mømaytø waminchipsruera?

• ¿Mømaytre waminchimumik kø?

• ¿Katøkanelan namui wamintiktøka tap kui mørtrai purukuntrap namun chi purukuntrera?

MAS NEPUA ASH

¿Katøkanelan namui wamintiktøka tap kui mørtrai purukuntrap namun chi purukuntrera?

Tap isua waminchipelø køkun (8:04)

Trømpøik waminchimøntrap chi purukupik kuikwan nepua ash.

“¿Trømpøik wamintamikpe kaik kø chinta?” (jw.org yu pørilø)

Wam kusruptimisrmøntrap chi maramikwan nepua ash.

Wam kusrup mentøpen uyutø patsøkø (2:36)

Kan møk mas trømpøik waminchimøntrai Jeupa mantø purukuikwan nepua ash.

“Nai øsik unikwan isup mentik køn” (Asha Eshkapik, 1 agosto 2013wai)