¿Tiuswai misakpe chinchakutri tamara pøntramik kø?

1. ¿Tiuspe israelitasmeran chinchakutri nui misak køntrai tamarik kø?

Metrapsrø kan møk Abrahán taik, Tiuswan mørøpik kuik køn. Abrahánwainukkutri amtrua pøntrapelan, nación køntrai, Tiuspe tamara pønsraik køn. Ik nación Israel taik, nømtø Tiuswan adorapelø, Tiuswai wamwan purømisrøpelø kuik køn (Salmo 147:19, 20). Ikkutrimpe, yu Pirau chi misakmerakøpen tap waramik tøkakøntrun. Leu Génesis 22:18.

Tiuspe israelitasmeran wesrua pøntraik køn, nui wam waminchipelø køntrai. Nøm øsik amønainuk chitø puraampilø tørtø kenamaran, tru Tiuswai karuilan møra marikkutri tapelø utamtik kui (Deuteronomio 4:6). Katøkan misakmerape israelitasmerakutri cierton Tiuswan nepua ashchun. Leu Isaías 43:10, 12.

2. ¿Cierton Cristoi wentautø ampupeløpe chinchakutri tamara pøntramik kø?

Israelitasmera Jeupawan wentøpasren, nøpe Cristoi wentautø ampupelan nui wam waminchai wesruik køn (Mateo 21:43; 23:37, 38). Møyasrø, cierton Cristoi wentautø ampupeløpe Jeupawan mørøpelø nui wam waminchipelø køn, israelitasmera kømø. Leu Hechos 15:14, 17.

Jesúspe nui wentautø ampupelan tamarik køn, Pirø ørøpa Tiuswaiwan eshkantrai, katøkanelan Tiuswaiwan waminchipelø misrtrai (Mateo 10:7, 11; 24:14; 28:19, 20). Møi srape kualømmerayu, Tiuswaiwan Pirø ørøpa kusrenanøpkøn. Latrø nu misakmeran chu Pirauelø køpen Jeupa wesrup pasran, cierton religiónyu pøntrøntrai (Apocalipsis 7:9, 10). Tap tamara pøntrapelø kuikkutri, cierton Cristoi wentautø ampupeløpe, kankutrin kankutri, kullaramø mur pøntrøntrai purukupelø køn. Katøkanpurappe, nømui tuluntsuninuk, mayelø lata lata Bibliayukutri kusrenanikwan trununtøwai kusrepelø køn. Leu Hebreos 10:24, 25.

3. ¿Møyasrø Jeupawaiwan waminchipeløpe tamarilø pøntrøntrap mantø pølpasrik kø?

1870 pilamerasrø, mameløtø Bibliayukutri kusrep pøntrapeløpe, Bibliayu ciertonelø latrø yana sørik pøntrapelan wetøtraik køn. Nømpe nepua asikkutri, tru Jesús nui wentautø amøñipelan Tiuswaiwan eshkantrai tamara pønsraikwan, Pirø mupa kuimpurap Tius Nø Aship Karup Waikwan kusrenanøp pølpasrik køn. 1931 pilasrø Jeupawaiwan waminchipelø nømasiktøwai ik munchitøka waman. Leu Hechos 1:8; 2:1, 4; 5:42.

4. ¿Jeupawaiwan waminchipeløpe mantø tamarilø pøntra?

Kan siglosrø, chi pirausrelø køpen Cristoi wentautø ampupelai kungrekasiunesmeran Taitamera Metrap Aship Pøntrapelø pera ampup kuik køn. Iløpe, kungrekasiunyuelan Jesús cierton pera ipik kui, nepua ashipelø kuik køn (Hechos 16:4, 5). Trektøwai, møin kualøm Pirø ørøpa Jeupawaiwan waminchipeløpe Taitamera Metrap Aship Pøntrapelø, pera ampupelø køn. Nømpe aship pøntrapelø køn, pørin kilkamera wesrup; trektøwai Pirø ørøpa pirishipelø køn 800 wammay lliska pøra wesrua Biblian kusrentrai. Taitamera Metrap Aship Pøntrapelø Bibliatøka, 120.000 kungrekasiunesmeran pera ampupelø køn, kullaramø mur pøntrøntrai. Trektøwai, kungrekasiunesmerayu møkelø kusrenanilø untaktøka aship pøntrapelø køn Tiuswai upishameran. Leu 1 Pedro 5:2, 3.

Jeupawaiwan waminchipeløpe tamarilø pøntran Bibliayukutri Tiuswaiwan eshkantrai, katøkanelan Cristoi wentautø ampupelø misrtrai. Cristo nøaship karua ørilø latawai, yamørik yamørik, Tiuswaiwan eshkapelø køn (Hechos 20:20). Bibliayukutri kusrenanøpelø køn møiløkøpen untaktøka kusrek kui inchene. Ikpe kan urkanisasiuntø kømøn, masken kan yawelø latawai nunelø, nuchalø, kankutrin kankutri untarapelø køn incha nømui Møskai untaktøka purømisrøpik køn (2 Tesalonicenses 1:3). Tiuswai urkanisasiunpe nø tap kui ashchai inchip, misakmerankucha purukup trantrapelø kuikkutri, nøm køn yu Pirauelø mas kasrakeløpe. Leu 1 Pedro 2:9; Hechos 20:35.