Yɛhega

3 Moses nyaa daa dela dunkeena bisera a dɛɛma Yetro n de Midia malemadaana la piisi. Se’em ma’a ti a nyaa tara piisi la yɛ’a goo la dapɔya bɔba la, a daa ta paɛ la yelemɛŋɛrɛ Naayinɛ zoore la n de Horeb la. 2 Ti Yehowa maleka niɛ amea pa’alɛ en bugum peelum poan n boi tuntuo poan. Se’em ma’a ti a daa bisera la, a daa nyɛ ti bugum n daa diti tuntuo la ge tuntuo la ka diti ba’asa. 3 Ti Moses yeti: “N wan keŋɛ paɛ bisɛ yelesaanɛ wa ge baŋɛ sɛla n sɔi ti tuntuo la ka dita ba’asa la.” 4 Se’em ma’a ti Yehowa nyɛ ti a keŋɛ ti a bisɛ me la, Naayinɛ yi en mɛ tuntuo la poan ge yeti: “Moses! Moses!” ti a sakɛ yeti: “Mam n wana.” 5 Ti a yeti: “Da le lɛm na. Pirege ho taɣera la, se’ere n sɔi la zɛsɛka ti ho zɛ’a la dela zilam zɛ’an.” 6 A le tɔɣɛ pa’asɛ yeti: “Mam dela ho sɔyaaba Naayinɛ, Abraham Naayinɛ la, Isaak Naayinɛ la, la Yakob Naayinɛ la.” Ti Moses pĩ a nɛŋa se’ere n sɔi la dabeem n daa tari en ti a bisɛ yelemɛŋɛrɛ Naayinɛ la. 7 Yehowa tɔɣɛ pa’asɛ yeti: “Mam sirum nyɛ wuŋerɛ seko n paari mam nɛreba n boi Egypt tiŋa poan la, mam me wum ba kaasega la se’ere n sɔi la ba pɛregɛ ba mɛ ti ba tuna; Mam mi ba nameseri se’em mɛ. 8 Mam wan sige ta faaɛ ba yese Egyptdoma la nu’usin ge tari ba yese tiŋa la poan tari ba wa’an tiŋa n ani soŋa ge yalegɛ, dɛna tiŋa n tari iilum la seerum, tinsɛka n de Kanaandoma, Hitidoma, Amoridoma, Perisidoma, Hevidoma la Yabudoma sɔ’ɔlum la. 9 Bisɛ na! Mam wum Israeldoma la kaasega la mɛ, n me nyɛ muɣesego seko ti Egyptdoma la muɣesa ba la mɛ. 10 Nananawa, wa’ana ti n tum hɔ Faaro zɛ’an, n wan tum hɔ ti ho tari mam nɛreba Israeldoma la yese Egypt.” 15 Ti Naayinɛ le yele Moses yeti: “Hon nari ti ho yele Israeldoma sɛla n wana, ‘Yehowa n de ya sɔyaabedoma Naayinɛ la, Abraham Naayinɛ la, Isaak Naayinɛ la, la Yakob Naayinɛ n tum mam ya zɛ’an na.’ Mam yu’urɛ n kɔ’ɔn bala wuusa, Mam n boti ba tɛra mam se’em n wana dɔɣepa’asɛ n taɣelɛ dɔɣepa’asɛ poan.