Vom La Na’am Tuuma Zamesegɔ Viisegɔ Gɔŋɔ
© 2025 Watch Tower Bible and Tract Society of Pennsylvania
JANUARY 5-11
NAAYINƐ TUULUM YƐLA ISAIAH 17-20
“Lan Wan Eŋɛ Sɛba N Faanre To Wa Se’em N Bala”
w18.06-E 7 ¶16
“Mam Sɔ’ɔlom La Dagɛ Teŋa Wa Zuo Denɛ”
16 Bisɛ teere wa yele n pakɛ se’em! Baabule la dekɛ nɛresaaleba makɛ la ateko komi’isi n ŋmɛ’ɛri, ateko n ka malum tara vo’osego. (Isa. 17:12; 57:20, 21; Lil. 13:1) Nalɛɣerɛ yɛla n basɛ ti yelesego la gbiregere bɔna la, tomam kelum tara la suma’asum la nɔyinɛ. Yehowa san nyɛ yelesego n boi se’em la, a puurɛ ni kelum pee mɛ la a nɛreba n tari nɔyinɛ la.—Kaalɛ Zepania 3:17.
w16.04-E 28 ¶4
Bɔna Ho To’ore Tingɔŋɔ Sɛka Ti Yelesego Bɔna Bim La
4 Daanse’ere ton boi zɛ’an la, to san puɣum ka dekɛ tomea pa’asɛ nalɛɣerɛ yɛla poan, to wan ta’an pu’usa Yehowa ton boti se’em. Ge Sitaana tingɔŋɔ wa n pɔ̃ri ba’asegɔ la, la ta’an kpe’em bo to ti to da dekɛ tomea pa’asɛ nalɛɣerɛ yɛla poan. Tingɔŋɔ wa n kɔ’ɔn pirɛ la nɛresɛba n ‘ka tari nɔyinɛ’ ge me ‘tuna zuku’urɛ tuuma’ la, yelesego wan kɔ’ɔn bɔna. (2 Tim. 3:3, 4) Tisi ase’a poan, ban kɔ’ɔn tɛɛra gɔmɛtdoma la zuo, la ni kpe’em bo mabiisi ba san ka dekɛ bamea pa’asɛ nalɛɣerɛ yɛla poan. La yele pakɛ mɛ ti to kɔ’ɔn lu to suure ti to kan dekɛ tomea pa’asɛ nalɛɣerɛ yɛla poan. To san ka maasum nananawa ge ti bɔŋa la san tee, la ta’an kpe’em bo to ti to da dekɛ tomea pa’asɛ nalɛɣerɛ yɛla poan. Bala la, to wan maasum la wani lan wan eŋɛ se’em ti to kan dekɛ tomea pa’asɛ nalɛɣerɛ yɛla poan? Basɛ ya ti to geele ya yɛla anaasi n wan soŋɛ tɔ.
ip-1-E 198 ¶20
Yehowa N Ka’am Tisi La Se’em
20 Bem n wan paɛ ba? Isaiah yeti: “Zaanɔɔrɛ wan tara ba paleŋ’ɛnka, beyiine te ba tole ya. Lan wan eŋɛ sɛba n faanre, la sɛba n daane to wa se’em n bala.” (Isaiah 17:14) Nɛreba zo’e zo’e fãari la Yehowa nɛreba, ita ba sɛla n ka ani soŋa ge me ka bɔ’ɔra to gilema. Yelemɛŋɛrɛ Kristakɔma n kan malum dekɛ bamea pa’asɛ pumpɔreŋɔ pu’usegɔ yɛla poan la zuo, nɛreba kɔ’ɔn zɛregera ba mɛ ge me yaɛ ba. Ge Naayinɛ nɛreba mi ti “beyiine” sɛka ti ba namesegɔ la ka le bɔna la kɔ’ɔn pɔ̃ra mɛ.—2 Tesalonika 1:6-9; 1 Peter 5:6-11.
Vo’osum Poan Yɛla
w06-E 12/1 11 ¶1
Isaiah Gɔŋɔ La Yelekpina—I
20:2-5—Isaiah yuun sirum eeri la beele yuuma atã? La ta’an dɛna ti Isaiah yuun yɛɛ la a lɔɣɔrɔ ti la gee se’em ti a yɛ poan la.—1 Samuel 19:24.
JANUARY 12-18
NAAYINƐ TUULUM YƐLA ISAIAH 21-23
Ton Zamesɛ Sɛla Sebna Yele La Poan
w18.03-E 25 ¶7-9
Tubedɔlegerɛ Pa’alɛ La Naayinɛ Nɔŋerɛ
7 To geele ya nɛreba bayi ti Yehowa yuun dɔlegɛ ba tuberɛ ta’an baŋɛ tubedɔlegerɛ yele n pakɛ se’em. To wan geele Sebna n yuun boi Naba Hezekia saŋa, la Graham, n de mabia yele. Sebna n yuun de tuntuna ‘bisera Naba Hezekia ‘yire la zuo, a yuun tari la kpe’eŋo. (Isa. 22:15) Nimbaalega la dela, a yuun zɛ̃kɛ la amea ge bɔta ti ba na’asa en. Hali a yuun basɛ ti ba maalɛ la amea yɔɔ bo en ge bã’ara “na’am toroto”!—Isa. 22:16-18.
8 Sebna n yuun boti ba na’asa en la zuo, Naayinɛ yuun yese en mɛ a tuuma la poan ge basɛ ti Eliakim soe en. (Isa. 22:19-21) Ba yuun eŋɛ teeri wa mɛ se’em ma’a ti Asiria Naba Senakerib yuun bɔta ti a zabɛ la Yerusalem la. Pooren, Senakerib yuun tum la kpɛ’ɛndoma, la soogɛpa Yerusalem tiŋa ti ba ta vuuse Yudadoma la ti Hezekia sakɛ bo ba. (2 Na. 18:17-25) Hezekia yuun tum la Eliakim ti a keŋɛ ta tɔɣɛ bo ba ge la daɣɛ eŋa ma’a n yuun keŋɛ. Eŋa la nɛreba bayi n yuun keŋɛ, ayima dela Sebna n yuun nyaa de gɔngulesa la. Wana pa’alɛ ti Sebna yuun ka ugeri yɛla bii a sunsɔa nyie la a tuunɛ la ge a yuun tuɣum sirege la amea tum tuunɛ la. To zamesɛ la bem a yele la poan? To geele ya yɛla atã.
9 Yia la, Sebna yuun ka le dɛna kpɛ’ɛma nayire la poan. A yele la kaɣɛ tɔ ti “ho han pa’alɛ ho mɛŋa ho nyɛte la sagaŋɔ, ho han zɛɛna nɛreba ho lute mɛ.” (Mag. 16:18) Ho san tara yɔ’ɔ tuna tansugere la poan ti nɛreba nyɛta hɔ, hon wan tiregɛ siregera homea? Hon wan pɛ̃ɣɛ Yehowa la hon tã ita sɛla la bii yelese’a ti ho tum la? (1 Ko. 4:7) Tuntuna Paul gulesɛ yeti: “N yele ya dena wa. Te ya mina mina da behɛ a mea tɛn’ɛhɛ, te enŋa ba de’a la nɛrekantɛ gana zan’an ge me dagana. Ge a daana ton tɛn’ɛha sɛla n de ma’an.”—Arom 12:3.
w18.03-E 25 ¶10
Tubedɔlegerɛ Pa’alɛ La Naayinɛ Nɔŋerɛ
10 N yi’i, Yehowa n yuun dɔlegɛ Sebna tuberɛ la ta’an pa’alɛ ti a yuun mi ti Sebna ta’an tee. (Mag. 3:11, 12) Bisɛ lan de makesonɛ se’em bo mabiisi sɛba ti ba dɔlegɛ ba tuberɛ tansugere la poan! Lan tuɣum deni ti to eŋɛ sunsɔa bii ugera yɛla la, la nari ti to dekɛ to paŋa za’a tuna bɔ’ɔra Yehowa. La nari ti to tɛ̃ra ti ba san dɔlegɛ to tuberɛ, la pa’alɛ la Yehowa nɔŋerɛ. To Sɔ la san dɔlegɛ to tuberɛ ge ti to sirege tomea, la pa’alɛ ti a mi ti to wan ta’an tee. (Kaalɛ 1 Peter 5:6, 7.) To san sakɛ tubedɔlegerɛ, la pa’alɛ ti to bo la Yehowa yɔ’ɔ ti a demese to. Bala la, basɛ ya ti to siregera tomea.
w18.03-E 26 ¶11
Tubedɔlegerɛ Pa’alɛ La Naayinɛ Nɔŋerɛ
11 N tã’a, dɔɣereba, la keendoma wan ta’an zamesɛ sɛla Yehowa n yuun dɔlegɛ Sebna tuberɛ se’em la poan. To wan ta’an zamesɛ la bem yele wa poan? Yehowa san dɔlegɛ nɛra tuberɛ, la pa’alɛ ti a yaɛ be’em mɛ. La me pa’alɛ ti a fabeli nɛresɛka n tum be’em la yele mɛ. Dɔɣera san yeti a dɔlegɛ a bia tuberɛ bii keema san yeti a ka’am nɛra, la nari ti ba tɔɣesa Yehowa. La nari ti ba tuɣum yaɛ be’em la ti nɛra la tum la ge daɣɛ nɛra la.Yude 22, 23.
Vo’osum Poan Yɛla
w20.12-E 09 ¶5
“Ba Wan Isige Sɛba N Ki La, La Wani?”
5Paul yuun kaɣɛ mabiisi la mɛ la putɛsɛka ti ba yuun tara la. A yuun yeti: “Nɛreba han ka ta le vo’e ba kum poan, bahɛ ya te toyi eta ya wo nɛreba n yele se’em la. Ba yeti, Bahɛ ya te to di gee nyu, beere wana ma’an te to ki ya.’” Ge ti Paul wa’ana la, ba yuun puɣum tara putɛdena wa mɛ. A yuun ta’an tɔɣera yelese’a n boi Isaiah 22:13, n pa’alɛ halese’a ti Israeldoma la yuun tara la yele. Ba yuun tuɣum bɔta la nyɛlum dia gana ban wan ana du’a du’a la Naayinɛ. Halese’a ti Israeldoma la yuun tara la dela “to di zina ge beere ti to ki ya.” Zina beere wa, nɛreba tari la haledena taaba. Ge Baabule la pa’alɛ yelese’a n yuun paɛ Israeldoma la ti la ka ana soŋa.—2 Yel. 36:15-20.
JANUARY 19-25
NAAYINƐ TUULUM YƐLA ISAIAH 24-27
‘To Yenɛ La N Wana!’
cl-E 15 ¶21
‘Behɛ, To Yenɛ La N Wana!’
21 Hon tabelɛ nyɛ bia n tiɛ nu’o pa’alɛ a sɔ ge yele a zɔdoma la pupeelum yeti, “Mam sɔ n wana”? La me ani Naayinɛ yamesi la bala. Baabule la tɔɣɛ biŋe sansɛka ti sɛba n tari yelemɛŋɛrɛ wan ta yeti: ‘Behɛ, to Yenɛ la n wana!’ (Isaiah 25:8, 9) Ho san baŋɛ Yehowa hala la soŋa soŋa, ho wan sirum baŋɛ ti ho tari la Sɔsonkɔ n gani za’a.
Ton Zamesɛ Sɛla La Yezu N Yuun Tum Yelekirega Basɛ Ti Boroboro Zo’e La
14 Yezu yuun pa’alɛ tɔ ti to zusɛ Naayinɛ ti a bo “to zina dabaherɛ dia.” A yuun kelum pa’alɛ tɔ ti to zusɛ ti Naayinɛ puti’irɛ tum “teŋa wa zuo wo lan ane se’em saazuo ha la.” (Mt. 6:9-11) Hon ti’isɛ ti tingɔŋɔ wa wan ta ana la wani sankaŋa? Baabule la pa’alɛ ti la dela Naayinɛ puti’irɛ ti dinɔ’ɔma bɔna tingɔŋɔ wa zuo. Isaiah 25:6-8 yeti dinɔ’ɔma wan ta buge ti nɛreba dita la pupeelum. Yooma 72:16 me yeti: “Bahɛ te dia buge teŋa la poan. [Basɛ] te dia la wom velegɛ, te zɔya la zuto zan’an maalɛ la dia.” Hon kɔ’ɔn ana la lɛɛ gura ti ho ta duɣɛ disɛka ti ho nɔŋɛ bii ho ta duɣɛ disɛka ti ho nan ka duɣɛ kurum? Ho me ta’an ti’isa se’em ma’a ti ho wan ta burɛ homea daam tiisi ge nyuura ku daam. (Isa. 65:21, 22) Nɛra woo wan ta tara yele ana wa ti a puurɛ pee.
Yehowa Nɔŋerɛ La N Soŋeri To Se’em
11 Ti’isɛ bisɛ ho vom n wan ta ana se’em Paradiisi tingɔŋɔ wa poan. To kan le fabela bã’asi la kum yele. (Isa. 25:8; 33:24) Yehowa wan ta bo to yelese’a woo ti to bɔta. Hon wan ta bɔta ti ho zamesɛ la bem? Hon wan bɔta ti ho ta zamesɛ la dusi yɛla, ban ŋmɛ̃’ɛri yuuma se’em, bii ban dɔreŋeri se’em? Paradiisi poan, to wan ɛɛra la nɛresɛba n tã dɔreŋera ge mɛta yɛa. To me wan ta ɛɛra kaareba, sɛba n wan duɣera dia, sɛba n wan maala lɔɣɔrɔ, la sɛba n wan bisa tinparɛ la ti la ana soŋa. (Isa. 35:1; 65:21) Ho san ta vɔna daarewoo, ho wan ta ta’an ita yele ana wa za’a.
12 To puurɛ me wan ta pee ti to nyɛ to nɛresɛba n ki la! (Tm. 24:15) Yeen ti’isɛ bisɛ ho suure n wan suke se’em ti ho ta zamesɛ Yehowa naaŋɔ lɔɣɔrɔ la yɛla pa’asɛ. (Ym. 104:24; Isa. 11:9) Sɛla n gani za’a dela, ho wan pu’usa Yehowa ge kan ti’isa ti daanse’ere ho wan tue en ti la nara ti a di sugeri bo ho! Hon wan bɔta ti ho di ‘nyɛlum Sitaana tingɔŋɔ’ wa poan ge ti Paradiisi la ta piɛ ho nu’usin? (Heb. 11:25) Ho kan sakɛ eŋɛ bala! Ton wan ta nyɛ kã’a se’a beere sa’am la gani ton nyɛti sɛla nananawa. Tɛ̃ra ti, la kan yue to kan le ti’isa Paradiisi yele ti la wan wa’an la beere sa’am. To wan kɔ’ɔn bɔna la bim dabeserɛ woo. La san daɣɛ ni Yehowa n nɔŋɛ tɔ ge basɛ ti a Dayua wa’ana ki bo to la zuo, to kan nyɛ ni yele ana wa!
Vo’osum Poan Yɛla
Sirege Homea Sakɛ Sɛla Ti Ho Ka Mina
10Ton ka mi Yehowa n wan ta eŋɛ sɛla la soŋeri to mɛ ti to siregera tomea. La me soŋeri to mɛ ti to mina ti Yehowa n kɔ’ɔn mina sɛla n ani soŋa. (Isa. 55:8, 9) To me ni dekɛ tomea delum la Yehowa ti a wan basɛ ti yɛla keŋɛ soŋa. Yɛla san kena soŋa bɔ’ɔra tɔ na’am mɔɔlegɔ tuuma la poan bii mɛa tuuma poan to ni pɛ̃ɣera la Yehowa. (Ym. 127:1; 1 Ko. 3:7) Yɛla san ka keŋɛ soŋa wuu ton boti ni se’em la, la nari ti to tɛ̃ra ti Yehowa mi sɛla woo. (Isa. 26:12) To tuni la to paŋa beene ge tara suure lua ti Yehowa wan soŋɛ tɔ. To tari puti’irɛ ti Yehowa wan pa’ala tɔ hali a san ka eŋɛ bala yelekirega sore poan wuu eŋa n yuun iti se’em diimi sa la.—Tm. 16:6-10.
JANUARY 26–FEBRUARY 1
NAAYINƐ TUULUM YƐLA ISAIAH 28-29
Tara Ho Nɔɔrɛ La Ho Suure Na’asa Yehowa
ip-1-E 299 ¶23
Isaiah Tɔɣɛ La Yehowa ‘Yelenyalema’ La Yele
23 Yuda pu’usegɔ nɛŋadoma la yuun iti wuu ba tari la Naayinɛ yɛm ge ba yuun zaɣesɛ En mɛ. Ba yuun pa’alɛ la bamea puti’irɛ n de se’em som la be’em poan ti la ka ana soŋa, ba yuun ni bo la bamea buurɔ la ban ka tari sakerɛ ge tara sarenbe’ero la ge me basɛ ti nɛreba la ita yelese’a n ka basɛ ti Naayinɛ puurɛ pee la ba. Yehowa “yelenyalema” la zuo, a yuun wan basɛ ti ba eŋɛ kãlɛ bo en la ba nigum nigumtuuma la. A yeti: “Nɛrebana wa tare la yetɔgom ma’an lɛna mam na, ge na’aha mam la ba nɔya ma’an, ge ba sunya zaan mɛ la mam. Ba zoolom la te zɔta mam la dela nɛresaala ze’elego te ba zamehɛ. Bala zuo la, behɛ, n wan le damɛ nɛrebana wa la n yelenyalema kanra la, te ba yamdoma la yam la bɔregɛ, te basɛba n behere la kan le nyɛta sɛla.” (Isaiah 29:13, 14) Yuda yɛm, la a bɔkerɛ la wan bɔregɛ se’em ma’a ti Yehowa wan basɛ ti Babilon Tingɔŋɔ Kpe’eŋo la sa’am pumpɔreŋɔ pu’usegɔ n yelege bamea la. Bala mea nɔɔ n yuun eŋɛ yuun kɔbesɛka n deŋɛ nɛŋa la, se’em ma’a ti Yuda pu’usegɔ nɛŋadoma la n pa’alɛ ti ba tari yɛm la basɛ ti nɛreba la yelege bamea la. Bala mea nɔɔ n wan paɛ pumpɔreŋɔ pu’usegɔ n boi zina beere wa.—Matu 15:8, 9; Arom 11:8.
w21.05-E 9 ¶7
Sɛsɛla Ka Boi N Wan Ta’an Basɛ Ti Tontɔɔdaana Pirɛ Lui
7 Yezu yuun dekɛ la sukpe’ene tɔɣɛ zɛregɛ pu’usegɔ nɛŋadoma la n yuun tuni nigum nigumtuuma la. Makerɛ, a yuun zɛregɛ Fariseedoma n tari nigum nigum la mɛ se’ere n sɔi la, ba puti’irɛ yuun boi la ban wan pɛɛra nu’usi se’em gana ban wan bisera ba dɔɣereba se’em. (Mt. 15:1-11) La yuun ta’an eŋɛ Yezu podɔleba la pakerɛ la eŋa n yuun tɔɣɛ sɛla la. Bala zuo ba yuun soke en yeti: ‘Ho mi te Fariseedoma poorɛ ka pee ban wom sɛla te ho yele la?’ Yezu lebese ba yeti: “Mam Sɔ se’em n bo saazuo ha han ka borɛ bonbuure te ba yehe, ba wan vɔn ba bahɛ. Bahɛ ba, dela pa’aleba n de fɔɔhe. Fowa han vɛ’ɛra fowa, ba zan’an lute la boko poan.” (Mt. 15:12-14) Yezu yuun ka basɛ ti pu’usegɔ nɛŋadoma la sunsɔa n nyie la en la gu en ti a ka tɔɣɛ yelemɛŋɛrɛ la.
Kelum Dɛna Yehowa Saana Wuusa!
8 Sɛba n ‘tɔɣeri yelemɛŋɛrɛ ba suuren’ kan ita wuu ba nani Yehowa mɛ nɛreba nɛŋan ge tuna be’em suɣelum poan. (Isa. 29:13) Ba ka tuni nigesi. Nigum nigumdaana ta’an ti’isa ti yɛm ka boi Yehowa pa’alegɔ ase’a poan. (Yam. 1:5-8) A ta’an ti’isa ti yeledena dela yelepika, bala la a zaɣesɛ Yehowa nɔɔrɛ. Daaŋɔ san ka paɛ en, bala ta’an basɛ ti a nyaa kãbɛ suure tuna yelegaasa. A ta’an ti’isa ti eŋa kelum pu’usa la Yehowa ge Yehowa kan nam a pu’usegɔ. (Pa. 8:11) Tomam boti la to tara yelemɛŋɛrɛ sɛla woo poan.
Vo’osum Poan Yɛla
it “Ariel” ¶1; it “Ariel” No. 3
Ariel
(Arʹi·el) [Naayinɛ Kaabegɔ Bimbine; bii, Naayinɛ Gbeɣenɛ].
3. La dela wɔ̃sum yu’urɛ ti ba dekɛ bo Yerusalem Isaiah 29:1, 2, 7 poan. Naayinɛ pu’usegɔ yire yuun boi la Yerusalem. Kaabegɔ bimbine la me yuun boi la bilam. Bala zuo la, to wan ta’an yeti Yerusalem yuun dela Naayinɛ kaabegɔ bimbine. Yerusalem tiŋa me yuun nari ti la dɛna la zɛ’an ti ba pu’usa Yehowa la yelemɛŋɛrɛ. Ge yelese’a n boi Isaiah 29:1-4 la tɔɣeri la susa’aŋɔ yele. La tɔɣeri la se’em ma’a ti Babilondoma wan ta sa’am Yerusalem yuun 607 G.Y.B. poan. Sankaŋa la, tiŋa la wan ta ana wuu kaabegɔ bimbine la, se’ere n sɔi la ba wan ku nɛreba la ge nyɔ̃ tiŋa la. Kaalegɔ zɛ’an 9 ta paɛ 16 pa’alɛ la sɛla n sɔi ti ba wan sa’am tiŋa la. Ge Isaiah 29:7, 8 pa’alɛ ti tinse’esi n wan sa’am Yerusalem la puti’irɛ la kan tum.
FEBRUARY 2-8
NAAYINƐ TUULUM YƐLA ISAIAH 30-32
Tara Suure Lua Ti Yehowa Wan Gu Ho
w01-E 11/15 16 ¶7
Yehowa N De To Suka Zɛ’an
7 Yehowa n de to suka zɛ’an la zuo, to tari la subuɣelegɔ la eŋa n yele sɛla la. A yeti: “A wan pin ho la a kɔnberɔ, te ho nyɛ soka zen’an a kelompagehe poan. A sakerɛ sera la wan dɛna ho zaba tɛ’ɛlega, la ho dangoone.” (Yooma 91:4) Yehowa gu’uri to mɛ wuu niiŋa n gu’uri a kɔma se’em la. (Isaiah 31:5) A ni dekɛ la ‘a kɔ̃berɔ pĩ to’ ti dɛŋa da paɛ tɔ. Wuu ton mi se’em la, niiŋa ‘kɔ̃berɔ’ dela a kelumpaɣesi. A kelumpaɣesi la ti a ni dekɛ pĩ a kɔma ti la gu’ura ba ti dɛŋa da paɛ ba. Wuu niiŋa kɔma la, tomam me suɣɛ la Yehowa kelumpaɣesi poan se’ere n sɔi la to dekɛ la tomea delum Yehowa tigere la.—Arut 2:12; Yooma 5:1, 11.
Yehowa Wan Soŋɛ Hɔ Biɣi Biɣi Saŋa Poan
13 Ton nari ti to eŋɛ sɛla. Tiregɛ la ho da yɛlegera homea. To san yɛlegera tomea bɔna to ma’a to nyaa ni kɔ’ɔn ti’isa la to yeledaaŋɔ la yele. Wana wa ta’an basɛ ti to kan tara putɛsonɛ ta’an kɔ’ɛ puti’irɛ. (Mag. 18:1) La boi bim ti saŋa ase’a la ni nara ti to bɔna to ma’a, yele yele wuu yeletooro san paɛ tɔ. Ge to san yɛlegera tomea saŋa woo, la wan ana wuu to zaɣesɛ la Yehowa n boti a doose nɛresɛba poan soŋɛ to se’em la. Bala la, la san puɣum kpe’em bo ho la se’em me yeletooro poan, basɛ ti ho zɔdoma, ho deodoma la keendoma la soŋɛ hɔ. Tɛ̃ra ti Yehowa dole la bamam poan soŋera hɔ.—Mag. 17:17; Isa. 32:1, 2.
‘A Wan Bo Ho Paŋa’
19 Ho wan eŋɛ la wani basɛ ti ho beere sa’am puti’irɛ la ana kankaŋi? Makerɛ, ho san tara puti’irɛ ti ho wan ta vɔna tinparɛ wa zuo, kaala ge ti’isa taɣesa Baabule la n tɔɣɛ Paradiisi n wan ta ana se’em la yele. (Isa. 25:8; 32:16-18) Ti’isɛ bisɛ vom n wan ta ana se’em tinpaalega la poan. Bisɛ nyɛ homea bim. Ho nyɛ la bani? Ho wuni la bem? La ana hon la wani? Ho san bɔta ti ho ti’isɛ soŋa soŋa baŋɛ Paradiisi n wan ta ana se’em, bisɛ fɔɔra la n boi to gɔnɔ poan la bii ho bisɛ vidiyo yuuma n de wuu The New World to Come, Just Around the Corner, bii Imagine the Time. To san ti’isa to beere sa’am yele saŋa woo, to yeledaaŋɔ la ‘kan yue’ ge ana to faɣa faɣa. (2 Ko. 4:17) Yehowa n bo ho beere sa’am puti’irɛ la wan soŋɛ hɔ ti ho ta’an ŋmibe.
Vo’osum Poan Yɛla
Ho Wan Tara Pupeelum Ho San Ma’ɛ Homea Gura Yehowa
Baabule la yeti: ‘Yehowa ma’ɛ la amea gura ti a soŋɛ ya, a wan isige zɔ ya nimbɔ̃’ɔ. Se’ere n sɔi la Yehowa dela tontɔɔ gãkerɛ Naayinɛ. Pupeelum boi mɛ la nɛresɛba n kɔ’ɔn gura en la.’ (Isa. 30:18) Isaiah yuun gulesɛ yele wa bo la Yudadoma sɛba tuba n yuun kpa la. (Isa. 30:1) Ge yele wa yuun dela giilekpeŋere bɔ’ɔra Yudadoma sɛba n yuun kelum tara yelemɛŋɛrɛ la. Yele ana wa kpemeseri Yehowa yamesi n tari sakerɛ zina beere wa me giila mɛ.
Bala la, la nari ti to ma’ɛ tomea gura se’ere n sɔi la Yehowa ma’ɛ amea gura mɛ. Yehowa mi sansɛka ti a wan sa’am tingɔŋɔ wa, a me guri la de daarɛ la saŋa la. (Mt. 24:36) Sankaŋa la, la wan niɛ peelumi pa’alɛ Yehowa yamesi za’a ti Sitaana n tɔɣɛ Yehowa yele se’em la dela pumpɔreŋɔ. A nyaa wan sa’am Sitaana la sɛba woo n pa a poore la ge ‘zɔ to nimbɔ̃’ɔ.’
FEBRUARY 9-15
NAAYINƐ TUULUM YƐLA ISAIAH 33-35
‘Eŋa N De Ho Ɛ̃berɛ Ti Ho Yaɣa’
Yehowa Wan Soŋɛ Hɔ Biɣi Biɣi Saŋa Poan
7 Yeledaaŋɔ la. Yeletooro san paara tɔ to itigɔ la to ti’isegɔ ni tee mɛ. La ta’an basɛ ti la ana to wuu komi’isi n ni tara ɔɔreŋɔ yɛɣelena se’em la. Ana ti to puɣum tɔɣɛ a yele la yeti, Luis n yuun ki la yɛla zo’e zo’e n yuun daani en ti a suure sa’am. A yeti: “Saŋa ase’a mam suure n ni sa’am ti mam fabela bɔ’ɔra n mea. Mam sunsɔa n yuun ni nyie la eŋa n ka le bɔna la.” Leyɛ’ɛsa, la yuun daam Ana mɛ paa la eŋa n yuun nari ti a kɔ’ɛ puti’irɛ tum tuunse’a ti Luis yuun tuna la. Saŋa ase’a, la yuun ani en wuu komi’isi n tari ɔɔreŋɔ yɛɣelena se’em la. Yehowa soŋeri to la wani yɛla n gaŋɛ nu’usi san paara tɔ?
8 Yehowa n iti sɛla. A yele to yeti a wan basɛ ti to ze’a kankaŋi. (Kaalɛ Isaiah 33:6.) Komi’isi san ŋmɛ’ɛra ɔɔreŋɔ, ɔɔreŋɔ la ni yɛɣelena mɛ ti la dɛna dɛŋa. Ɔɔreŋɔ san wan ta’an ze’a kankaŋi kan yɛɣelena, ba ni dekɛ la sɛla n ani wuu vuga basɛ ko’om la poan. Vuga wa ni basɛ ti ɔɔreŋɔ la ka yɛɣelena ti sɛba me n boi bim la ni bɔna la fai. Ge vuga wa san wan basɛ ti ɔɔreŋɔ ze’a kankaŋi kan yɛɣelena, la dela ɔɔreŋɔ la kelum kena. Bala mea nɔɔ, to san kelum pu’usa Yehowa to daaŋɔ la poan, a wan basɛ ti to ze’a kankaŋi.
w21.02-E 29 ¶10-11
Hon Wan Eŋɛ Se’em Kelum Tara Pupeelum Yeledaaŋɔ Poan
10 Sɛla n wan soŋɛ hɔ: Zusɛ Yehowa ti a bo ho yɛm. To san wan ta’an ŋmibe yeledaaŋɔ poan la pupeelum, la nari ti to deŋɛ nɛŋa zusɛ Yehowa ti a bo to yɛm ti to ta’an kɔ’ɛ to puti’irɛ soŋa. (Kaalɛ Yames 1:5.) To wan eŋɛ la bem la san ana to wuu Yehowa ka lebese to zusega la kalam? Yames yeti to ‘kɔ’ɔn sɔkera’ Naayinɛ. Yehowa sunsɔa kan nyie to san kɔ’ɔn zusa ti a bo to yɛm. A kan zɛregɛ tɔ. To san zusɛ to saazuo Sɔ la ti a bo to yɛm ti to ta’an ŋmibe to yeledaaŋɔ la poan, a wan bo to. (Ym. 25:12, 13) A nyɛti to yeledaaŋɔ la, tara giile bɔ’ɔra tɔ ge me kɔ’ɔn bɔta ti a soŋɛ tɔ. Wana wa zuo to tari la pupeelum! Ge Yehowa bo’ori to yɛm la wani?
11 Yehowa ni doose la Baabule la poan bo to yɛm. (Mag. 2:6) To san bɔta ti to tara yɛm, la nari ti to zamesa Naayinɛ Yetɔɣum la, la tigere la gɔnɔ. Ge la daɣɛ to yeen ɛɛra mi’ilum ma’a. To san tara ton zamesɛ sɛla la tuna tuuma, la pa’alɛ ti to tari la Naayinɛ yɛm la. Yames gulesɛ yeti: “Da kɔ’ɔn kelehe ya kelehego ma’an ge ete ya sɛla te Na’ayenɛ yɛla la bɔta te ya eta la.” (Yam. 1:22) To san tara Naayinɛ pa’alegɔ tuna tuuma, to wan dɛna sɛba n boti suma’asum, tara bɔkerɛ ge me zɔta nɛreba nimbũ’ɔ. (Yam. 3:17) Halɛ ana wa n soŋeri tɔ ti to ŋmibera yeledaaŋɔ poan ge tara pupeelum.
ip-1-E 352-355 ¶21-22
‘Nɛra Ka Boi N Wan Ta Yeti: ‘Mam Bɛ̃’ɛri Mɛ’’
21 Ge Isaiah yetɔɣebiŋ’a la tuni tuuma mɛ tomam saŋa wa. Yehowa nɛreba n boi zina beere wa nyɛ tibegɔ mɛ vo’osum poan. Ba nyaa boi la fai pumpɔreŋɔ pa’alegɔ poan maɣesɛ wuu sia la n ka kiiri, Trinitaasuŋa, la tinmɔlega bugum. Ba nyɛti la pa’alegɔ n soŋeri ba ti ba tara sarensoŋɔ ge me ni kɔ’ɛ ba puti’irɛ soŋa yɛla poan. Yezu Krista lua kaabegɔ la zuo, ba tari la bɔnsoŋa la Naayinɛ ge me tara putɛkeeŋa n ani fa’a. (Kolose 1:13, 14; 1 Peter 2:24; 1 Yon 4:10) Vo’osum poan tibegɔ wa soŋeri to mɛ. Makerɛ, Kristakɔma n ka tuni yalumtuuma ge me ka dita taba la, gu’uri ba mɛ bãyaalesi la ɔberega bã’asi ase’a poan.—1 Korint 6:18; 2 Korint 7:1.
22 Leyɛ’ɛsa, Armagedon pooren Isaiah 33:24 wan tum tuuma ti la ka tara makerɛ. Mɛzaaya Na’am bisega la poan, nɛresaaleba wan ta tara imma’asum, la vo’osum poan tibegɔ. (Liligere 21:3, 4) Ba san sa’am Sitaana tingɔŋɔ wa ba’asɛ, yelenyalema se’a ti Yezu yuun eŋɛ se’em ma’a ti a bɔna tingɔŋɔ wa zuo la, wan ta eŋɛ zɛ’an woo. Fɔɔsi wan ta nyɛta, wasi tuba wan yu’usi, kɔɔrenɔ wan kena! (Isaiah 35:5, 6) Wana wan basɛ ti sɛba za’a n wan pĩɛ mɛlesekãtɛ la ta laɣum soŋɛ ti to maalɛ tingɔŋɔ la ti la lebege paradiisi.
Vo’osum Poan Yɛla
Kɔ’ɔn Bɔna ‘Zilam Sore La’ Zuo
8 Nɛreba basɛba ta’an yeti, ‘Bala dela yelepakerɛ ge sɛla n yuun eŋɛ Yuda nɛreba diimi sa la pa’alɛ to la bem zina beere wa?’ La tari sɛla n wan pa’alɛ tɔ se’ere n sɔi la, yelese’a ti tomam me ita la pa’alɛ ti tomam me boi la ‘Zilam Sore La’ zuo. To de loore Kristakɔma bii pisena la woo, la dela to kɔ’ɔn bɔna ‘Zilam Sore La’ zuo. Sore la wan soŋɛ tɔ ti to pu’usa Yehowa nananawa ta paɛ beere sa’am ti to nyɛ Na’am la poan kã’a tingɔŋɔ wa zuo. (Yon 10:16) Kɔ’ɔn pɔsɛ yuun 1919 Y.B. poan, nɛreba tustusa n de pɔɣesi, buraasi la kɔma basɛ Babilon Kãtɛ la mɛ n de tingɔŋɔ wa za’a pumpɔreŋɔ pu’usegɔ la ge nyaa bɔna vo’osum poan sore wa zuo. Daanse’ere ho me laɣum pa’asɛ ba poan mɛ. Ba yuun puɣum te’ele maalɛ sore wa mɛ yuun kɔbesi pooren ge ti nɛreba nyaa pɔsɛ kena de zuo.
FEBRUARY 16-22
NAAYINƐ TUULUM YƐLA ISAIAH 36-37
‘Da Zɔta Dabeem La Yelese’a Ti Ho Wum La’
it “Hezekia” No. 1 ¶14
Hezekia
Senakerib N Lu Se’em Yerusalem. Hezekia yuun mi ti Senakerib lu la a suure ti a wan zabɛ la Yerusalem. Se’em ma’a ti Senakerib la a soogɛpa ta kaɛ Lakis tiŋa n tari paŋa la, a yuun tum la a kpɛ’ɛndoma, la a soogɛpa basɛba ti ba keŋɛ ta yele Yerusalemdoma la ti ba basɛ bamea bo ba. Se’em n yuun bo ba nɛŋa tɔɣera yuun dela Arabsake (daɣɛ amea yu’urɛ n bala ge la dela a soogɛa na’asegɔ yu’urɛ), n yuun tɔɣeri Hebru yetɔɣum la wai wai. A yuun ɛ̃regɛ la Hezekia ge zɛregɛ Yehowa, ŋmɛ’ɛra a nyũ’ɔ ti Yehowa kan nyaŋɛ fãɛ Yerusalem wuu tisi la yina n ka nyaŋɛ fãɛ ba nɛreba la Asiria naba nu’usin la.—2Na 18:13-35; 2Ye 32:9-15; Isa 36:2-20.
ip-1-E 387 ¶10
Yehowa Yuun Kã Bo La Naba N Tari Sakerɛ
10 Leyɛ’ɛsa, Arabsake yuun tĩɛ Yudadoma la ti ba soogɛpa la pɔ’ɛ mɛ Asiriadoma la nɛŋan. A yuun ŋmɛ la a nyũ’ɔ yele ba yeti: “Mam wan bo ya yiri tuha ayi la [n] behɛ nya ya han wan nyaŋɛ tara pɛɛntɛɛnreba n zo’e wan ta’an ban yiri la.” (Isaiah 36:8) Ge la yele ka pakɛ, Yudadoma la san tara pɛɛntɛɛreba zo’e bii ba ka tari. Se’ere n sɔi la, daɣɛ ba soogɛpa n tari paŋa se’em n wan fãɛ ba basɛ. Magaha 21:31 tɔɣɛ pa’alɛ ti: “Pɛɛntɛɛnra maahom la a yeho gura zaberɛ daarɛ, ge nyaŋerɛ la ze’ete la Na’ayenɛ zen’en na.” Arabsake yuun yeti Yehowa boi mɛ la Asiriadoma la ge daɣɛ Yudadoma la. San daɣeni bala, Asiriadoma la kan nyaŋɛ kɛ̃ ni Yuda tiŋa.—Isaiah 36:9, 10.
ip-1-E 388 ¶13-14
Yehowa Yuun Kã Bo La Naba N Tari Sakerɛ
13 Arabsake yuun le tɔɣɛ la sɛla pa’alɛ bamam n tari paŋa se’em. A yuun kaɣɛ Yudadoma la ti ba da sakɛ bo Hezekia n yeti: “Na’ayenɛ wan fan ya bahɛ.” Arabsake yuun tĩɛ Yudadoma la ti Samaria tiŋa yina yuun ka nyaŋɛ gu Asiriadoma ti ba da zabɛ nyaŋɛ buuri pia sɔ’ɔlum la. Ge tinse’a ti Asiriadoma zabɛ nyaŋɛ ba la yina ta’an gu ba mɛ yoi? A yeti: “Hamat, la Arpad, Separvaim teŋa yena la? Samaria teŋa [yina] la daa nyaŋɛ fan ba teŋa la Asiria teŋa pɛɛntɛɛnreba la nu’uhen?”—Isaiah 36:18-20.
14 Yelemɛŋɛrɛ la dela, Arabsake n kaaberi baga la yuun ka bɔkɛ ti Samaria tiŋa n yuun zaɣesɛ Yehowa la boi la de to’ore la Yerusalem tiŋa ti Hezekia yuun bisera la. Samaria tiŋa pumpɔreŋɔ yina la yuun ka tari paŋa n wan ta’an fãɛ buuri pia sɔ’ɔlum la basɛ. (2 Na. 17:7, 17, 18) Ge Yerusalem tiŋa ti Hezekia bisa la ka kaaberi baga ge ba tuɣum pu’usa la Yehowa. Ge nɛreba batã ti Hezekia tum ba la yuun ka tɔɣɛ bala pa’alɛ Arabsake. “Kpɛ’ɛndoma la woo sini me digi digi. Se’ere n sɔe la, naba la daa yele ba yeti, da ta lebehe ya se’ere.” (Isaiah 36:21) Eliakim, Sebna, la Yoa yuun lebe la Hezekia zɛ’an ta yele en sɛla woo ti Arabsake tɔɣɛ la.—Isaiah 36:22.
Vo’osum Poan Yɛla
it “Gareŋerɛ” ¶4
Gareŋerɛ
Yehowa yuun yele Asiria Naba Senakerib yeti: “N wan dekɛ n baŋa tun ho nyɔrɛ poan ge dekɛ [gareŋerɛ] lɛ ho nɔɔrɛn. N wan ve’e ho te ho lebe doohe hom n doohe zen’an na la lebe.” (2Na 19:28; Isa 37:29) La daɣɛ Senakerib mea puti’irɛ poan ti a lebe ge la dela Yehowa paŋa la n yuun pɛ̃regɛ en ti eŋa la a soogɛpa la yese Yerusalem lebe Nineveh. Pooren, ti amea dayɔɔsi ku en. (2Na 19:32-37; Isa 37:33-38) Yehowa n yeti a dekɛ gareŋerɛ gba a dindoma nɔɔren la, ani wuu ban ni dekɛ gareŋerɛ gba duŋa nɔɔren ge pa’ala eŋa n wan eŋɛ se’em la. Bala mea ti Yehowa wan tara paŋa a dindoma la zuo.—Isa 30:28.
FEBRUARY 23–MARCH 1
NAAYINƐ TUULUM YƐLA ISAIAH 38-40
‘A Wan Bisera A Piisi Wuu Dunkeena La’
Baabule La N Pa’alɛ Ku Daana Se’em
3 Kaalɛ Isaiah 40:8. Yuuma zo’e zo’e n wana ti Naayinɛ Yelesum la pa’ala nɛreba n tari sakerɛ. Ku eŋɛ la wani ta’an ita bala? Sokesonɛ n bala. Se’ere n sɔi la, ba yuun gulesɛ Baabule la eŋɛ la lɔɣeseto n ka yuuri ge sa’ana poan. Bala zuo la, ban yuun gulesɛ eŋɛ lɔɣeseto poan la ka boi zina beere wa. Ge Yehowa yuun basɛ ti ba malum gulesɛ Baabule la mɛ biŋe. La boi bim ti sɛba n yuun malum gulesa Baabule la ka di mi’a ge ba yuun ma’ɛ la bamea gulesa nima nima. Gɔnmi’ila ayima tɔɣɛ Hebru Gulesegɔ la yele yeti: “Diimi gɔŋɔ ka boi ti ba malum gulesɛ ku nima nima wuu Baabule la.” Diimi sa la, ba yuun gulesɛ Baabule la, eŋɛ la lɔɣeseto n ka yuuri ge sa’ana poan. Sɛba me n yuun malum gulesa ku la ka di mi’a ge to tari puti’irɛ ti sɛla n boi Baabule la poan zina beere wa la, dela Yehowa puti’irɛ.
4 Yehowa n bo’ori to ‘sɛla woo n ani soŋa.’ (Yam. 1:17) Baabule la dela bo’olum n di mi’a ti Yehowa dekɛ bo to. Nɛra san bo to bo’olum, la pa’alɛ ti a mi yelese’a n pakɛ to mɛ soŋa soŋa. Bala dela yelemɛŋɛrɛ la Mina n bo to Baabule la. To san zamesa Baabule la, to wan baŋɛ Yehowa yɛla zo’e zo’e. To me wan baŋɛ ti a mi yelese’a n pakɛ to mɛ soŋa soŋa. Zaseŋɔ wa poan, to wan sɔsɛ Baabule la n pa’alɛ Yehowa hala atã yele se’em: a yɛm, a tontɔɔ gãkerɛ, la a nɔŋerɛ la. Yia la, basɛ ya ti to sɔsɛ ya Baabule la n pa’alɛ Naayinɛ yɛm yele se’em.
cl-E 70 ¶7
‘Naayinɛ N De To Suka Zɛ’an’ Ge Tɛ’ɛla To La A Paŋa
7 Yehowa dekɛ amea makɛ la dunkeena. Wana basɛ ti to tara suure lua ti Yehowa kɔ’ɔn bɔta la a te’ele to. (Ezekiel 34:11-16) Gɔŋɔ wa a zuo 2 pa’alɛ la Isaiah 40:11 n tɔɣɛ Yehowa yele se’em yeti: “Wo ugura en behere a dunhe se’em la, a wan behera a nɛreba la la bala. A wan ɔnbera pebibihe la [buke].” Sarɔkuni poan ti dunkeena wan ta’an nyɔkɛ pebila ‘buke’? Pebila la ta’an keŋɛ paɛ dunkeena la ge tara amea duura dunkeena la nama. Ge la dela dunkeena la n wan dɔbelɛ ge nyɔ̃kɛ pebila la, nyaa buke en baalam. Yele wa basɛ ti to baŋɛ ti Yehowa n de to Dunkeena la kɔ’ɔn bɔta la a tɛ’ɛla tɔ!
w18.01-E 8 ¶4-6
“Na’ayenɛ N Bo’ore Sɛba N Taregɛ Paŋa”
4 Kaalɛ Isaiah 40:26. Nɛra ka boi n nyaŋɛ kaalɛ ŋmarebibisi n boi. Naaŋɔ lɔɣɔrɔ zamesegɔdoma sakɛ ti to Milky Way galaxy la ma’a ta’an tara ŋmarebibisi n paɛ tusetuse tusa 400. Ge Yehowa bo ŋmarebila woo yu’urɛ bii daalesum mɛ. Wana wa pa’alɛ to la bem? Yehowa san fabela a naaŋɔ lɔɣɔrɔ n daɣɛ asaaleba yele, nyaa ti’isɛ bisɛ eŋa n fabeli hon pu’useri en la yele se’em! Hon nɔŋɛ Yehowa la zuo ti ho pu’usa en ge daɣɛ a pɛ̃regɛ ho mɛ. (Ym. 19:1, 3, 14) To nɔŋerɛ Sɔ la mi ho mɛ soŋa soŋa. Baabule la yeti: “Ho zuo zonto tare kaanlɛ mɛ.” (Mt. 10:30) Yoomadaana la basɛ ti to tara suure lua ti: ‘Yehowa mi daaŋɔ se’a n paarɛ sɛba n ka tari tuure la mɛ.’ (Ym. 37:18) Yelemɛŋɛrɛ la dela, a mi daaŋɔ se’a woo n paari ho la ge me wan bo ho paŋa ti ho ta’an ŋmibe ba poan.
5 Kaalɛ Isaiah 40:28. Yehowa n de paŋa za’adaana. To geele pansɛka ti a dekɛ bo wuntɛɛŋa la ma’a. David Bodanis n guleseri naaŋɔ lɔɣɔrɔ yɛla yeti: “Kiki woo pansɛka n ni ze’ele wuntɛɛŋa poan yese la zuni la pansɛka n boi [atomic bombedoma tusetuse tusa] poan.” Nɛra ayima me n iti viisegɔ pa’alɛ ti “kiki woo pansɛka n ni ze’ele wuntɛɛŋa poan yese na la, nɛresaaleba wan ta’an dekɛ tum tuuma yuuma 200,000”! Nɔkpe’ene kai ti, Se’em n bo’ori wuntɛɛŋa paŋa la wan ta’an bo to paŋa ti to ŋmibera yeledaaŋɔ woo poan.
6 Kaalɛ Isaiah 40:29. To san pu’usa Yehowa to tari la pupeelum zo’e zo’e. Yezu yuun yele a podɔleba la ti: “Dekɛ ya n yɔka yɔgɛ ya mɛhe.” A le yeti: “Ya wan nyɛ vo’ohogo. Se’ere n sɔe la, mam yɔka la ka tɔe, mam zeero me ka tebegɛ.” (Mt. 11:28-30) Bisɛ lan de yelemɛŋɛrɛ se’em! Saŋa ase’a tɔregɔ ta’an ni paɛ tɔ to san yɛ’ɛsa tansugere zamesegɔ bii na’am mɔɔlegɔ. Ge la ni ana to la wani to san lebe yire? La ni ana to la lama lama ge me ni bo to paŋa ti to ta’an ŋmibe yeledaaŋɔ la poan. Yezu yɔka la sirum ka tɔi!
Vo’osum Poan Yɛla
ip-1-E 400 ¶7
“Kpemehe Ya Mam Nɛreba Wa”
7 Yetɔɣebiŋere wa yuun ka tum tuuma la yuun kɔbesɛka n pa’asɛ buyoobi G.Y.B. poan ma’a. La yuun le tum tuuma la yuun kɔbesɛka n deŋɛ nɛŋa Y.B. poan. Yon Ko’om Musegadaana la n de se’em n yuun ‘mɔɔli pɔɣetia poan la,’ ti la basɛ ti Isaiah 40:3 tum tuuma. (Luke 3:1-6) Vo’osum la yuun basɛ ti Yon dekɛ la Isaiah yetɔɣum la tɔɣɛ amea yele. (Yon 1:19-23) Kɔ’ɔn pɔsɛ yuun 29 Y.B. ti Yon pɔsɛ maalɛ sore bo Yezu Krista. Yon n yuun deŋɛ tɔɣɛ Mɛzaaya la yele la yuun basɛ ti nɛreba kɔ’ɔn gura Mɛzaaya la mɛ ti ba kelese en ge me dɔla en. (Luke 1:13-17, 76) Yehowa wan doose Yezu poan faaɛ sɛba n basɛ ba be’em la ti ba bɔna fai Naayinɛ Na’am la poan. A wan faaɛ tɔ be’em la kum poan basɛ. (Yon 1:29; 8:32) Isaiah yele la yuun tum tuuma za’a za’a, se’em ma’a ti vo’osum poan Israel la yuun faaɛ bamea Babilon Kãtɛ la poan yuun 1919 la. Sankaŋa ti yelemɛŋɛrɛ pu’usegɔ le bɔna.