“ Teregɛ Ya Mɛ La Ya Tara Nɔyenɛ La Te Sea La Bɔ’ɔra” La
TUNTUNA PAUL yuun kpemese Kristakɔma n boi Epesus giila ti ba “tara suguru daarɛ woo. Ge da ihegera suunre tɔtɔ la taaba nɔŋerɛ zuo. Teregɛ ya mɛ la ya tara nɔyenɛ la te Sea la bɔ’ɔra doohe la sunma’ahom sebo te ya tara la.”—Ep. 4:2, 3.
To tara “nɔyenɛ” la ti “Sea la bɔ’ɔra” to la. Wana wa pa’alɛ ti zilam vo’osum la n basɛ ti to tara nɔyinɛ. Wuu Paul n pa’alɛ se’em la, la nari ti to tiregɛ ta’an basɛ ti nɔyinɛ la kelum bɔna. Bani n nari ti ba eŋɛ bala? Yelemɛŋɛrɛ, la dela Kristabia woo ‘tiregɛ la a kelum tara nɔyinɛ la ti vo’osum la bɔ’ɔra’ la.
To makɛ yeti nɛra n bo ho lopaalega. Hon ti’isɛ ti ani n nari ti a bisera loore wa ti ku ana soŋa? Lebesego la kɔ’ɔn niɛ peelumi mɛ. Loore la san sa’am ti ho ka ta’an maalɛ ka, la ka nari ti ho nyɔna mina n bo ho loore wa la.
Bala mea nɔɔ, la boi bim ti Kristakɔma n tari nɔyinɛ la dela Naayinɛ bo’olum ge la dela tomam ayima ayima woo kelum tiregera ti nɔyinɛ la bɔna. Tomam la to mabia san tara yele la taaba, la nari ti to soke tomea yeti, ‘Mam tiregeri ti n maalɛ yele la ge basɛ ti nɔyinɛ sɛka ti vo’osum la bɔ’ɔra to la kelum bɔna?’
‘KƆ’ƆN TIREGERA’ TI NƆYINƐ LA KELUM BƆNA
Wuu Paul n pa’alɛ se’em la, la nari ti to tiregɛ basɛ ti nɔyinɛ la ti vo’osum la bɔ’ɔra to la kelum bɔna. Bala wan nara yele yele wuu mabia san eŋɛ to sɛla ti la daam tɔ. Nɛra san eŋɛ to sɛla ti la daam tɔ, la nari ti to tɔɣɛ lan ani to se’em bo en ta’an basɛ ti nɔyinɛ bɔna? La yele ka ba’ɛ pakɛ. Soke homea yeti, ‘Mam san eŋɛ bala, la wan basɛ ti yele la maalɛ bii la wan tuɣum sa’am yele la gaŋɛ la bala?’ Saŋa ase’a yɛm boi bim ti to di sugeri bo nɛra la ge basɛ ti la ba’asɛ.—Mag. 19:11; Mr. 11:25.
Soke homea yeti, ‘Mam san eŋɛ bala, la wan basɛ ti yele la maalɛ bii la wan tuɣum sa’am yele la gaŋɛ la bala?’
Wuu tuntuna Paul n yuun yele se’em la, basɛ ya ti to “da ihegera suunre tɔtɔ la taaba nɔŋerɛ zuo.” (Ep. 4:2) Gɔŋɔ kayima yeti yelesum wa vuurɛ ta’an le dɛna ti “to sakɛ ti ban ani se’em n bala.” Bala pa’alɛ ti to sakɛ ti to mabiisi la tuuri mɛ wuu tomam la. Yelemɛŋɛrɛ, to za’a tiregeri mɛ ti to ta’an tara ‘halepaalega la.’ (Ep. 4:23, 24) Ge to kan ta’an eŋɛ sɛla woo nima nima. (Arom 3:23) To san sakɛ yele wa, la kan kpe’em bo to ti to di’isa suure la taaba, dita sugeri bɔ’ɔra taaba ge me “tara nɔyenɛ la” taaba.
To san tiregɛ maalɛ tomam la to mabiisi tiŋasuka yeledaaŋɔ, to wan ‘tara suma’asum sebo n basɛ ti to tara nɔyinɛ la.’ Greek yelebire la ti ba lerege ti ‘suma’asum sebo’ ti la bɔna Epesus 4:3 la dela “giinla” ti Kolose 2:19 tɔɣɛ de yele la. Giila n ni basɛ ti kɔ̃ba toŋe taaba. Bala mea nɔɔ ti suma’asum la nɔŋerɛ soŋera tɔ ti to ana du’a du’a la to mabiisi la, hali to san tara daaŋɔ la taaba.
Bala la, mabia san tue to ti to sunsɔa nyie, tiregɛ tara giile bɔ’ɔra en ge daɣɛ ho tuɣum bisa a tuure yɛla la. (Kol. 3:12) To za’a n ka di mi’a la zuo, daanse’ere hon me tabelɛ eŋɛ sɛla daam nɛra mɛ. To san tɛ̃ra wana, la wan soŋɛ tɔ ti to ‘tara suma’asum sebo n basɛ ti to tara nɔyinɛ la.’