To Wan Zusa Se’em—Zusega Boi Gana To Daana La N Pa’alɛ Ton Wan Zusa Se’em La?
Baabule la lebesego
To Daana zusega la pa’alɛ to la to wan zusa se’em la yelese’a ti to wan zusa ɛɛra. Yezu podɔleba la n yuun soke en yeti: “To daana, pa’alɛ tɔ to wan zusa se’em la,” ti a yuun bo ba lebesego. (Luke 11:1) Ge to san dekɛ to Daana Zusega bii To Saazuo Sɔ zusega la biŋe kinkɛleŋa, Naayinɛ kelese zusega ase’a mɛ.a Yezu pa’alɛ tɔ la ton wan zusa se’em ti Naayinɛ kelese to.
Zaseŋɔ yele wa poan
To Daana Zusega la tɔɣɛ la bem yele?
Ban gulesɛ to Daana Zusega la ti la bɔna Matu 6:9-13 Baabule leregere zo’e zo’e poan la, boi la de to’ore. Makerɛ ayi n wana.
New World Translation: “To Sɔ n boi saazuo sa, basɛ ti ho yu’urɛ la ana zilam. Basɛ ti ho Na’am la wa’ana. Basɛ ti ho puti’irɛ n boti sɛla la tum tingɔŋɔ wa zuo wuu saazuo la. Bo to zina dabeserɛ wa dia; ge di sugeri bo to, wuu tomam me n di sugeri bo basɛba se’em la. Da tari to keŋɛ gurebisɛ poan ge faaɛ tɔ putɔya la nu’usin.”
King James Version: “To sɔ n boi saazuo sa, ho yu’urɛ la nari pɛka, ho sɔ’ɔlum wa’ana, ho sunboolom tum tiŋa wa zuo woo la ani se’em saazuo sa la. Bo to zina dabeserɛ dia. Basɛ to be’em bo to wuu tomam n diti sugeri bɔ’ɔra to taaba se’em la. Da tara to keŋɛ pã’asɛ be’ero poan ge to’e to be’emdaana la nu’usin basɛ.”b
To Daana Zusega la vuurɛ?
Yezu pa’alegɔ la makɛ taaba mɛ la Baabule la bɔba la za’a. Bala, to wan bisɛ sore sɛka poan ti Baabule la bɔba ase’a wan ta’an basɛ ti to bɔkɛ to Daana Zusega la.
“To Sɔ n boi saazuo sa”
La nari mɛ ti to yi’ira Naayinɛ ti “to Sɔ” se’ere n sɔi la, eŋa n naam tɔ ge bo to vom.—Isaiah 64:8.
“Basɛ ti ho yu’urɛ la ana zilam”
La nari ti to na’asa Naayinɛ yu’urɛ Yehowa la ge basɛ ti la dɛna zilam bii fa’a. Nɛresaaleba wan ta’an basɛ ti Naayinɛ yu’urɛ la ana zilam ba san pa’ala a hala la a puti’irɛ n de se’em bɔ’ɔra nɛreba.—Yooma 83:18; Isaiah 6:3.
“Basɛ ti ho Na’am la wa’ana”
Naayinɛ Na’am la dela saazuo gɔmɛt ti Yezu dɛna bu Naba. Yezu yuun pa’alɛ tɔ ti to zusɛ ti gɔmɛt kana wa wa’ana sɔna tingɔŋɔ wa za’a bisera.—Daniel 2:44; Liligere 11:15.
“Basɛ ti ho puti’irɛ n boti sɛla la tum tingɔŋɔ wa zuo woo saazuo la”
Wuu be’em la kum n ka boi saazuo se’em la, Naayinɛ n boti sɛla dela tingɔŋɔ wa zuo nɛreba vɔna daarewoo ge tara suma’asum la gu’a.—Yooma 37:11, 29.
“Bo to zina dabeserɛ wa dia”
La nari ti to tɛ̃ra ti, to Naaŋɔdaana la n bo’ori to dia la sɛla woo n pakɛ tɔ ti to ta’an vɔna.—Tooma 17:24, 25.
“Di sugeri bo to, wuu tomam me n di sugeri bo basɛba se’em la”
Asaaleba za’a waabi tuuri mɛ ge nara ti ba di sugeri bo to. Ge to san bɔta ti Naayinɛ di sugeri bo to, la nari ti tomam me di sugeri bo taaba ba san tue to.—Matu 6:14, 15.
“Da tari to keŋɛ gurebisɛ poan ge faaɛ tɔ putɔya la nu’usin”
Yehowa Naayinɛ ka dekɛ be’em guta to bisa. (Yames 1:13) Ge Sitaana Kolekpabɛ’a la n de “putɔya la,” se’em ti ba le yi’ira ti “Gurebisɛdaana la” n ni gurɛ to bisɛ. (1 Yon 5:19; Matu 4:1-4) To zuseri Yehowa ti a soŋɛ tɔ ti to da basɛ to sakerɛ la, ba san gurɛ to bisɛ ti to da nana en.
Naayinɛ keleseri la to Daana Zusega la ma’a?
Yezu yuun dekɛ Daana Zusega la eŋɛ la makerɛ. La daɣɛ ti to taɣesa yelebɛa ayima ayima woo. Ge ti Yezu pa’alɛ Daana Zusega la, a yuun ka’am ba mɛ ti: “Ya san zusa, da tɔɣeri ya yele yinɛ taɣesa.” (Matu 6:7) Saŋa ase’a ti a yuun le zusɛ la, eŋa n yuun dekɛ yelebɛa se’a tum tuuma la yuun boi la de to’ore.—Luke 11:2-4.
Sore sɛka n ani soŋa ti to wan ta’an doose zusa dela, ton wan dekɛ tomea yɛla n ze’ele to suure poan zusa.—Yooma 62:8.
To wan zusa la wani?
To Daana Zusega la dela makesonɛ bo to ti to wan nyaŋɛ doose zusa ti Naayinɛ kelese. Bisɛ lan makɛ la Baabule gulesegɔ se’a n tɔɣeri zusega yele se’em.
Zusa Naayinɛ ma’a
Gulesegɔ: “Sɛla woo poan doose ya zusega la beleŋo la pɛ̃ka poan ta’an basɛ ti Naayinɛ baŋɛ ya boti sɛla.”—Filipi 4:6.
Vuurɛ: La nari ti to zusa Naayinɛ ge daɣɛ Yezu, Mari bii saints. Wuu Yezu n pɔsɛ yeti, “To Sɔ,” Daana Zusega la poan la pa’alɛ tɔ ti, la nari ti to zusa Yehowa Naayinɛ ma’a.
Zusɛ ti la dɔla Yehowa Naayinɛ n boti sɛla
Gulesegɔ: “To san yeen zusɛ en sɛla ti la makɛ la a puti’irɛ, a keleseri to mɛ.”—1 Yon 5:14.
Vuurɛ: To ta’an zusa sɛla woo n makɛ la Naayinɛ puti’irɛ n boti sɛla. Yezu yuun pa’alɛ ti Naayinɛ n boti sɛla yele pakɛ mɛ la eŋa n yuun yeti, “basɛ ti ho puti’irɛ n boti sɛla la tum,” Daana Zusega la poan la. To ta’an zamesɛ baŋɛ Naayinɛ puti’irɛ n de sɛla bɔ’ɔra tingɔŋɔ wa la asaala doose la to wan zamesa Baabule la.
Zusɛ ɛɛra yelese’a n pakɛ hɔ
Gulesegɔ: “Dekɛ ho yeledaaŋɔ za’a bo Yehowa ge a wan soŋɛ ho.”—Yooma 55:22.
Vuurɛ: Naayinɛ mi yelese’a n pakɛ to mɛ. Wuu Yezu n yuun tɔɣɛ yɛla zo’e zo’e n yuun pakɛ nɛreba Daana Zusega la poan se’em la, tomam me ta’an zusa ɛɛra yelese’a n pakɛ tɔ, ti a soŋɛ tɔ ti to ta’an kɔ’ɛ to puti’irɛ soŋa, a soŋɛ tɔ yeledaaŋɔ san paɛ tɔ ge me di to be’em sugeri bo to.c
a Makerɛ, Yezu la a podɔleba la yuun zusɛ zusega ase’a mɛ ge ka yi’ira Daana Zusega la poan yelebire woo taɣesa.—Luke 23:34; Filipi 1:9.
b King James Version la ki’ilum Daana Zusega la yeti: “Hon sɔi sɔ’ɔlum la, la kpe’eŋo la na’asegɔ daarewoo. Amen.” Ba yi’iri yele wa ti ba tɔɣɛ pɛɣɛ Naayinɛ la ti doxology. Yele wa boi Baabule ase’a poan mɛ. Ge The Jerome Biblical Commentary la yeti: “Doxology la . . . ka boi diimi Gulesegɔ la poan.”
c Sɛba n bisɛ ti la nari ti Naayinɛ di sugeri bo ba la kan nɔŋɛ ti ba zusa. Ge Yehowa yele nɛrebana taaba yeti: “Wa’an ya na ti to maalɛ to yɛla la.” (Isaiah 1:18) A kan zaɣesɛ sɛba n yese ba suuren poan zusa ti a di sugeri bo ba la.