Ho Wa Nyaŋɛ Baŋɛ Yelemɛŋɛrɛ Pu’usegɔ La

Ho san bɔta ti ho dɛna Naayinɛ zɔ, la nari ti ho dɔla pu’usegɔ sɛko ti a nini teɣɛ. Yezu yun yeti: “Sɛba n seren na’ahere to Sɔ la wan ta na’aha en . . . yelemɛŋɛrɛ poan.” (Yon 4:23, 24) Sore deyina ma’a n boe ti to wan ta’an doose pu’usɛ Naayinɛ. (Epesus 4:4-6) Yelemɛŋɛrɛ pu’usegɔ wan boto daarewoo vom ge punpurɔŋɔ pu’usegɔ tare to yɛ’ɛsa la sa’aŋɔ poan.—Matu 7:13, 14.

Ho wan ta’an dekɛ nɛreba itigɔ poan baŋɛ ti ba dɔle la yelemɛŋɛrɛ pu’usegɔ. Sɛba n de yelemɛŋɛrɛ pu’usegɔdoma la nari ti ba dɛna la nɛresondoma, wu Yehowa n ane se’em la. Maɣese wuu munkɔ tisoŋa n wɔni munto soma se’em la, yelemɛŋɛrɛ pu’usegɔ mɛ teere nɛreba soŋa soŋa la bala. —Matu 7:15-20.

Yehowa zɔdoma tare la gilema bɔ’ɔra Baabule la. Ba mi ti Baabule la dela Naayinɛ Gɔŋɔ. Bamam sakɛ to’e Baabule pa’alegɔ ba zi’irego poan nu’usiyi la, basɛ ti la soŋera ba yeletooro poan ge zamesa Naayinɛ yela yɛsa bini. (2 Timoti 3:16) Ba kɔ’ɔn mɔɔra mɛ ti ba sarɔŋɔ dɔla bamam n pa’alɛ sɛla la.

Yehowa zɔdoma nɔŋɛ la taaba. Yezu yun pa’alɛ ti a nɔŋɛ nɛreba, doose la eŋa yun dekɛ Naayinɛ mi’ilum pa’alɛ ba ge tibɛ bã’ãdoma la. Nɛresɛba n doli yelemɛŋɛrɛ pu’usegɔ la tare nɔŋerɛ mɛ bɔ’ɔra basɛba. Ba ka nɛ’ɛsi sɛba n de nasedoma bii sɛba n daɣɛ ba buuri. Yezu yun yeti ya san nɔŋɛ taaba, nɛreba wan baŋɛ ti ya dela mam podɔlɔba.—Yon 13:35.

Naayinɛ zɔdoma na’asere Yehowa yu’urɛ la mɛ. Nɛra san ka bɔta ti a yi’ira ho yu’urɛ, a wan ta’an dɛna ho zɔ? Aayi! To san tara zɔ, to mi a yu’urɛ mɛ ge pɛɣera en bɔ’ɔra ba sɛba. Dene zuo, sɛba n boti ba dɛna Naayinɛ zɔdoma nari ti ba mina a yu’urɛ ge tɔɣera a yela bɔ’ɔra nɛreba. Yehowa boti to ita la bala.—Matu 6:9; Arom 10:13, 14.

Wu Yezu la, Naayinɛ zɔdoma me tɔɣere Naayinɛ Na’am la yela bɔ’ɔra nɛreba. Naayinɛ Na’am la dela saazuo gɔmɛt n wan basɛ ti teŋgɔŋɔ wa lebege paradiisi. Naayinɛ zɔdoma mɔɔli Naayinɛ Na’am yetɔɣɔsumo wa mɛ bɔ’ɔra nɛra woo.—Matu 24:14.

Yehowa Sɛɛradoma mɔɔre mɛ ti ba dɛna Naayinɛ zɔdoma. Ba tare la gilema bɔ’ɔra Baabule la ge mi nɔŋɛ taaba. Ba na’asi Naayinɛ yu’urɛ la mɛ ge mi pa’ala nɛreba yelese’a ti Naayinɛ Na’am la wan tare na. Teŋgɔŋɔ wa n ga’arɛ za’a, Yehowa Sɛɛradoma ma’a n doli yelemɛŋɛrɛ pu’usegɔ la.