ZASEŊƆ 10
Ho Wan Eŋɛ La Wani Baŋɛ Yelemɛŋɛrɛ Pu’usegɔ?
1. Yelemɛŋɛrɛ pu’usegɔ dela ayina ma’a?
“Mini ya sɛba n parone te ba dela Yenɛ nɔtɔgɔheba la.”—MATU 7:15.
Yezu yun pa’alɛ a podɔleba la ti yelemɛŋɛrɛ pu’usegɔ ayina ma’a n boi. Ku ani wuu sarɔɔ n tari ho yɛ’ɛsa daarewoo nyɔvore poan. Yezu yun yeti: “Nɛreba fiin wa n nyɛ’ dɛ.” (Matu 7:14) Naayinɛ boti la pu’usegɔ n doli a Yetɔɣum la n pa’alɛ se’em ma’a. Yelemɛŋɛrɛ pu’usegɔdoma za’a tari la sakerɛ deyina ma’a.—Kaalɛ Yon 4:23, 24; 14:6; Epesus 4:4, 5.
Bisɛ Pu’usegɔ Woo N Peeri Naayinɛ Puurɛ? vidiyo la
2. Yezu yun yeti pumpɔreŋɔ Kristakɔma wan ana la wani?
“Ba dekɛ ba mɛhe te bama mi’ Yenɛ, ge ban ete se’em la pa’ale te ba ka mi’ en.”—TITUS 1:16.
Yezu yun ka’am nɛreba ti pumpɔreŋɔ nɔdɛ’ɛsadoma wan sa’am Krista Pu’usegɔ. Ba ani wuu yelemɛŋɛrɛ pu’usegɔdoma. Pumpɔreŋɔ pu’usegɔdoma parum ti bamam dela Kristakɔma. Ge ho wan ta’an baŋɛ ba hala n ani se’em. Wuu wani? Yelemɛŋɛrɛ pu’usegɔ poan ma’a n wan basɛ ti Kristakɔma tara hala soma la itisonɔ.—Kaalɛ Matu 7:13-23.
3. Ho wan eŋɛ la wani baŋɛ yelemɛŋɛrɛ pu’usegɔdoma?
Geele yɛla anuu wa bisɛ:
Yelemɛŋɛrɛ pu’usegɔdoma geele Baabule la ti ku dela Naayinɛ Yetɔɣum. Ba tiregere mɛ dɔla ku naresum yɛla la. Bala, yelemɛŋɛrɛ pu’usegɔ bo la de tɔka la pu’usegɔ n doli nɛresaala puti’irɛ. (Matu 15:7-9) Yelemɛŋɛrɛ pu’usegɔdoma iti la bamam n pa’alɛ sɛla la.—Kaalɛ Yon 17:17; 2 Timoti 3:16, 17.
Yezu yelemɛŋɛrɛ podɔleba tari la na’asegɔ bɔ’ɔra Naayinɛ yu’urɛ, Yehowa. Yezu yun na’asɛ Naayinɛ yu’urɛ mɛ niɛ de pa’alɛ. Yezu yun soŋɛ nɛreba ti ba baŋɛ Naayinɛ ge pa’alɛ ba ti ba pu’usa ti a yu’urɛ ana zilam. (Matu 6:9) Hon boi ze’an la, pu’usegɔ kuni n pa’alɛ nɛreba Naayinɛ yu’urɛ?—Kaalɛ Yon 17:26; Arom 10:13, 14.
Yelemɛŋɛrɛ Kristakɔma n tɔɣere Naayinɛ Na’am la yɛla. Naayinɛ n yun tum Yezu ti a tɔɣɛ Na’am yetɔɣesoma la. Naayinɛ Na’am la ma’a n wan ta’an faaɛ asaala basɛ. Yezu yun mɔɔlɛ de yele mɛ ta paɛ a kum daarɛ. (Luke 4:43; 8:1; 23:42, 43) A yun yeti a podɔleba wan tɔɣɛ de yele. Nɛra san paɛ ho ze’an na tɔɣɛ Naayinɛ Na’am yele bo ho, hon ti’isɛ ti a wan dɛna la pu’usegɔ kuni nɛra?—Kaalɛ Matu 24:14.
Yezu podɔleba ka laɣum pa’asɛ teŋa wa zuo yɛla poan. Ho wan ta’an baŋɛ ba doose la ba ka kɛ̃’ɛ̃re dunia wa poan na’am lɛka la zaba poan la. (Yon 17:16; 18:36) Leyɛ’ɛsa, ba ka tɔɣesere dunia wa poan yele itigɔ la ba sareŋɔ.—Kaalɛ Yames 4:4.
Yelemɛŋɛrɛ Kristakɔma tari la nɔŋerɛ n ka tari makerɛ bɔ’ɔra taaba. Ba zamesɛ yese Naayinɛ Yetɔɣum la poan ti ba tara gilema bɔ’ɔra buuri woo. La boi bim ti pumpɔreŋɔ pu’usegɔdoma ni laɣum kɛ̃ teŋgɔŋɔ wa poan zaba ge yelemɛŋɛrɛ pu’usegɔdoma ka laɣum kɛ̃’ɛ̃ra zaba poan. (Mikah 4:1-3) Yelemɛŋɛrɛ Kristakɔma tuɣum tara ba tɛm la ba lɔɣɔrɔ soŋera ge kpemesa la nɛreba.—Kaalɛ Yon 13:34, 35; 1 Yon 4:20.
4. Ho wan ta’an baŋɛ yelemɛŋɛrɛ pu’usegɔ la?
Pu’usegɔ kuni pa’alegɔ za’a n ze’ele Naayinɛ Yetɔɣum la poan, na’asa Naayinɛ yu’urɛ ge mɔɔla ti Naayinɛ Na’am la ma’a n wan ta’an faaɛ asaala basɛ? Bani n tari nɔŋerɛ bɔ’ɔra taaba ge ka bɔta zaba? Hon ti’isɛ la dene?—Kaalɛ 1 Yon 3:10-12.