Arebeka Yuun Basɛ Ti Yehowa Puurɛ Pee

Arebeka yuun dela pɔka n nɔŋɛ Yehowa. A sira yu’urɛ yuun dela Isaak. Eŋa me yuun nɔŋɛ Yehowa mɛ. Arebeka yuun eŋɛ la wani nyɛ Isaak ele? A yuun eŋɛ la bem basɛ ti Yehowa puurɛ pee? Basɛ ti to zamesɛ a yele pa’asɛ.

Isaak dɔɣereba yuun dela Abraham la Sarah. Ba yuun kɛ̃’ɛri la Kanaan teŋa, ti nɛreba la yuun ka pu’usa Yehowa. Ge Abraham yuun boti a dayɔa wa di la pɔka n pu’useri Yehowa. Bala la, a yuun tum la a yameŋa, Eliezer, ti a ta ee pɔka bo Isaak Haran teŋa, zɛ’an ti a suurɔ kɛ̃’ɛra la.

Eliezer la Abraham yamesi basɛba n yuun laɣum keŋɛ. Sore la yuun zaɛ mɛ. Ba yuun tari la yuɣema pia n zɛ dia la lɔɣɔrɔ. Eliezer yuun wan eŋɛ la wani baŋɛ pɔɣesɛka ti a wan loe bo Isaak? Eliezer la yamesi la n yuun ta paɛ Haran teŋa la, ba yuun teke ze’ele la lua zɛ’an sɛla n sɔi la Eliezer mi ti nɛreba wan wa’ana akɛ ko’om. A yuun zusɛ la Yehowa yeti, ‘Basɛ ti pugela sɛka ti n wan yele ka ti ka bo mam ko’om, ti ka sirum bo mam la n yuɣema wa ko’om la, n wan baŋɛ ti kaŋa ti ho loe.’

Ti Arebeka yuun nyaa wa’an lua la na. Baabule la yeti a yuun dela pɔɣesoŋa. Eliezer yuun zusɛ en ti a bo en ko’om ti a nyu ti a yeti: ‘N wan bo ho ge akɛ bo ho yuɣema la me ti ba nyu.’ Ti’isɛ bisɛ! Yuɣema n nyuuri ko’om zɔ’ɔra se’em konyuuro san tara ba la, bala la basɛ ti Arebeka yuun aɣera ko’om la bala tara tara ti yuɣema la ta nyu tiɣɛ. Hon nyɛ foote la poan ti a mɔɔra se’em la?​— Eliezer puurɛ n yuun pee la Yehowa n yuun lebese a zusega la se’em la.

Eliezer yuun bo Arebeka la lɔɣɔrɔ zo’e zo’e. Arebeka yuun yele Eliezer la a tadaandoma la ti ba keŋɛ ba yire. Eliezer yuun pa’alɛ sɛla zuo n sɔi ti Abraham tum en ti a wa’ana la Yehowa n kelese a zusega se’em. Arebeka dɔɣereba puurɛ yuun pee mɛ ti ba bɔta ti a ele Isaak.

Hon ti’isɛ ti Arebeka wan bɔta ti a ele Isaak?​— Arebeka yuun mi ti Yehowa n tum Eliezer na. Arebeka dɔɣereba n yuun soke en ti a wan bɔta ti a ele Isaak n boi Kanaan teŋa la, a yuun yeti, ‘Ɛɛ, mam boti.’ A yuun eŋɛ la kalam doose Eliezer keŋɛ. Ba yuun ta paɛ Kanaan teŋa la, ti Isaak to’e en ti a dɛna a pɔɣa.

Arebeka n yuun eŋɛ sɛla ti Yehowa bɔta la, Yehowa yuun kã bo en mɛ. Yuuma zo’e zo’e pooren, ba yuun dɔɣɛ Yezu la a yizuo poan! Ho san ana wuu Arebeka la ge basɛ ti Yehowa puurɛ pee, a me wan kã bo ho.