ZASEŊƆ 5
Samuel Yuun Kɔ’ɔn Ita La Sɛla N Ani Soŋa
Samuel bunbilimen sa ti a yuun kɛ̃’ɛra ge tuna pu’usegɔ deo la poan, zɛ’an ti nɛreba yuun kena pu’usa Yehowa la. Hon mi sɛla n sɔi ti Samuel yuun ta kɛ̃’ɛra pu’usegɔ deo la? Basɛ ti to zamesɛ a ma, Hana, yele yia.
Hana yuun mɔ’ɛ la nini yuuma zo’e zo’e ti a dɔɣɛ bia ge ka nyɛta. Bala a yuun zusɛ ge belena Yehowa ti a soŋɛ en. A yuun biŋe nɔɔrɛ ti a san dɔɣɛ budibila, a wan basɛ ti a keŋɛ pu’usegɔ deo la ta kɛ̃’ɛra ge tuna bini. Yehowa yuun lebese a zusega la ti a yuun dɔɣɛ budibila. A yuun siɣɛ a yu’urɛ la Samuel. Wuu Hana n yuun deŋɛ biŋe nɔɔrɛ se’em la, Samuel n yuun paɛ yuuma atã bii anaasi la, ti a tari en keŋɛ pu’usegɔ deo la ti a tuna bɔ’ɔra Naayinɛ.
Eli n yuun de kaabegɔ nɛŋa daana pu’usegɔ deo la poan. A dayɔɔsi bayi n yuun tuni bini. Tɛra ti pu’usegɔ deo wa n yuun de zɛ’an ti ba pu’usa Naayinɛ, bala la nari ti nɛreba tuna tuunsoma bini. Ge Eli dayɔɔsi wa yuun tuni la tuunfĩ’isa. Samuel yuun nyɛ ba iti sɛla la. Samuel yuun tuni tuunfi’isa wuu Eli dayɔɔsi la?— Aayi, a yuun kɔ’ɔn ita la sɛla n ani soŋa wuu a dɔɣereba n yuun pa’alɛ en se’em la.
Hon ti’isɛ ti Eli yuun nari ti a eŋɛ a kɔma bayi la wani?— A yuun nari ti a dɔlegɛ ba tuberɛ ge sa’ɛ ba ti ba da tuna Naayinɛ yire la poan. Ge Eli yuun ka eŋɛ bala, ti Yehowa sunsɔa yuun nyie eŋa la a kɔma bayi la. Yehowa yuun nyaa yeti a wan dɔlegɛ ba tuba.
Samuel yuun dekɛ Yehowa sɔɔleŋa la bo Eli
Daarɛ deyima yu’uŋɔ ti Samuel gisa ge wum ti nɛra yi’ira en: ‘Samuel!’ Ti a zɔ paɛ Eli zɛ’an, ti Eli yele en yeti: ‘Mam ka yi ho.’ A yuun wum la bala sugumnɔɔrɛ buyi. Sugumnɔɔrɛ butã poan ti Eli yele Samuel yeti a san wum nɛra kɔa a yeti: ‘Yehowa, n beleni ho mɛ, tɔɣera ti n keleseri ho mɛ.’ Samuel yuun eŋɛ la eŋa n pa’alɛ en se’em la. Ti Yehowa nyaa yele Samuel yeti: ‘Yele Eli ti n wan dɔlegɛ a deodoma la tuberɛ la tuunfi’isa la ti ba tuna la.’ Hon ti’isɛ ti la yuun de naana bo Samuel ti a yele Eli sɔɔleŋa wa?— Aayi, la yuun daɣɛ naana. Samuel yuun nɔɔ zoti dabeem ge a yuun kelum eŋɛ la sɛla ti Yehowa yele en la. Yehowa n yele sɛla la, bala mea nɔɔ n sirum tum. Eli dayɔɔsi bayi la a mea yuun ki mɛ.
Samuel dela makesonɛ bo to. Hali nɛreba n yuun tuni tuunfi’isa se’em la, a yuun ita la sɛla n ani soŋa. Ge hon me? Ho wan bɔta ti ho ana wuu Samuel ge ita sɛla n ani soŋa? Ho san ita bala, ho wan basɛ ti Yehowa la ho dɔɣereba puurɛ pee.