Ya Wan Tara Ya Ligeri Se’em

To za’a waabi boti ti to nyɛ laɣehɔ mɛ soŋɛ sɛla n pakɛ to deodoma. (Magaha 30:8) To mi ti ‘ligiri gu’uri to mɛ.’ (Pa’ala 7:12) Wuu nɛra la a pɔɣa la, ya ta’an ni ka bɔkera taaba ligeri yɛla poan ge da basɛ ti ligeri yɛla daam ya pɔɣedire. (Epesus 4:32) Nɛra la a pɔɣa nari ti ba tɔɣera yelemɛŋɛrɛ bɔ’ɔra taaba ba ligeri yɛla poan.

1 MAASUM SOŊA

BAABULE LA N YELE SE’EM: “Ya mi te se’em ya poan han bɔta te a mɛ yikantɛ n wan eŋɛ se’em n wana: Yia, a wan zin’ire tɛn’ɛhɛ behɛ nya a tare lɔgɔseto woo te a wan dekɛ mɛ yikantɛ la.” (Luke 14:28) La ani soŋa ti ya bisɛ ya wan dekɛ ligeri la eŋɛ sɛla. (Amos 3:3) Bisɛ ya eeri sɛla la ya paŋa n wan paɛ se’em. (Magaha 31:16) Ya san puɣum tara ligeri, la ka nari ti ya da’ara sɛla woo ti ya bɔta. Eŋɛ ya ania ti sanɛ da kɛ̃ ya ge dekɛ laɣesebo ti ya tara la ma’a tum.​—Magaha 21:5; 22:7.

HON WAN TA’AN EŊƐ SƐLA:

• Ya san nyɛ laɣehɔ, laɣum ya bisɛ ya wan dekɛ bu eŋɛ sɛla

• Sanɛ san kɛ̃ ya, bisɛ ya wan eŋɛ se’em da’ara lɔɣɔrɔ ya paŋa tɛka beene. Makerɛ n wana, yamea n duɣeri nyani ya da’ari dita

2 SƆSƐ YA MINA SƐLA N NARI

BAABULE LA N YELE SE’EM: “Tomam potɛnya dela to eŋɛ sɛla n de ma’an, ge dagɛ la to eŋɛ dɛ Na’ayenɛ nɛŋan ma’an, ge nɛreba mɛ nɛŋan.” (2 Korint 8:21) Basɛ ti ho pɔɣa bii ho sira baŋɛ ho yɔɔrɛ la hon sa’ani ligeri se’em.

Ni yele ho pɔɣa bii ho sira ge nyaa eŋɛ sɛla ti ho bɔta ho dekɛ laɣehɔ da. (Magaha 13:10) Ya san laɣum sɔsɛ baŋɛ ya wan dekɛ laɣehɔ la eŋɛ sɛla, suma’asum wan bɔna pɔɣedire la poan. Da ti’isa ti ho san nyɛ laɣehɔ la dela ho ma’a denɛ ge la dela ya za’a ligeri.​—1 Timoti 5:8.

HON WAN TA’AN EŊƐ SƐLA:

• Nam ya bo taaba nɛra woo n wan dekɛ laɣehɔ se’em tum tuuma

• Da gura ti yele ta paɛ hɔ ti ho nyaa tɔɣera ligeri yele