BƆBERƐ 8
Yeletoo San Paɛ Hɔ
“Daanse’ere, la sone te ya suunre sagom dabeha fiin wa yan nyɛte namehe seto woo la zuo. Ge bala zan’an, tare ya popeelom la yele dena wa.”—1 Peter 1:6
Ho ta’an mɔɔra mɛ ti ho pɔɣedire la ho deodoma tara pupeelum ge yeledi’ima ta’an paɛ ho ti ho kan tara pupeelum. (Pa’ala 9:11) Naayinɛ bo to sɛla n wan ta’an soŋɛ tɔ yeledaaŋɔ poan. Ho san dekɛ Baabule naresum yɛla wa tum tuuma, hon la ho deodoma wan ta’an ze’ele yeledaaŋɔ poan.
1 DEKƐ HOMEA DELUM YEHOWA
BAABULE LA N YELE SE’EM: “Yele ya en sɛla woo n daane ya. Te a dela se’em n tare ya a potɛn’ɛrɛ poan.” (1 Peter 5:7) Kɔ’ɔn tɛra ti daɣɛ Naayinɛ n basɛ ti gurebisɛ paara tɔ. (Yames 1:13) Ho san vurege lɛm en, a wan soŋɛ hɔ. (Isaiah 41:10) “Dekɛ ho suunre daaŋɔ zan’an biŋe a nɛŋan.”—Yooma 62:8.
Ho san zamesa ge kaala Baabule la daarewoo, ho wan nyɛ subuɣelegɔ. Bala wan basɛ ti ho baŋɛ ti Yehowa dela mina n “soŋore tɔ to daaŋɔ woo poan.” (2 Korint 1:3, 4; Arom 15:4) Naayinɛ yeti, a wan bo ho “sunma’ahom la n gaŋɛ la asaala bɔkerɛ la.”—Filipi 4:6, 7, 13.
HON WAN TA’AN EŊƐ SƐLA:
Pu’usɛ bo Yehowa ti a soŋɛ hɔ ti ho ti’isɛ bɔkɛ yele la soŋa
Ti’isɛ bisɛ hon wan eŋɛ se’em maalɛ yele la ti la ze’ele
2 BISA HOMEA LA HO DEODOMA
BAABULE LA N YELE SE’EM: “Se’em n tare bɔkerɛ n tare yam te yamdaana toberɛ kɛleha eere baŋere.” (Magaha 18:15) Bɔkɛ yele la soŋa. Bisɛ nɛra woo n boti sɛla ya deodoma la poan. Tɔɣɛ bo ba. Kɛlesa ba yeti sɛla la.—Magaha 20:5.
Ge ho suɔ san ki? Da ŋmibera ti ho kan kaasɛ. Tɛra ti la yuun daam Yezu mɛ “te Yesu kɛla.” (Yon 11:35; Pa’ala 3:4) La ani soŋa ti ho nyɛta nɛŋa vɔ’ɔsa ge gisa. (Pa’ala 4:6) Bala wan basɛ ti ho ta’an ŋmibe yeledaaŋɔ poan.
HON WAN TA’AN EŊƐ SƐLA:
Yeletoo san paɛ hɔ, basɛ ti ho deodoma baŋɛ. Bala wan basɛ ti yele san paɛ ba, ba kan zɔta ti ba yele ho
Tɔɣɛ bo sɛba n tabelɛ tu’usɛ yele dena
3 BASƐ TI BA SOŊƐ HƆ
BAABULE LA N YELE SE’EM: “Zɔ dela se’em n tare nɔŋerɛ saŋa woo, te sɔɔnrɔ mɛ soŋora taaba yɛla poan.” (Magaha 17:17) Ho zɔdoma ta’an bɔta ti ba soŋɛ hɔ ge daanse’ere ba ka mi ba wan eŋɛ se’em. Yele ba sɛla n pakɛ hɔ, da suɣɛ sɛla. (Magaha 12:25) Basɛ ti sɛba n bɔkeri Baabule yɛla la soŋɛ hɔ. Sɛla ti ba wan dekɛ Baabule la poan tɔɣɛ bo ho la wan soŋɛ hɔ.—Yames 5:14.
Ho san lɛna nɛresɛba n tari sakerɛ ge mina ti Naayinɛ pu’ulumbiŋe la wan sirum wa’ana la, ba wan soŋɛ hɔ. Ho me wan nyɛ subuɣelegɔ ho san soŋera sɛba suure n me sa’am la. Tɔɣɛ hon tari sakerɛ bɔ’ɔra Yehowa la a pu’ulumbiŋe la se’em bo ba. Kɔ’ɔn mɔ’ɛ nini soŋera sɛba woo ti yele paɛ ba la ge da yelegera homea la sɛba n nɔŋɛ ho yele la.—Magaha 18:1; 1 Korint 15:58.
HON WAN TA’AN EŊƐ SƐLA:
Tɔɣɛ bo ho zɔsoŋɔ ge basɛ ti a soŋɛ hɔ
Kɔ’ɔn tɔɣɛ sɛla n pakɛ hɔ ge da suɣɛ sɛla