Mam Boti N Ku La N Mea—Baabule La Wan Ta’an Soŋɛ Mam N San Ti’isa Kum Yele?
Baabule la lebesego
Ɛɛ! Baabule la ze’ele la “Naayinɛ se’em n soŋeri sɛba n tari susa’aŋɔ la” zɛ’an na. (2 Korint 7:6) La boi bim ti Baabule la daɣɛ puti’irɛ bã’a gɔŋɔ ge ku soŋɛ nɛresɛba zo’e zo’e n yuun ti’iseri kum yele la ti ba pisegɛ putɛdenɛ basɛ. Baabule la ka’aŋɔ la wan ta’an soŋɛ hon me.
Baabule la tɔɣɛ pa’alɛ tɔ nɛresɛba n yuun boti ba ki yele mɛ?
Baabule kaalegɔ zɛ’ɛsi ani n wan ta’an soŋɛ hɔ, ti ho da ti’isa ti ho ku homea?
Baabule la bo to la bem ka’aŋɔ?
● Tɔɣɛ la n ani ho se’em bo nɛra.
Baabule la n yele sɛla: “Zɔ dela se’em n tari nɔŋerɛ saŋa woo, ti sɔɔrɔ me soŋera taaba yɛla poan.”—Magaha 17:17.
La vuurɛ: Puti’ira san daana tɔ to ee nɛreba ti ba soŋɛ tɔ.
Ho san ka tɔɣɛ la ani ho se’em bo nɛreba, la dela zeero bɔ’ɔra hɔ ti ho kan nyaŋɛ zɛ. Ge ho san yele la daani ho se’em la wan soŋɛ ti ho puti’irɛ ana mama ti ho ta’an maalɛ yele la soŋa.
Eŋɛ wana bisɛ: Tɔɣɛ bo nɛra zina, daanse’ere ho yire nɛra bii ho zɔsoŋɔ.a Ho ta’an gulesɛ la ani ho se’em biŋe.
● Keŋɛ asibitin.
Baabule la n yele sɛla: “Nɛresɛba n ka bɛ’ɛri, ka sonti ba nyɛ tibedoma ge sɛba n bɛ’ɛri ma’a n sonti ba nyɛ tibedoma.”—Matu 9:12.
La vuurɛ: La nari ti to keŋɛ asibitin to san bɛ’ɛra.
Nɛra san ti’isa ti a ku amea la ta’an dɛna ti a tari la puti’ira bã’a bii zuo bã’a. Wuu bã’a woo n ani se’em la, la ka nari ti ho basɛ ti valum tara hɔ. Ba ta’an tibɛ puti’ira bã’a bii zuo bã’a mɛ.
Eŋɛ wana bisɛ: Tiregɛ ɛ dɔgeta kalam ti a soŋɛ hɔ.
● Tɛra ti Naayinɛ fabeli ho yele mɛ.
Baabule la n yele sɛla: “Ge bala za’a niisi daɣɛ ninmɔ’ɔrɛ bo nɛreba, ge Naayinɛ mi se za’a yele. . . . Da zoti ya dabeem. Se’ere n sɔe la, ya gani niisi kekeko mɛ.”—Luke 12:6, 7.
La vuurɛ: Ho tari tuulum bɔ’ɔra Naayinɛ mɛ.
La ta’an ana wuu ho boi la ho ma’a la ge Naayinɛ mi sɛla n paari ho mɛ. A fabeli ho yele mɛ—hali ho yɛm san puɣum yese la ho vom n ani se’em. Yooma 51:17 yeti, “Hon Naayinɛ kan zaɣesɛ suure se’ere n sa’am ge kɛla de tuure zuo la.” Naayinɛ boti ho vɔna mɛ se’ere n sɔi la, a nɔŋɛ ho mɛ.
Eŋɛ wana bisɛ: Geele Baabule la n basɛ ti la niɛ peelum se’em ti Naayinɛ nɔŋɛ ho mɛ. Makerɛ, bisɛ gɔnseko ti to tara zamesa Baabule la n de Draw Close to Jehovah a zuo 24 la poan.
● Zusa Naayinɛ.
Baabule la n yele sɛla: “Dekɛ ya putɛyiila bo en, se’ere n sɔi la a fabeli ya yele mɛ.”—1 Peter 5:7.
La vuurɛ: Naayinɛ boti la ho yele en la sirum ani ho se’em la yelese’a n basɛ ti ho fabela.
Naayinɛ ta’an basɛ ti ho suure ana mama ge bo ho paŋa ti ho ta’an ŋmibera. (Filipi 4:6, 7, 13) Sore kaŋa poan ti a dɔla soŋera sɛba woo n yi’iri en ti a soŋɛ ba la.—Yooma 55:22.
Eŋɛ wana bisɛ: Zusɛ bo Naayinɛ zina. Yi a yu’urɛ Yehowa la ge yele en la ani ho se’em. (Yooma 83:18) Zusɛ en ti a soŋɛ hɔ ti ho ta’an ŋmibera.
● Ti’isa taɣesa Baabule la n pa’alɛ beere sa’am n wan ta ana se’em.
Baabule la n yele sɛla: “To sakɛ sɛla to suure poan gura la kan malom tee.”—Hebru 6:19.
Meaning: Saŋa ase’a ho puurɛ ta’an pee bii ho suure ta’an sa’am ti la ana wuu sabekãtɛ n yɛɣeleni ɔɔreŋɔ se’em la ge Baabule la n bo to beere sa’am putɛsɛka la ta’an basɛ ti to zɛ’a kankaŋɛ.
Beere sa’am puti’irɛ wa daɣɛ zaaseŋɔ ge la ze’ele la Naayinɛ n pu’ulum biŋe ti a yese yelese’a woo n basɛ ti wuŋerɛ bɔna.—Liligere 21:4.
Eŋɛ wana bisɛ: Kaalɛ gɔnlɛmlɛm la n de Yelesoma N Ze’ele Naayinɛ Ze’an Na! zaseŋɔ 5 ta’an zamesɛ baŋɛ Baabule beere sa’am puti’irɛ yele wa zo’e zo’e.
● Ita sɛla n bo’ori ho pupeelum.
Baabule la n yele sɛla: “Nɛra n tari nyɛɛma a suure poan dela tibegɔ.”—Magaha 17:22.
La vuurɛ: To san ita yelese’a n bo’ori to pupeelum la ta’an basɛ ti to puti’irɛ ana mama ge ti to puti’ira kan daana tɔ.
Eŋɛ wana bisɛ: Ni eŋɛ sɛla n bo’ori ho pupeelum. Makerɛ, kɛlesa yuuma ge kaala yelese’a n kpemeseri ho giila bii ho ita sɛla ti ho nɔŋɛ. Ho me wan tara pupeelum zo’e zo’e ho san soŋera nɛreba hali ho san ita yelepiɣisi bɔ’ɔra ba.—Tooma 20:35.
● Bisa ho imma’asum yɛla soŋa.
Baabule la n yele sɛla: “Nɛra han zameha a iŋa sɛla etegɔ, a wan nyɛ de yɔɔrɔ.”—1 Timoti 4:8.
La vuurɛ: To wan nyɛ nyuurɔ to san ita exercise, gisera soŋa soŋa ge dita dinɔ’ɔma.
Eŋɛ wana bisɛ: Ho ta’an ni keŋɛ kaɛ kaɛ paɛ mita 15.
● Tɛra ti yɛla ta’an tee.
Baabule la n yele sɛla: ‘Ya ka mi ya vom n wan ana se’em beere sa’am.’—Yames 4:14.
La vuurɛ: Yeledaaŋɔ san paara hɔ—hali ti la ana wuu ho kan ta’an eŋɛ sɛsɛla la, ta’an kan yu’e ge tole.
La ka pakɛ la ho yele la n ba’ɛ sa’am gaam be’ero se’em zina wa, la ta’an tee beere sa’am. Bala la, bisɛ ho wan eŋɛ se’em ta’an ŋmibe. (2 Korint 4:8) Ho yeledaaŋɔ la ta’an tee pooren ge ho kan ta’an tee hon ku homea la.
Eŋɛ wana bisɛ: Kaalɛ nɛresɛba yele n boi Baabule la poan ti ba giila yuun kɔ’ɔsɛ ti ba bɔta ti ba ki ge baŋɛ ba vom n yuun nyaa ta tee ana soŋa se’em—sarɔtɔ se’a poan ti bamesi yuun ka ti’isɛ ni de yele. Geele basɛba yele.
Baabule la tɔɣɛ pa’alɛ tɔ nɛresɛba n yuun boti ba ki yele mɛ?
Ɛɛ. Baabule la tɔɣɛ pa’alɛ tɔ nɛreba basɛba n yuun boti ba ki yele mɛ. Naayinɛ yuun ka zɛregɛ ba ge a yuun soŋɛ ba mɛ. A me wan ta’an soŋɛ hɔ.
Eliya
● A yuun dela ani? Eliya yuun dela nɔdɛ’ɛsa n tari sukpe’ene. Ge a giila yuun kɔ’ɔsɛ mɛ. Yames 5:17 yeti, “Eliya yuun dela asaala wo tomam n de se’em wa.”
● Beni n sɔi ti a yuun bɔta ti a ki? Saŋa kayima, Eliya yuun bisɛ ti eŋa boi la a ma’a, ka tara vuurɛ ge ti dabeem me tara en. Bala ti a yuun zusɛ yeti: ‘Yehowa, dekɛ n vom wa.’—1 Nadoma 19:4.
● Bem n yuun soŋɛ en? Eliya yuun tɔɣɛ la ani en se’em mɛ bo Naayinɛ. Naayinɛ yuun kpemese a giila la wani? Naayinɛ yuun basɛ ti a baŋɛ ti a yele pakɛ en mɛ ge kelum pa’alɛ en A paŋa la n ani se’em. A yuun basɛ ti Eliya baŋɛ ti a yele pakɛ Naayinɛ mɛ ge me yuun dekɛ nɛra ti a soŋera Eliya.
▸ Kaalɛ Eliya yele: 1 Nadoma 19:2-18.
Yob
● A yuun dela ani? Yob yuun dela yidaana, dɛna buntata ge me yuun tara sakerɛ pu’usa yelemɛŋɛrɛ Naayinɛ la.
● Beni n sɔi ti a yuun bɔta ti a ki? Yɛla n yuun paɛ Yob basɛ ti a vom sa’am gaam be’ero. A nutatum la woo yuun piɛ a nu’usin mɛ. A kɔma za’a yuun ki la yeledi’ire poan. Bã’a n yuun nyɔkɛ en ti la wuna en. Sɛla n pa’asɛ dela, nɛreba n yuun tɔɣɛ ti la wuŋɛ en ge parum bo en ti amea n sɔi ti yeledaaŋɔ la paara en. Yob yuun yeti: ‘Mam vom ka le tara vuurɛ. Mam ka boti n kelum vɔna.’—Yob 7:16.
● Bem n yuun soŋɛ en? Yob yuun zusɛ Naayinɛ mɛ ge sɔsɛ la nɛreba. (Yob 10:1-3) A zɔ Elihu n yuun tari a giile la yuun kpemese a giila mɛ ge soŋɛ en ti a bɔkɛ a yele la soŋa soŋa. Sɛla n gani za’a dela Yob yuun to’e Naayinɛ ka’aŋɔ la a soŋerɛ mɛ.
▸ Kaalɛ Yob yele: Yob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● A yuun dela ani? Moses yuun dela diimi Israel tiŋa nɛŋadaana ge me yuun dɛna nɔdɛ’ɛsa n tari sakerɛ.
● Beni n sɔi ti a yuun bɔta ti a ki? Moses yuun tari la tuuma zo’e zo’e ti nɛreba la me yuun ni kɔ’ɔn zɛregera en, ti a yuun bisɛ ti eŋa taregɛ mɛ. Bala ti a yuun kaasɛ bo Naayinɛ yeti: “Kɔ’ɔn ko ma nananawa.”—Kanlɛ 11:11, 15.
● Bem n yuun soŋɛ en? Moses yuun tɔɣɛ la ani en se’em mɛ bo Naayinɛ. Naayinɛ yuun soŋɛ Moses ti a tuuma la ana faɣa faɣa ti puti’ira ka le daana en.
▸ Kaalɛ Moses yele: Kanlɛ 11:4-6, 10-17.
a Ho san baɛ ti’isa ti ho ku homea ge me ka tara nɛreba n wan soŋɛ hɔ, yi yeledi’ire soŋerɛ tigere n boi ya zɛ’an la nɔmba.