Baabule La Dela Naayinɛ Yetɔɣum Ti A Dekɛ Bo To

Yehowa bo to la yelenyalema lɔkɔ n de gɔnɔ 66 n ta taaba dɛna Baabule la. Ge ho ta’an ti’isa ti: ‘Baabule la ze’ele la bɛ na? Ani n gulesɛ ku?’ To san bɔta ti to nyɛ sokere ana wa lebesego, basɛ ya ti to sɔsɛ ya Naayinɛ n eŋɛ se’em basɛ ti Baabule la paɛ tɔ.

1. La san dɛna ti nɛreba n gulesɛ Baabule la, beni n sɔi ti to yeti ku ze’ele la Naayinɛ zɛ’an na?

Nɛreba 40 n dekɛ yuuma 1,600 gulesɛ Baabule la pɔsɛ yuun 1513 G.Y.B. ta paɛ wuu yuun 98 Y.B. poan. Gulesegɔdoma la bɔŋa, la ba zi’irego zɛ’ɛsi yuun boi la to’ore to’ore. La bala za’a, Baabule zɛ’ɛsi la woo naɛ taaba mɛ. La eŋɛ la wani ta’an eŋɛ bala? Sɛla n sɔi la Naayinɛ n de Baabule la Gulesegɔdaana. (Kaalɛ 1 Tesalonika 2:​13.) Gulesegɔdoma la yuun ka dekɛ bamesi puti’ira gulesɛ ge “Naayinɛ n tɔɣɛ bo nɛreba ti a zilam vo’osum la soŋɛ ba.”a (2 Peter 1:​21) Naayinɛ yuun dekɛ la a zilam vo’osum la basɛ ti nɛreba gulesɛ a puti’irɛ la.​—2 Timoti 3:16.

2. Bani n wan ta’an nyɛ nyuurɔ Baabule la poan?

“Tiŋa woo, buuri woo, yetɔɣum woo la nɛreba woo” ta’an nyɛ nyuurɔ yelesoma la n boi Baabule la poan la. (Kaalɛ Liligere 14:6.) Naayinɛ kɔ’ɔn basɛ mɛ ti Baabule la bɔna yetɔɣum zo’e zo’e poan gana gɔŋɔ woo n boi tiŋa wa zuo. La wɔ̃ni ti nɛra woo tari Baabule la mɛ. Bala dela yelemɛŋɛrɛ la ka pakɛ nɛreba n kɛ̃’ɛri zɛ’an bii ba tɔɣeri yetɔɣum sebo.

3. Yehowa eŋɛ la wani basɛ ti Baabule la kelum bɔna?

Ba yuun gulesɛ Baabule la eŋɛ la lɔɣɔseto n ka yuuri ge sa’ana poan maɣesɛ wuu gana la bunbu’uma. Ge nɛresɛba n nɔŋɛ Baabule la yuun mɔregɛ mɛ malum gulesɛ ku sugumnɔɔrɛ zo’e zo’e biŋe. Nɛrezureba yuun tiregɛ mɛ ti ba sa’am Baabule la ge basɛba yuun pɔ̃sɛ ba nyɔɔrɛ mɛ te’ele ku. Yehowa ka basɛ ti nɛresɛka bii sɛla gu en ti a kan tɔɣera bɔ’ɔra tɔ. Baabule la yeti: “Naayinɛ yelesum la kɔ’ɔn bɔna mɛ wuusa.”​—Isaiah 40:8.

VIISƐ PA’ASƐ

4. Baabule la pa’alɛ ku Gulesegɔdaana

Ŋmɛ VIDIYO la ge nyaa kaalɛ 2 Timoti 3:​16 ge sɔsɛ sokere ana wa:

VIDIYO: Ani N Gulesɛ Baabule La?​—Ase’a (2:48)

• La san dɛna ti nɛreba n gulesɛ Baabule la, beni n sɔi ti ba yi’ira ku ti Naayinɛ Yelesum?

• Hon ti’isɛ ti yɛm boi bim ti to sakɛ ti Naayinɛ n yuun basɛ ti nɛreba gulesɛ a puti’irɛ biŋe?

5. Baabule la piɛ sa’aŋɔ mɛ

VIDIYO: Baabule La Dela Tuulum Bo Ba​—Ase’a (William Tyndale) (6:17)

• Hon baŋɛ ti nɛreba yuun pɔ̃sɛ la ba nyɔɔrɛ basɛ ti Baabule la bɔna la, bala basɛ ti hon bɔta ti ho kaalɛ ku? Bem zuo?

Kaalɛ Yooma 119:​97 ge nyaa sɔsɛ sokere wa:

• Bem n basɛ ti nɛreba zo’e zo’e pɔ̃sɛ ba nyɔɔrɛ lerege Baabule la ge basɛ ti ku paɛ zɛ’an woo?

6. Nɛra woo gɔŋɔ

Baabule la n de gɔnseko n gani gɔnɔ woo ti ba lerege ge tɔ̃rɛ ku zɛ’an woo tingɔŋɔ wa zuo. Kaalɛ Tooma 10:​34, 35 ge nyaa sɔsɛ sokere ana wa:

• Beni n sɔi ti Naayinɛ bɔta ti ba lɛregera a Yetɔɣum la ge basɛ ti bu paara zɛ’an woo?

• Bem n basɛ ti hon ba’ɛ nɔŋɛ Baabule la?

YELEKPINE

Baabule la dela Naayinɛ Yetɔɣum ge ti a me basɛ ti ku paɛ nɛresaala woo.

Tiisegɔ Sokere

• La vuurɛ dela bem to san yeti Naayinɛ n basɛ ti nɛreba gulesɛ Baabule la?

• Bem n kɛ̃ hon suure ho san bisɛ Baabule la ti ba lerege ku se’em, ku piɛ se’em la ba tɔ̃rɛ ku paɛ se’em la?

• La ani hon la wani la hon baŋɛ ti Naayinɛ boti la ya sɔsa la?

Ɛ BISƐ

Kaalɛ baŋɛ Baabule la n pi’ilum se’em na, ze’ele ba n pɔsɛ gulesɛ sɛla la ta paɛ zina ti ba lerege ku se’em.

“To Eŋɛ Se’em Nyaa Tara Baabule La” (Awake!, November 2007)

Zamesɛ baŋɛ Baabule la n nyaŋɛ piɛ daaŋɔ butã poan se’em ge kelum bɔna.

“Baabule La Nyaŋɛ Piɛ Daaŋɔ Poan” (The Watchtower No. 4 2016)

Bisɛ nɛreba n yuun pɔ̃sɛ ba nyɔɔrɛ se’em ta’an lerege Baabule la.

Baabule La Dela Tuulum Bo Ba (14:26)

Ba yuun le malum gulesɛ Baabule la mɛ ge lerege dɛ sugumnɔɔrɛ zo’e zo’e. Ho wan eŋɛ la wani baŋɛ ti ba ka tee sɛla Baabule la poan?

“Ba Tee Sɛla Baabule La Poan Mɛ?” (La boi jw.org)