ZASEŊƆ 10
Ho San Kena Yehowa Sɛɛradoma Zamesegɔ, Ho Wan Nyɛ La Bem Nyuurɔ?
Hon tabelɛ keŋɛ Yehowa Sɛɛradoma zamesegɔ? Ho san nan ka tabelɛ keŋɛ dabeem ta’an tara ho mɛ ti ho keŋɛ. Ho ta’an ti’isa ti: ‘Bem ti ba ita ba zamesegɔ la poan? Ba zamesegɔ la de ninmɔ’ɔrɛ la wani? Beni n sɔi ti la nara ti n keŋɛ?’ Zaseŋɔ wa poan, ho wan baŋɛ nɛrebana wa n ani se’em ti la me wan soŋɛ hɔ ti ho ta’an ana du’a du’a la Naayinɛ.
1. Beni n sɔi ti Yehowa Sɛɛradoma laɣesa taaba?
Bisɛ Baabule gulesegɔdaana ayima n tɔɣɛ pa’alɛ la de ninmɔ’ɔrɛ se’em ti to laɣum la taaba zamesa: “Mam wan pɛɣɛ Yehowa tansugere kãtɛ la poan.” (Yooma 26:12) Bala mea nɔɔ ti Yehowa Sɛɛradoma nyɛta nyɛɛma la ba laɣeni taaba la. Tingole wa poan, ba ni laɣesɛ taaba mɛ bakwai woo poan yuuna pɛ̃ɣera Naayinɛ ge zusa en. Saŋa ase’a yuunɛ woo poan, ba ni keŋɛ la laɣesekãra ta pu’usa Naayinɛ.
2. Ho wan zamesɛ la bem to zamesegɔ poan?
To zamesegɔ poan, to ni zamesɛ la Naayinɛ Yetɔɣum la, “pa’ala de vuurɛ ti bɔkerɛ bɔna bim.” (Kaalɛ Nehemia 8:8.) Ho san kena zamesegɔ, ho wan baŋɛ Yehowa la a hala la. Ho san zamesɛ baŋɛ eŋa n nɔŋɛ ho se’em la, ho me wan vurege lɛm en. Ho me wan le baŋɛ eŋa n wan soŋɛ ho se’em ti ho vom ana soŋa.—Isaiah 48:17, 18.
3. Ho san kena to zamesegɔ, ho wan nyɛ la bem nyuurɔ?
Yehowa yele to ti to “tiʼisa taaba yele, tara nɔŋerɛ la tuunsoma ge me da viʼira zamesegɔ.” (Hebru 10:24, 25) To zamesegɔ zɛ’an, ho wan nyɛ nɛreba n sirum ti’isɛ taaba yele ge ana wuu hon, bɔta ti ba zamesɛ Naayinɛ yɛla pa’asɛ. Ho wan baŋɛ ti ba tari la Baabule yɛla kpɛmesa taaba giila. (Kaalɛ Arom 1:11, 12.) Ho me wan ta’an kelum tɔɣɛ bo sɛba n nyaŋɛ ŋmibe yeledaaŋɔ seto n paari nɛreyɔna la sɛba n tari pɔɣeba la sireba. Yele ana wa n sɔi ti Yehowa bɔta ti to laɣena taaba saŋa woo zamesa!
VIISƐ PA’ASƐ
Viisɛ baŋɛ Yehowa Sɛɛradoma zamesegɔ n ani se’em la sɛla n sɔi ti la nara ti ho tiregɛ kena zamesegɔ la.
4. Yehowa Sɛɛradoma zamesegɔ
Yuun kɔbesɛka n deŋɛ nɛŋa la, Kristakɔma yuun ni laɣesɛ taaba mɛ pu’usa Yehowa. (Arom 16:3-5) Kaalɛ Kolose 3:16 ge nyaa sɔsɛ sokere wa:
Daami Kristakɔma la yuun pu’useri Yehowa la wani?
Zina beere wa, Yehowa Sɛɛradoma me nyɛti nɛŋa mɛ laɣesa taaba pu’usa. Ho san bɔta ho baŋɛ ba zamesegɔ la n ani se’em, ŋmɛ VIDIYO la. Nyaa bisɛ tansugere poan zamesegɔ foote la ge sɔsɛ sokere ana wa:
Bem yɛla ti hon nyɛ Na’am Pu’usegɔ Deo la poan ti la wɔ̃na la sɛla ti ho kaalɛ ti la bɔna Kolose 3:16 la?
Vidiyo bii foote la poan la, hon le nyɛ sɛla to zamesegɔ poan ti la basɛ ti ho puurɛ pee?
Kaalɛ 2 Korint 9:7 ge nyaa sɔsɛ sokere wa:
Beni n sɔi ti Yehowa Sɛɛradoma ka ita kɔlɛksin ba zamesegɔ poan?
Naɛ la ho pa’alegɔdaana la ti ya bisɛ bakwai wa zamesegɔ yɛla.
Zamesegɔ la poan, yele ani n basɛ ti hon puurɛ pee bii la soŋɛ ho la wani?
Hon mi?
Ho san bisɛ jw.org, ho wan nyɛ zɛse’esi la sansɛka ti to ita to zamesegɔ zɛ’an woo.
A. To bo’ori Baabule yetɔɣum, ita itipa’alegɔ ge me yɛsera vidiyodoma to zamesegɔ poan. To ni dekɛ la yuunɛ la zusega pɔsɛ ge ki’ilum to zamesegɔ la bala mea nɔɔ
B. To zamesegɔ la bɔba ase’a poan, nɛra woo ta’an bo lebesego
C. Nɛra woo—deodoma, nɛreyɔna, bunkureba la kɔma ta’an keŋɛ
D. To ka yɔɔrɛ sɛla to zamesegɔ poan. Yehowa Sɛɛradoma ka kɛɛri nɛreba bii ba ita kɔlɛksin
5. La nari ti ho tiregɛ kena zamesegɔ
Geele Yezu deodoma makesonɛ la. Ba wan eŋɛ se’em ta’an keŋɛ yuunɛ woo malema la, ba yuun ni keŋɛ la miila 60 ze’ele Nazaret doose zɔya la kunkuma zuto ta paɛ Yerusalem. Kaalɛ Luke 2:39-42 ge nyaa sɔsɛ sokere ana wa:
Hon ti’isɛ ti, la yuun wan dɛna naana ti ho doose sarɔwoko kuna taaba ta paɛ Yerusalem?
Beni n sɔi ti la nara ti hon me tiregɛ kena zamesegɔ?
Hon ti’isɛ ti nyuurɔ boi bim ti ho eŋɛ bala? Bem zuo?
Baabule la yeti la dela ninmɔ’ɔrɛ ti to laɣesa taaba pu’usa. Kaalɛ Hebru 10:24, 25 ge nyaa sɔsɛ sokere wa:
Beni n sɔi ti la nara ti to kena zamesegɔ saŋa woo?
NƐREBA BASƐBA YETI: “La yele ka pakɛ ti to laɣesa taaba zamesa. Hon iti Baabule zamesegɔ ho yire ma’a seke ya.”
Gulesegɔ la bii Baabule yele deni n pa’alɛ Yehowa n boti sɛla?
YELEKPINE
Zamesegɔ kenɛ wan soŋɛ hɔ ti ho zamesɛ Yehowa yɛla pa’asɛ ti ya zɔtɔ nyɔka la tara paŋa ge ti ho laɣena la a nɛreba pu’usa en.
Tiisegɔ Sokere
Beni n sɔi ti Yehowa kpɛmesa to giila ti to laɣesa taaba zamesa?
Bem yɛla ti ho wan zamesɛ Yehowa Sɛɛradoma zamesegɔ poan?
Bem nyuurɔ ti hon ti’isɛ ti ho wan le nyɛ pa’asɛ ho san kena Yehowa Sɛɛradoma zamesegɔ?
Ɛ BISƐ
Ge dabeem san tara hɔ ti ho keŋɛ zamesegɔ? Bisɛ nɛra ayima n yuun ani bala ge nyaa ta nɔŋɛ zamesegɔ kenɛ se’em.
Bisɛ burasa’arɛ ayima n yuun nyɛ pupeelum se’em to zamesegɔ poan ge bisɛ eŋa n yuun le eŋɛ se’em ta’an kena.
Zamesɛ baŋɛ zamesegɔ kenɛ n ani nɛreba basɛba se’em.
“Bem Zuo Ti La Nara Ti Ho Kena Zamesegɔ Na’am Pu’usegɔ Deo La Poan?” (La boi jw.org)
Viisɛ bisɛ kandaaŋa ayima n yuun keŋɛ Yehowa Sɛɛradoma zamesegɔ ti la tee a vom se’em.
“Mam Yuun Ni Kɔ’ɔn Sũ N Bugundɔɔ Mɛ Ɛɛra” (The Watchtower, July 1, 2014)