Burasa’arɛ n gelege bisera nɛreba n keni kɛ̃’ɛra Na’am Pu’usegɔ Deo Poan

BUNBILIPAALESI SOKE YETI

Beni N Sɔi Ti La Nara Ti Ho Kena Zamesegɔ Na’am Pu’usegɔ Deo Poan?

Bakwai woo poan, Yehowa Sɛɛradoma iti ba zamesegɔ la sugumnɔɔren buyi ba Na’am Pu’usegɔ Deto poan. Bem ti to ita bim ge ho wan nyɛ nyuurɔ la wani ho san kena zamesegɔ?

Bem ti to ita Na’am Pu’usegɔ Deo poan?

Na’am Pu’usegɔ Deo la dela zamesegɔ zɛ’an ti ba pa’ala Baabule la n wan ta’an soŋɛ to se’em. Zamesegɔ la wan ta’an soŋɛ hɔ ti ho:

zamesɛ baŋɛ Naayinɛ yelemɛŋɛrɛ yɛla.
bɔka yelese’a n iti nananawa la vuurɛ.
dɛna nɛra sonkɔ.
nyɔɣɛ zɔsontɔ.

Hon mi? Yehowa Sɛɛradoma n tɔɣeri Naayinɛ Na’am la yɛla zo’e zo’e ba zamesegɔ poan la n sɔi ti ba yi’ira bim Na’am Pu’usegɔ Deo.—Matu 6:9, 10; 24:14; Luke 4:43.

Beni n sɔi ti la nara ti ho kena zamesegɔ?

Zamesegɔ la wan soŋɛ hɔ. Yehowa Sɛɛradoma n sɔseri Baabule naresum yɛla ba zamesegɔ poan la wan soŋɛ hɔ ti ho nyɛ “yam.” (Magaha 4:5) Bala pa’alɛ ti Baabule la wan ta’an soŋɛ hɔ ti ho kɔ’ɛ putɛsonɛ ho vom poan. La me wan soŋɛ hɔ ti ho nyɛ lebesego bo ninmɔ’ɔrɛ sokere n de wuu:

Yetɔɣese’a ti to ni bɔ’ɔra bakwai ba’asegɔ zamesegɔ la poan basɛba zuto dela:

Beni N Sɔi La Nara Ti To Nana Baabule Pa’alegɔ?
Yeledaaŋɔ San Paɛ Hɔ, Ho Wan Nyɛ Soŋerɛ La Bɛ?
Naayinɛ Na’am La N Iti Sɛla Bɔ’ɔra Tɔ Zina.

“Mam kilaasi tadaana n yuun wa’an zamesegɔ na. Tomam la eŋa n yuun laɣum zi’iri ge ti a laɣum bisɛ to gɔnɔ la poan. Pooren a yuun yele mam ti a puurɛ yuun pee mɛ la nɛreba n yuun bo’ori lebesego se’em la. A me yuun yeti eŋa church la ka tari zamesegɔ gɔnɔ wuu tomam la.”—Brenda.

Hon mi? To zamesegɔ la dela yoo, to me ka iti kɔlɛksin.

Zɔtɔ nyɔka la wan kpemese ho giila. Baabule la yeti sɛla n sɔi ti la nara ti Kristakɔma laɣena taaba dela ba ‘kpɛmesa taaba giila.’ (Hebru 10:24, 25) To san nyɔɣɛ zɔtɔ la nɛresɛba n basɛ ti Naayinɛ la nɛreba yele pakɛ ba, ba wan kpemese to giila la to boi tinsɛka poan ti nɛreba ti’isa bamea ma’a yele la.

“Saŋa ase’a yelese’a n iti sukuu poan la ni basɛ ti mam suure n ni sa’am ti la daana ma ge mam ni san keŋɛ zamesegɔ, la ni ana mam la buɣa buɣa. Mam ni san yɛ’ɛsa kula n puurɛ ni pee mɛ ti n maasum gura beere.”—Elisa.

Hon mi? Tingɔŋɔ wa za’a waabi, Yehowa Sɛɛradoma tansuga n gani 120,000 laɣeni mɛ zɛ’ɛsi n gani 60,000 poan. Yuunɛ woo, ba mɛti la Na’am Pu’usegɔ Deto n paɛ wuu 1,500 ti nɛreba ta’an kena zamesegɔ.a

Ho tadaandoma n yele sɛla

“Mam n yuun boi secondary sukuu la, mam kilaasi tadaana n yuun wa’an to zamesegɔ na. A puurɛ yuun pee mɛ la nɛreba n de yuuma to’ore to’ore n laɣum taaba zamesa Baabule la. La ka yue ti mam tuuma kpɛ’ɛma me wa’ana. La yuun eŋɛ en la pakerɛ la to tari Baabule la tuna tuuma se’em la. A puurɛ n yuun pee la zamesegɔ la se’em la yuun basɛ ti mam me puurɛ pee mɛ paa!”—Jessica.

“Mam san fabela bii tari putɛyiila, zamesegɔ la ni soŋɛ mam mɛ. To zameseri ti to ta’an dɛna la nɛresomdoma, tara vom somɔ la yɛla zo’e zo’e. Saŋa woo, zamesegɔ la ni kpemese mam giila mɛ ti la ana mam buɣa buɣa.”—Timothy.

“Buraa ayima ti mam yuun beem en ti a wa’an to zamesegɔ na yuun yeti: ‘Mam yeen wa’ana ti n pa’alɛ ya ti ya pa’alegɔ la dela pumpɔriŋɔ ge mam baŋɛ ti mam sakerɛ yɛla n tuɣum ka tɔ!’ A puurɛ me yuun pee mɛ la Yehowa Sɛɛradoma n nɔŋɛ nɛreba se’em la. A yuun yeti: ‘Ya to’e mam mɛ wuu ya puɣum mina mam me la!’ ”—Jacob.

“Saŋa ase’a mam ni ti’isɛ ti, ‘zamesegɔ la san kɔ’ɔn ba’asɛ mam ye kula mɛ.’ Ge zamesegɔ la poan ti mam ni kɔ’ɔn tamɛ bala yele mɛ. Zamesegɔ la n ni ba’asɛ ti mam sɔsa la nɛreba la ni basɛ ti mam ka mi sɛla n sɔi ti n ti’iseri ni bala. Zamesegɔ kenɛ n soŋɛ mam ti mam nyɔɣɛ zɔsontɔ.”—Madison.

a Ho san ɛɛra zamesegɔ zɛ’an n lɛm hɔ, keŋɛ “Yehowa Sɛɛradoma Tansugere Zamesegɔ” bɔberɛ la ge di’e “Ee Zɛ’an N Lɛm Hɔ.”