ZASEŊƆ 18
Hon Wan Eŋɛ Se’em Baŋɛ Yelemɛŋɛrɛ Kristakɔma
Nɛreba zo’e zo’e yeti bamam doli la Krista pa’alegɔ ge ba sakerɛ la daɣɛ buyina. Ba me tari la pa’alegɔ to’ore to’ore. Bala la to wan eŋɛ la wani ta’an baŋɛ yelemɛŋɛrɛ Kristakɔma?
1. Ani n de Kristabia?
Kristakɔma dela Yezu Krista podɔleba. (Kaalɛ Tooma 11:26.) Ba wan eŋɛ la wani pa’alɛ ti ba dela Yezu podɔleba? A yuun yeti: “Ya san dɔla mam yelesum wa, ya sirum dela mam podɔleba.” (Yon 8:31) Wana wa pa’alɛ ti yelemɛŋɛrɛ Kristakɔma dela ba nana Yezu pa’alegɔ. Wuu Yezu n yuun tari Gulesegɔ la pa’ala se’em la, yelemɛŋɛrɛ Kristakɔma me sakerɛ yɛla woo boi la Baabule la poan.—Kaalɛ Luke 24:27.
2. Yelemɛŋɛrɛ Kristakɔma iti la wani pa’ala ti ba tari nɔŋerɛ?
Yezu yuun yele a podɔleba la yeti: “Ya nɔŋɛ taaba wuu mam nɔŋɛ ya se’em la.” (Yon 15:12) Yezu yuun eŋɛ la wani pa’alɛ ti a nɔŋɛ a podɔleba la? A yuun nyɛti nɛŋa mɛ bɔ’ɔra ba, kpɛmesa ba giila ge soŋera ba. Hali a yuun ki mɛ bo ba. (1 Yon 3:16) Bala mea nɔɔ ti yelemɛŋɛrɛ Kristakɔma nɔŋerɛ la daɣɛ nɔɔrɛ yetɔɣum ma’a. Ba yetɔɣum la ba itigɔ pa’alɛ ti ba nɔŋɛ taaba mɛ.
3. Yelemɛŋɛrɛ Kristakɔma mu’ɛ nini tuna la bem?
Yezu yuun dekɛ la tuunɛ bo a podɔleba. “A daa tum ba ti ba yese ta mɔɔlɛ Naayinɛ Na’am la.” (Luke 9:2) Kristakɔma sɛba n deŋɛ nɛŋa la yuun ka mɔɔli yetɔɣum la ba pu’usegɔ zɛ’ɛsi ma’a ge zɛ’an woo ti nɛreba bɔna la yɛa poan. (Kaalɛ Tooma 5:42; 17:17.) Yelemɛŋɛrɛ Kristakɔma zina beere wa me mɔɔli Baabule yelemɛŋɛrɛ la mɛ zɛ’an woo ti nɛreba bɔna. Ba nɔŋɛ asaala woo mɛ bala zuo ti ba nyɛta nɛŋa tɔɣera Baabule beere sa’am puti’irɛ la subuɣelegɔ yelesum la bɔ’ɔra nɛreba la pupeelum.—Mark 12:31.
VIISƐ PA’ASƐ
Geele bisɛ ho wan eŋɛ se’em ta’an baŋɛ yelemɛŋɛrɛ Kristakɔma la sɛba n ka doli Yezu pa’alegɔ la a makesonɛ la.
4. Ba eeri la Baabule yelemɛŋɛrɛ
Kristakɔma n deŋɛ nɛŋa la yuun basɛ ti Naayinɛ Yetɔɣum la dɛna tuulum bunɔ bɔ’ɔra ba mɛ
Daɣɛ sɛba woo n yeti bamam dela Kristakɔma n doli Baabule pa’alegɔ la. Ŋmɛ VIDIYO la ge nyaa sɔsɛ sokere wa:
Sore kani poan ti sɛba n yeti bamam dela Kristakɔma la ka pa’ala sɛla ti Yezu yuun pa’alɛ la?
Yezu yuun pa’alɛ la yelemɛŋɛrɛ la n boi Naayinɛ Yetɔɣum poan la. Kaalɛ Yon 18:37 ge nyaa sɔsɛ sokere wa:
Wuu Yezu n pa’alɛ se’em la, to wan eŋɛ la wani baŋɛ Kristakɔma sɛba “n boi yelemɛŋɛrɛ la bɔba”?
5. Ba mɔɔli Baabule yelemɛŋɛrɛ la mɛ
Kristakɔma n deŋɛ nɛŋa la yuun mɔɔli bɔ’ɔra nɛreba mɛ
Ge ti Yezu yuun nyaa zom saazuo la, a yuun dekɛ la tuunɛ bo a podɔleba ti ba tum bala ta paɛ zina beere wa. Kaalɛ Matu 28:19, 20 la Tooma 1:8 ge nyaa sɔsɛ sokere wa:
Na’am mɔɔlegɔ tuuma la wan tum paɛ la wani beene?
6. Ba mɔɔli sɛla la, ba iti la bala
Bem n basɛ ti Tom sakɛ ti eŋa nyɛ yelemɛŋɛrɛ Krista pu’usegɔ mɛ? Ŋmɛ VIDIYO la ge nyaa sɔsɛ sokere ana wa:
Vidiyo la poan la, bem n basɛ ti Tom ka bɔta ti a wum pu’usegɔ yele?
Bem n nyaa basɛ ti a sakɛ ti a nyɛ yelemɛŋɛrɛ la?
Itigɔ gani yetɔɣum. Kaalɛ Matu 7:21 ge nyaa sɔsɛ sokere wa:
Bem ti Yezu bɔta—to yeen tara sakerɛ ma’a bii to itigɔ pakɛ mɛ?
7. Ba nɔŋɛ taaba mɛ
Kristakɔma n deŋɛ nɛŋa la yuun nɔŋɛ taaba mɛ
Kristakɔma tabelɛ pɔ̃sɛ ba nyɔɔrɛ bo ba Kristakɔma tadaandoma mɛ? Ŋmɛ VIDIYO la ge nyaa sɔsɛ sokere ana wa:
Vidiyo la poan la, bem n basɛ ti Lloyd pɔ̃sɛ a nyɔɔrɛ bo Mabia Johansson?
Hon ti’isɛ ti a sirum tum la Kristabia tuunɛ?
Kaalɛ Yon 13:34, 35 ge nyaa sɔsɛ sokere ana wa:
Yezu podɔleba (yelemɛŋɛrɛ Kristakɔma) wan ita nɛresɛba n daɣɛ ba buuri nɛreba la wani?
Ba wan eŋɛ la wani zaberɛ san kɔ?
NƐREBA BASƐBA YETI: “Kristakɔma tuni la tuunfɛ̃’ɛsa—ba wan eŋɛ la wani tara yelemɛŋɛrɛ pu’usegɔ?”
Baabule gulesegɔ kuni ti ho wan dekɛ pa’alɛ nɛra ti a baŋɛ yelemɛŋɛrɛ Kristakɔma?
YELEKPINE
Yelemɛŋɛrɛ Kristakɔma doli la Baabule pa’alegɔ, sirum tara nɔŋerɛ ge mɔɔla Baabule yelemɛŋɛrɛ la.
Tiisegɔ Sokere
Yelemɛŋɛrɛ Kristakɔma sakerɛ yɛla boi la bɛ?
Yelemɛŋɛrɛ Kristakɔma tari la halɛ deni?
Bem tuunɛ ti yelemɛŋɛrɛ Kristakɔma tuna?
Ɛ BISƐ
Zamesɛ baŋɛ tigere sɛka nɛreba n muuri ti ba dɔla Yezu Krista makesonɛ la a pa’alegɔ la.
Bisɛ pɔka kayima n yuun de nɛŋadaana ba pu’usegɔ poan ge nyaa wa’ana baŋɛ “yelemɛŋɛrɛ Kristakɔma.”
“Ba Yuun Dekɛ La Baabule La Lebese Sokere Woo!” (The Watchtower, April 1, 2014)
Zamesɛ baŋɛ yelemɛŋɛrɛ Kristakɔma n iti se’em pa’ala ti ba nɔŋɛ ba pu’usegɔ tadaandoma n eeri soŋerɛ.
Viisɛ bisɛ daami Kristakɔma la zina beere wa yelemɛŋɛrɛ Kristakɔma tuuma n makɛ taaba se’em. Ge me bisɛ Yezu n yuun pa’alɛ to wan baŋɛ ba se’em.
“Bem Yɛla N Pa’alɛ Yelemɛŋɛrɛ Kristakɔma N De Sɛba?” (The Watchtower, March 1, 2012)