ZASEŊƆ 22
Hon Wan Eŋɛ La Wani Ta’an Laɣum Mɔɔla Yelesoma La?
Wuu hon zameseri Baabule yelemɛŋɛrɛ la, ho ta’an ti’isa ti, ‘Nɛra woo nari ti a wum yele wa mɛ!’ Yelemɛŋɛrɛ, nɛra woo sirum sonti a wum dɛ mɛ! Ge dabeem ta’an tara hɔ ti ho yele nɛreba hon zamesɛ sɛla la. Basɛ ti to sɔsɛ hon wan eŋɛ se’em ta’an nyaŋɛ dabeem ge pɔsɛ mɔɔla Baabule yelesoma la, la pupeelum.
1. Ho wan eŋɛ la wani ta’an tɔɣɛ hon zamesɛ sɛla la bo nɛresɛba ti ho mina?
Yezu podɔleba la yuun yeti: “Tomam kan sina kan tɔɣera yelese’a ti to nyɛ ge wum la.” (Tooma 4:20) Ba yuun bisɛ ti yelemɛŋɛrɛ la dela tuulum bunɔ gaŋɛ n sɔi ti ba bɔta ti ba tɔɣɛ dɛ bo nɛreba zo’e zo’e. La me ani hon la bala? La san dɛna bala, yɔ’ɔ seko woo ti ho nyɛ, doose gilema sore poan tɔɣɛ yelese’a ti ho zamesa la bo ho deodoma la ho zɔdoma.—Kaalɛ Kolose 4:6.
Sarɔseto ti ho wan ta’an dekɛ pɔsɛ
Ho san sɔsa la ho deodoma, ho ta’an sɔsɛ Baabule yele yeti: “Mam zamesɛ la sɛla n tari pupeelum bakwai wa poan.”
Sɔsɛ giilekpeŋere Baabule gulesegɔ bo ho zɔ n bɛ̃’ɛri bii n tari putɛyiila.
Hon la ho tuuntuneba tadaandoma san sɔsa bakwai la poan yɛla, yele ba hon zamesɛ sɛla Baabule la poan bii tansugere zamesegɔ poan.
Pa’alɛ ho zɔdoma jw.org intanɛt tuuma la n boi zɛ’an.
Beem nɛreba ti ba laɣum zi’ire ho Baabule zamesegɔ poan bii ho pa’alɛ ba ba wan eŋɛ se’em doose jw.org poan nyɛ Baabule zamesegɔ.
2. Beni n sɔi ti la dɛna yelesonɛ ti ho naɛ la tansugere la mɔɔla?
Yezu podɔleba la yuun ka yeen tɔɣera yelesoma la bɔ’ɔra la nɛresɛba ti ba mina ma’a. Yezu yuun “pu ba la bayi bayi nyaa tum ba ti ba tole a nɛŋa keŋɛ tiŋa woo” poan ta mɔɔlɛ. (Luke 10:1) Eŋa n yuun tigese na’am mɔɔlegɔ tuuma la se’em la, yuun basɛ ti nɛreba zo’e zo’e wum yelesoma la mɛ. A podɔleba la n yuun naɛ taaba mɔɔla se’em la, yuun bo ba la pupeelum. (Luke 10:17) Hon me wan bɔta ti ho naɛ la tansugere la mɔɔla?
VIISƐ PA’ASƐ
Geele bisɛ hon wan ta’an nyaŋɛ dabeem se’em ge nyɛ pupeelum sebo n boi bim ho san mɔɔla yelesoma la.
3. Yehowa wan bɔna la hɔ
Sɛba n boti ba pɔsɛ mɔɔla la, ta’an zɔta dabeem la bamam n wan tɔɣɛ se’em bii nɛreba n wan kelese ba yetɔɣum la se’em.
Dabeem n tari hɔ ti ho dekɛ sɛla ti ho zamesɛ la tɔɣɛ bo nɛreba? Bem zuo?
Ŋmɛ VIDIYO la ge nyaa sɔsɛ sokere wa:
Sɛɛradoma n de bunbilipaalesi wa, eŋɛ la wani nyaŋɛ ba dabeem la?
Kaalɛ Isaiah 41:10 ge nyaa sɔsɛ sokere wa:
Dabeem san tara hɔ ti ho mɔɔla, zusega wan soŋɛ ho la wani?
Hon mi?
Yehowa Sɛɛradoma zo’e zo’e yuun tabelɛ ti’isɛ ti bamam kan malum ta’an tɔɣɛ yelesoma la bo nɛreba. Makerɛ n wana, Sergey yuun bisɛ ti eŋa dela bunbasela ge ti la kpe’em bo en ti a sɔsɛ la nɛreba. Ge a yuun zamesɛ Baabule la mɛ nyaa yeti: “Hali la mam dabeem la za’a, mam yuun pɔsɛ dekɛ sɛla ti mam zamesa la mɛ tɔɣera bɔ’ɔra nɛreba. Nananawa, mam ka sakɛ ti mam n bala. Mam nyaa ta’an tara Baabule yɛla tɔɣera bɔ’ɔra nɛreba la, soŋɛ mam mɛ ti mam nyaa nam n mea. La basɛ ti mam sakɛ bo yelese’a n suuren la nyaa tara la paŋa.”
4. Bɔ’ɔra gilema
Ho san mɔɔla yelesoma la, da ti’isa hon wan yele sɛla ma’a ge bisɛ hon wan yele de se’em. Kaalɛ 2 Timoti 2:24 la 1 Peter 3:15 ge nyaa sɔsɛ sokere ana wa:
To san sɔsa Baabule yɛla bɔ’ɔra nɛreba, to wan ta’an dekɛ kaalegɔ zɛ’ɛsi wa tum tuuma la wani?
Ho deodoma la ho zɔdoma basɛba ta’an kan sakɛ bo ho. Bem ti ho wan eŋɛ? Bem n ka nari ti ho eŋɛ?
Beni n sɔi ti ho sokere nara ti la tara guŋerɛ nyana pɛregerɛ yetɔɣum?
5. To san mɔɔla yelesoma la, la basɛ ti to tara la nyɛɛma
Yehowa n yuun dekɛ yelesoma mɔɔlegɔ tuunɛ la bo Yezu. Yezu yuun geele tuunɛ wa la wani? Kaalɛ Yon 4:34 ge nyaa sɔsɛ sokere ana wa:
Disoma bo’ori to la vom la pupeelum. Beni n sɔi ti Yezu yuun dekɛ nɛra n tuni Naayinɛ puti’irɛ n boti sɛla n de yelesoma mɔɔlegɔ la, ta makɛ la nɛra n diti dia?
To wan nyɛ nyuurɔ la wani to san mɔɔla yelesoma la?
Soŋerɛ
Bakwai la poan zamesegɔ la, bisɛ sarɔseto ti ho wan ta’an pɔsɛ sɔsega.
Geele bisɛ hon wan ta’an dekɛ homea pa’asɛ bakwai la poan zamesegɔ tuuma la poan se’em. Tuuma la ta’an soŋɛ hɔ ti ho ni maasum soŋa dekɛ sɛla ti ho zamesa la tɔɣera bɔ’ɔra nɛreba.
Dekɛ “Nɛreba Basɛba Yeti” bii “Nɛra Ta’an Soke Yeti” zɛ’ɛsi la n boi gɔŋɔ wa poan la maasum hon wan eŋɛ se’em ta’an lebese sokese’a ti nɛreba sɔkera.
NƐRA TA’AN SOKE YETI: “Lasebaarɛ boi?”
Hon wan eŋɛ la wani dekɛ yɔ’ɔ wa yele nɛra la sɛla ti ho zamesɛ Baabule la poan la?
YELEKPINE
Ho san mɔɔla yelesoma la bɔ’ɔra nɛreba, la basɛ ti ho tara la nyɛɛma ge ti pɔsega la me ka tɔna wuu hon ti’isɛ de se’em la.
Tiisegɔ Sokere
Beni n sɔi ti la nara ti ho mɔɔla yelesoma la bɔ’ɔra nɛreba?
Ho wan eŋɛ la wani doose gilema sore poan tum tuunɛ wa?
Ho wan eŋɛ la wani kan zɔta dabeem la na’am mɔɔlegɔ tuuma la?
Ɛ BISƐ
Geele bisɛ sarɔtɔ tunaasi n ka tɔi ti ho wan ta’an dekɛ jw.org contact kaatɛ la mɔɔlɛ yelesoma la.
Zamesɛ baŋɛ hala anaasi n wan ta’an soŋɛ hɔ ti ho mɔɔlɛ yelesoma la.
“Hon Maasum Ti Ho Mɔɔla Yelesoma La?” (The Watchtower, September 2020)
Bisɛ Baabule la poan yele n wan ta’an bo to sukpe’ene se’em ti to mɔɔla yelesoma la, hali to san puɣum dɛna kɔma.
Zamesɛ baŋɛ hon wan eŋɛ se’em ta’an tɔɣɛ Baabule la yɛla bo ho deodoma sɛba n nan ka wum Yehowa yele.