ZASEŊƆ 23

Ko’om Musega Dela Yelesonɛ!

Gɔnseko Ti Ba Printɛ

Yezu yuun pa’alɛ ti Kristakɔma dela ba muse ko’om. (Kaalɛ Matu 28:19, 20.) Ge ko’om musega dela bem? Nɛra san bɔta ti a muse ko’om, la nari ti a eŋɛ la bem?

1. Ko’om musega dela bem?

Yetɔɣum la n de “muse ko’om” la ze’ele la Greek yetɔɣum poan ti la vuurɛ dɛna “muse” ko’om poan. Se’em ma’a ti Yezu yuun muse ko’om la, ba yuun muse en la Yordan Kolaa la poan ge ti a nyaa “ze’ele ko’om la poan dɔɔra na.” (Mark 1:9, 10) Bala mea nɔɔ ti yelemɛŋɛrɛ Kristakɔma san yeti ba muse ko’om, ba ni muse la ba iŋa la za’a ko’om la poan.

2. Ko’om musega pa’alɛ la bem?

Nɛra san muse ko’om, la pa’alɛ ti a kã la amea bo Yehowa Naayinɛ. Nɛra kã’ari amea la wani wani? Ge ti a nyaa muse ko’om la, nɛra la mea ma’a n ni zusɛ Yehowa, ni yele en yeti eŋa boti a pu’usa la Eŋa daarewoo. A biŋe la nɔɔrɛ ti a wan pu’usa la Yehowa ma’a ge tuna Naayinɛ puti’irɛ n boti sɛla ti la dɛna ninmɔ’ɔrɛ a vom poan. A loe mɛ ti “a zaɣesɛ amea ge . . . kɔ’ɔn dɔla” Yezu pa’alegɔ la a vom yɛla. (Matu 16:24) Eŋa n kã amea ge muse ko’om la yu’ɛ la sore bo en ti a ta’an nyɔɣɛ Yehowa la nɛresɛba n pu’useri en la zɔtɔ.

3. Nɛra wan eŋɛ la wani ta’an nyɛ nɛŋa tɔlega ta muse ko’om?

Ho san zamesa Yehowa yɛla ge tara sakerɛ a poan, ho wan ta’an muse ko’om. (Kaalɛ Hebru 11:6.) Ho mi’ilum la ho sakerɛ san pa’asa, ho nɔŋerɛ ti ho tara bɔ’ɔra Yehowa me wan pa’asɛ. Nɔkpe’ene kai ti, ho wan bɔta ti ho mɔɔla a yɛla bɔ’ɔra nɛreba ge nana a pa’alegɔ. (2 Timoti 4:2; 1 Yon 5:3) Nɛra san “kena la nari se’em Yehowa zɛ’an ta’an basɛ ti A puurɛ pee soŋa soŋa,” a ta’an kã amea bo Naayinɛ ge muse ko’om.—Kolose 1:9, 10.a

VIISƐ PA’ASƐ

Bisɛ to wan ta’an zamesɛ sɛla Yezu ko’om musega la poan, la nɛra me n wan ta’an maasum se’em muse ko’om.

4. To wan ta’an zamesɛ sɛla Yezu ko’om musega la poan

Kaalɛ Matu 3:13-17 ge zamesɛ baŋɛ Yezu ko’om musega yɛla zo’e zo’e ge nyaa sɔsɛ sokere ana wa:

Yezu yuun dela bilia se’em ma’a ti a muse ko’om la?
Ba yuun muse en ko’om la wani? Ba yuun yeen dekɛ la ko’om miisi a zuo?

Yezu n yuun muse ko’om ba’asɛ la, ti a yuun nyaa pɔsɛ tuunse’ere n boi de to’ore ti Naayinɛ dekɛ bo en la. Kaalɛ Luke 3:21-23 la Yon 6:38 ge nyaa sɔsɛ sokere wa:

Yezu n yuun muse ko’om ba’asɛ la, bem tuunɛ wana mɔpi n yuun de ninmɔ’ɔrɛ gana za’a a vom poan?

5. Ko’om musega dela sɛla n ka kpe’em

Ho san ti’isa ti ho kã homea ge muse ko’om, la ta’an ana ho wuu la ba’ɛ kpe’em mɛ. Ge ho wan ta’an nyɛ nɛŋa tɔlega ta paɛ se’em ma’a ti ho wan ta’an muse ko’om. Ho san bɔta ti ho nyɛ nɛreba n tabelɛ eŋɛ wana wa se’em, ŋmɛ VIDIYO la.

VIDIYO: Tara Bɔnsoŋa La Yehowa (1:11)

Kaalɛ Yon 17:3 la Yames 1:5 ge nyaa sɔsɛ sokere wa:

Bem n wan soŋɛ nɛra ti a ta’an ta muse ko’om?

A. Pɔka n kã’ari amea bɔ’ɔra Naayinɛ zusega poan.

B. Pɔka wa mea nɔɔ n bala n muse ko’om nyaa dɛna Yehowa Sɛɛradoma ayima.

To san yele Yehowa ti to boti la to pu’usa eŋa ma’a daarewoo, la pa’alɛ ti to kã la tomesi bo en
To ko’om musega la poan ni eŋɛ pa’alɛ nɛreba ti to kã la tomesi bo Naayinɛ

6. Ko’om musega basɛ ti ho laɣum pa’asɛ la Yehowa yizuo la poan

To san muse ko’om, to laɣum pa’asɛ la tingɔŋɔ wa za’a yizuo n tari nɔyinɛ la poan. Sɛba woo n muse ko’om dɛna Yehowa Sɛɛradoma, hali la ba ze’ele zɛ’an bii ba bɔŋa zɛ’an n ani se’em tari la sakerɛ la sareŋɔ yɛla n de buyina. Kaalɛ Yooma 25:14 la 1 Peter 2:17 ge nyaa sɔsɛ sokere wa:

Ko’om musega basɛ ti nɛra la Yehowa la sɛba n pu’useri En bɔŋa ana taaba la wani?

Fɔɔra: Mabipɔka n ti’iseri eŋa n tari bɔnsoŋa se’em la mabiisi la n boi tansugere la poan ti a puurɛ pee. 1. A gurɛ la pɔɣenya’aŋa ti ba kena. 2. A tɔɣeri la a suure yele bɔ’ɔra pɔɣenya’aŋa wa mea nɔɔ. 3. Eŋa la mabiisi n naɛ taaba dita. 4. Eŋa la mabipɔka n mɔɔli bɔ’ɔra buraa ayima. 5. Laɣesegɔ poan ti eŋa la mabiisi bayi n ze’ele tisi to’ore to’ore nyɔkɛ foote.

NƐREBA BASƐBA YETI: “Mam ka maasum ti n muse ko’om.”

La san ana ho bala, hon ti’isɛ ti ko’om musega kelum dɛna la yelesonɛ yoi?

YELEKPINE

Yezu yuun pa’alɛ ti Kristakɔma nari ti ba muse la ko’om. Nɛra san bɔta a eŋɛ bala, la nari ti a tara sakerɛ n kpe’em Yehowa poan, vɔna a vom ti la makɛ la A sareŋɔ yɛla ge me kã amea bo En.

Tiisegɔ sokere

Ko’om musega dela bem ge beni n sɔi ti la dɛna ninmɔ’ɔrɛ?
Kã’a la ko’om musega makɛ taaba la wani?
Nɛra wan eŋɛ la bem ta’an kã amea ge muse ko’om?

To zamesɛ ba’asɛ la:

Mam Boti N Eŋɛ Sɛla

Geele yɛla n tigese gã’a bɔna Bɔberɛ 4 ki’ileŋɔ poan la n de, “Mam Maasum Ti N Naɛ La Tansugere La Kena Na’am Mɔɔlegɔ?” la “Mam Maasum Ti N Muse Ko’om?” ge bisɛ hon wan eŋɛ se’em ta’an muse ko’om.

Ase’a:

Your other goal

Ɛ BISƐ

Zamesɛ baŋɛ ko’om musega n de sɛla la ko’om musega n daɣɛ sɛla.

“Ko’om Musega Dela Bem?” (La boi jw.org)

Tiisɛ homea yelese’a ti nɛra wan ta’an eŋɛ ta muse ko’om.

“Nɔŋerɛ La Nini Tika N Wan Basɛ Ti To Muse Ko’om” (The Watchtower, March 2020)

Kaalɛ baŋɛ buraa kayima n ma’ɛ amea zamesɛ ta muse ko’om ge daɣɛ ti a yeen bɔta la zamesegɔ ma’a.

“Ba Yuun Boti La N Mea Kɔ’ɔn Baŋɛ Yelemɛŋɛrɛ La N Boi Zɛ’an” (The Watchtower, February 1, 2013)

Geele bisɛ sɛla n sɔi ti ko’om musega dɛna yelesonɛ yele la hon wan ta’an maasum se’em muse ko’om.

“La Nari Ti N Muse Ko’om?” (Sokese’a Ti Bunbilipaalesi Sɔkera La Lebesego Se’a N Soŋeri Ba, Gɔŋɔ 2, a zuo 37)

a Nɛra daa san puɣum muse ko’om pu’usegɔ kuyima poan, la nari ti a le muse ko’om mɛ. Beni n sɔi? Se’ere n sɔi la, ba daa ka pa’alɛ en Baabule yelemɛŋɛrɛ la.—Bisɛ Tooma 19:1-5 la Zaseŋɔ 13.