Soŋera Ho Tansugere La

Tingɔŋɔ wa za’a waabi poan, nɛreba zo’e zo’e tari la pupeelum pu’usa Yehowa tansuga tusa tusa poan. Ba puurɛ ni pee mɛ la pa’alegɔ la ti ba nyɛta la ge me ni kɔ’ɔn ana lɛɛ ti ba soŋɛ ba tansugere la sarɔtɔ zo’e zo’e poan. La ani hon la bala ho tansugere poan?

1. Sarɔtɔ ani poan ti hon wan ta’an dekɛ ho paŋa la ho saŋa soŋɛ tansugere la?

To za’a waabi ta’an laɣum soŋɛ tansugere la. Makerɛ, nɛreba boi yamam tansugere la poan kuregɛ bii ba inya ka barɛ? Ho wan ta’an soŋɛ ba ti ba kena zamesegɔ? Bii ho wan ta’an eŋɛ yɛla ase’a soŋɛ ba maɣesɛ wuu ho da ziirɔ bo ba bii ho keŋɛ ta tum ba yire tuuma bo ba? (Kaalɛ Yames 1:27.) To me ta’an soŋɛ piisa ge maala to Na’am Pu’usegɔ Deo la. Nɛra kan pɛregɛ tɔ ti to eŋɛ wana wa. To nɔŋɛ Naayinɛ la to mabiisi la n basɛ ti to “pee puurɛ” tuna.​—Yooma 110:3.

Sɛɛradoma n muse ko’om ta’an soŋɛ tansugere la sarɔtɔ zo’e zo’e poan. Buraasi n bĩ vo’osum poan ta’an dɛna keendoma soŋeredoma ge nyaa ta dɛna keendoma. Mabiisi ta’an soŋɛ na’am mɔɔlegɔ tuuma la soŋa soŋa doose la ba de sore ŋmɛ’adoma. Sɛɛradoma basɛba ta’an ni soŋɛ mɛta to pu’usegɔ deto bii ba keŋɛ ta soŋɛ tansugere n eeri soŋerɛ yɛla ase’a poan.

2. Sore kani poan ti to wan ta’an dekɛ to nutatum soŋɛ tansugere la?

To wan ta’an “na’asa Yehowa la [to] tuulum lɔɣɔrɔ.” (Magaha 3:9) To bisɛ ti la dela yɔ’ɔ bo to ti to tara to ligeri la to lɔɣɔrɔ soŋera tansugere la, la tingɔŋɔ wa za’a waabi na’am mɔɔlegɔ tuuma la. (Kaalɛ 2 Korint 9:7.) Ba tari ligeri se’a ti to laɣesa la laɣum soŋera la yeledi’ire soŋerɛ tuuma. Nɛreba zo’e zo’e ni ‘dekɛ la sɛla biŋe’ saŋa woo ti la dɛna ba bo’olum ti ba wan dekɛ soŋɛ. (Kaalɛ 1 Korint 16:2.) To ta’an dekɛ to tari sɛla eŋɛ ligeri daɣesi la n boi to pu’usegɔ zɛ’ɛsi la bii to keŋɛ donate.jw.org intanɛt tuuma zɛ’an ta dekɛ sɛla bo. Yehowa bo to la yɔ’ɔ ti to eŋɛ pa’alɛ ti to nɔŋɛ en doose la to tari to nutatum tuna se’em.

VIISƐ PA’ASƐ

3. To ta’an dekɛ to nutatum soŋɛ

Yehowa la Yezu nɔŋɛ la nɛra n bo’ori la pupeelum. Makerɛ, Yezu yuun pɛɣɛ pɔkɔ̃ɔrɛ n de nasa n yuun tiregɛ dekɛ a laɣehɔ soŋɛ la mɛ. Kaalɛ Luke 21:1-4 ge nyaa sɔsɛ sokere ana wa:

• La nari ti to dekɛ ligeri zo’e zo’e soŋɛ ge ti Yehowa puurɛ nyaa pee?

• La ni ana Yehowa la Yezu la wani la to ni yese to suure poan dekɛ bo’olum soŋɛ la?

Ho san ɛɛra ho baŋɛ ba tari ho ligeri la tuna se’em, ŋmɛ VIDIYO la ge nyaa sɔsɛ sokere wa:

VIDIYO: ‘Bo’olum Ti Nɛra Dekɛ Bo Yehowa’ (4:47)

• Ba tari to ligeri la tuna la wani ti la soŋera tansuga la n boi tingɔŋɔ wa zuo la?

4. To ta’an dekɛ to paŋa soŋɛ

Baabule saŋa la, sɛba n yuun pu’useri Yehowa yuun tuni mɛ paa ta’an maala ba pu’usegɔ zɛ’ɛsi. Ge ba yuun yeen ka laɣesa la ligeri ma’a. Kaalɛ 2 Yelebiŋ’a 34:9-11 ge nyaa sɔsɛ sokere wa:

• Sore kani poan ti Israel nɛra woo yuun laɣum soŋera bisera Yehowa yire bii pu’usegɔ zɛ’an la?

Ho san ɛɛra ho baŋɛ Yehowa Sɛɛradoma n doli diimi nɛreba wa makesonɛ la se’em, ŋmɛ VIDIYO la ge nyaa sɔsɛ sokere ana wa:

VIDIYO: To Maali To Na’am Pu’usegɔ Zɛ’ɛsi Se’em (3:31)

• Beni n sɔi ti la yele pakɛ ti to maala to Na’am Pu’usegɔ Deo la ge basɛ ti ku ana filam?

• Sarɔtɔ ani poan ti ho me wan ta’an soŋɛ?

5. Mabiburaasi ta’an kumesɛ bamesi tum tuuma tansugere la poan

Baabule la kpemese Kristakɔma n de buraasi giila ti, ba kumesɛ bamesi ta’an dekɛ ba paŋa za’a soŋera tansugere la. Ho san bɔta ho nyɛ makerɛ, ŋmɛ VIDIYO la ge nyaa sɔsɛ sokere wa:

VIDIYO: Mabiburaasi​—Kumesɛ Yamea Tum Tuunsoma (5:19)

• Vidiyo la poan la, Awinbɔta yuun eŋɛ la wani kumesɛ amea ta’an soŋera tansugere la soŋa soŋa?

Baabule la tɔɣɛ pa’alɛ mabiburaasi n wan eŋɛ se’em ge ta’an dɛna keendoma soŋeredoma bii keendoma. Kaalɛ 1 Timoti 3:1-13 ge nyaa sɔsɛ sokere ana wa:

• Mabiburaasi n kumeseri bamesi ti ba dɛna keendoma soŋeredoma bii keendoma nari ti ba eŋɛ la bem?

• Ba deodoma nari ti ba eŋɛ la bem?​—Bisɛ kaalegɔ zɛ’ɛsi 4 la 11.

• Mabiburaasi san tiregera ti ba kumesɛ bamesi, tansugere la za’a nyɛti nyuurɔ la wani?

YELEKPINE

Yehowa puurɛ ni pee mɛ la to tari to saŋa, to paŋa la to nutatum soŋera tansugere la.

Tiisegɔ Sokere

• Sore kani poan ti to wan ta’an dekɛ to paŋa la to saŋa soŋɛ tansugere la?

• Sore kani poan ti to wan ta’an dekɛ to nutatum soŋɛ tansugere la?

• Sore ani poan ti hon wan bɔta ti ho soŋɛ tansugere la?

Ɛ BISƐ

Geele bisɛ sɛla n sɔi ti Naayinɛ ka le bɔta ti sɛba n pu’useri en la bɔ’ɔra pia puregerɛ bo’olum la.

“Baabule La Tɔɣɛ Pia Puregerɛ Bo’olum Yele La Wani?” (La boi jw.org)

Baabule la paʼalɛ ti tuuma aseʼa dela mabiburaasi n muse koʼom tuuma. Ge mabipɔka n muse koʼom wan eŋɛ la wani la san dɛna ti a tum tuun ana?

“Bɔkɛ Tansugere La N Tigese Seem” (The Watchtower, February 2021)

Bisɛ Sɛɛradoma n tari sukpe’ene n tiregɛ se’em tara Baabule gɔnɔ kena bɔ’ɔra ba mabiisi.

Ba Tari Baabule Gɔnɔ Tɔ̃ta Se’em Congo Tiŋa Poan (4:25)

Zamesɛ baŋɛ tomam n nyɛta ligeri zɛ’an tuna to tuuma ti la bɔna de to’ore la pu’usegɔ ase’a n iti se’em la.

“Yehowa Sɛɛradoma Nyɛti Ligeri La Bɛ Tuna Ba Tuuma La?” (La boi jw.org)